Read Batak Karo KELUAREN 26 Bible Online

KELUAREN 26 - Batak Karo bible

KELUAREN 26

¹“Bagin si arah bas Kemah si Badia e, arus ibahan i bas sepuluh lambar uis lenen halus nari, itenun ras benang wool biru, ungu ras megara. Jenari isulamken i je gambar-gambar mahluk si erkabeng.

²Tep-tep lambar seri ukurenna, gedangna sepuluh dua meter, belangna dua meter.

³Lima lambar ijaitken jadi sada bagin, bage pe si lima lambar nari.

⁴Bahan lubang kancingna arah darat i bas kain biru nari, inganna arah tepi tep-tep bagin si enggo ijaitken ndai.

⁵I bas bagin si pemena tamaken lima puluh lubang kancing janah i bas bagin si peduaken pe lima puluh lubang kancing ka.

⁶Bahan lima puluh kancing emas guna mpersada si dua bagin ndai.

⁷Bahan tarum Kemah e i bas uis si itenun i bas mbulu kambing nari, buena sepuluh sada lambar.

⁸Ukurenna seri kerina, gedangna sepuluh telu meter janah belangna dua meter.

⁹Lima lambar ipersada jadi sada bagin janah si enem nari jadi sada bagin ka. Lipat duaken lambar si peenemken i babo ayo Kemah e.

¹⁰Bahan lima puluh lubang kancing i tepi bagin si pemena, janah lima puluh lubang kancing ka i bas bagin si sada nari.

¹¹Bahan lima puluh kancing tembaga, jenari tamaken i bas lubang kancing e guna mpersada si dua bagin ndai gelah tarumna e enggo ersada.

¹²Ibaken setengah lambar uis arah pudi Kemah e, janah pelepas ia gantung.

¹³Ibaken lima puluh sentimeter sembelah rikutken gedangna, janah pelepas ia gantung nutupi Kemah e.

¹⁴Bahan dua nari man tarumna, sada i bas kulit bajar biri-biri nari si icelup megara, ras sada nari i bas kulit halus nari; enda jadi lapis tarumna arah darat.

¹⁵Papan rangka Kemah e ibahan i bas kayu jati nari.

¹⁶Tep-tep lambar papan gedangna empat meter, belangna 66 sentimeter.

¹⁷Bahan dua penna gelah banci ipersada kerina papan rangkana e. Kerina papan e la banci la ibahan penna.

¹⁸Bahan dua puluh lambar papan guna bagin Selatan Kemah,

¹⁹janah empat puluh alas pirak arah teruh, dua alas guna tep-tep papan man pengapit penna si dua ndai.

²⁰Bahan dua puluh lambar papan guna bagin Utara Kemah,

²¹janah empat puluh alas pirak, dua man tep-tep lambar papan.

²²Arah pudi Kemah bagin Barat, bahan enem lambar papan,

²³janah dua lambar papan i bas sukina.

²⁴Papan persukina enda ipersada arah teruh janah arus rapat i teruh nari terus ku das. Papan persukina e arus bage ibahan duana.

²⁵E maka arus lit waluh papan ras sepuluh enem alas pirak, dua guna tep-tep papan.

²⁶Bage pe arus ibahan sepuluh lima beloti i bas kayu jati nari, lima guna tep-tep sada dampar dingding Kemah e,

²⁷lima guna dingding si sada nari lima guna dingding si arah Barat, e me kap si arah pudi.

²⁸Beloti si tengah, inganna pas i tengah-tengah dingding, berteng i bas sada ujung Kemah nari ku ujung si deban.

²⁹Lapisi papan dingding e alu emas janah bahan pe gelang emas i bas dingding e ingan namaken beloti si berteng e ibaluti ka alu emas.

³⁰Pajekken lah Kemah e sue ras rencana si Kucidahken man bandu i das deleng e.

³¹Bahan sada kire-kire i bas lenen halus nari itenun ras benang wool biru, ungu, ras megara. Sulamken i je gambar-gambar mahluk si erkabeng.

³²Gantungken lah kire-kire e i bas empat tiang kayu jati si ilapisi alu emas, janah bahan pe gantungenna. Tiang si empat e ibahan alasna i bas pirak nari.

³³Tamaken kire-kire i teruh barisen kancing si lit i bas tarum Kemah e, janah cibalken Peti Perpadanen si isin papan batu i pudi kire-kire e. Kire-kire e nirangken Ruang si Badia ras Ruang si Badiana kal. [101†]

³⁴Tamaken tutupna i babo Peti Perpadanen e.

³⁵I daraten Ruang si Badiana e kal, tamaken meja ndai arah bagin Utara janah nahe lampu e arah bagin Selatan i bas Kemah e.

³⁶Dalan bengket ku bas Kemah e bahan sada kire-kire i bas lenen halus nari, itenun ras benang wool biru, ungu, ras megara janah ihiasi alu sulamen.

³⁷Guna kire-kire enda, bahan lima tiang kayu jati ilapisi alu emas janah bahan pe sangkutenna emas; bahan pe lima alas tembaga guna tiang-tiang.”