Read Batak Karo KELUAREN 28 Bible Online

KELUAREN 28 - Batak Karo bible

KELUAREN 28

¹“Dilo seninandu Harun ras kerina anak-anakna si dilaki, Nadap, Abihu, Eleasar ras Itamar. Serapken ia i bas bangsa Israel nari, gelah banci ia jadi imam ndahiken kerina dahin si Kusuruh.

²Bahan paken imam man seninandu Harun gelah teridah ia mulia ras mejile.

³Dilo kerina kalak si beluh erbahan paken, si enggo Kubere kepentaren guna si e, jenari suruh ia kerina erbahan paken Harun, gelah banci ia itangkuhken jadi imam, ndahiken dahinKu.

⁴Suruh ia erbahan sada tutup tenten, sada baju epod, sada jubah, sada baju si ersulam, sada bulang-bulang, ras sada selempang. Arus ibahan paken imam enda man seninandu Harun ras anak-anakna, gelah banci ia jadi imam, ndahiken si Kusuruh.

⁵Kerina paken e la banci la ibahanna i bas wool biru, ungu, ras megara, bage pe benang emas ras lenen halus.

⁶Tambah si e baju epod arus ibahan i bas wool biru, ungu, ras megara, bage pe emas ras lenen halus janah ihiasi alu sulamen.

⁷Bahan dua tinali bas bara guna mpersadasa; tinali bas bara enda ijarumken arah pinggirna e.

⁸Sada gendit si itenun halus, bahan-bahanna seri, ijarumi ersada ras baju epod e.

⁹[9-11] Buat dua batu permata delima. Daramilah sekalak tukang emas si beluh guna ngukir gelar-gelar anak Jakup si sepuluh dua i bas batu permata si dua e. Urutenna rikutken umurna; enem gelar i bas tep-tep batu permata. Jenari leketken tep-tep batu permata i bas bingke emas.

¹²Kenca bage tamaken permata si dua ndai i bas tinali baju epod ndai jadi tanda suku-suku Israel si sepuluh dua. Alu bagenda ipersan Harun gelar-gelar suku Israel i bas barana, gelah Aku, TUHANndu, rusur nginget bangsangKu.

¹³Seakatan bingke emas si dua e,

¹⁴arus maka ibahan ka dua rante emas murni si ipiuh bagi tinali. Jenari leketken rante e ku bingke emas ndai.”

¹⁵“Bahan sada tutup tenten man Imam si Mbelin gelah ipakena e guna meteh peraten Dibata. Bahan seri ras baju epod ndai janah sulamenna pe seri.

¹⁶Bentukna segi empat, ilipat dua, gedangna ras belangna 22 sentimeter.

¹⁷Leketken i je empat baris batu permata si meherga, i bas baris si pemena: sada permata rubi, topas, ras garnet.

¹⁸I bas baris si peduaken: sada permata samrud, batu nilam, ras sada berlian.

¹⁹I bas baris si peteluken: sada permata lasuardi, sada akik, ras sada amatis.

²⁰I bas baris si peempatken: sada mutiara biru, sada delima, ras sada jasper. Kerina permata e ileketken sada-sada i bas bingke emas.

²¹I bas tep-tep batu permata enda iukir sada-sadai gelar anak-anak Jakup, jadi tanda suku-suku bangsa Israel.

²²Bahan rante tutup tenten enda i bas emas murni nari, si ipiuh bagi tinali.

²³Bahan dua gelang emas jenari leketken i bas suki si arah das tutup tenten e,

²⁴e maka iketken tinali emas si dua ndai ku gelang emas si dua e.

²⁵Leketken ujungna si dua nari ku ingan batu permata si dua ndai, janah alu bagenda sangkutken ia arah lebe tinali bas bara baju epod e.

²⁶Jenari bahan dua gelang emas, sangkutken arah bas i bas suki si arah teruh tutup tenten e rembak ras baju epod.

²⁷Bahan dua nari gelang emas jenari leketken sada-sadai i bas ujung si arah teruh nali bara baju epod ndai. Ingan ngeleketkenca deherken pengkelimenna, i babo gendit si itenun halus ndai.

²⁸Iket lah gelang tutup tenten e ras gelang bara si tanggung e alu benang biru. Alu bage tutup tenten e banci leket i babo gendit ndai janah ia la banci nursur.

²⁹Asum Harun bengket ku bas Ingan si Badia e, arus ipakena tutup tenten e si enggo iukir alu gelar-gelar suku-suku bangsa Israel. Alu bagenda, Aku, TUHANndu, rusur nginget bangsangKu.

³⁰Tamaken pe Urim ras Tumim i bas tutup tenten e, gelah banci ipake Harun tupung ia reh ku bas inganKu si badia. I bas paksa-paksa si bage, la banci la ipakena rusur tutup tenten e, gelah banci itentukenna kai sura-surangKu man bangsa Israel.” [102†]

³¹“Jubah si nutupi baju epod ndai ibahan i bas wool biru nari.

³²Bahan pe sada lubang ingan nucukken takal, janah pinggir lubang enda ndai ilapisi alu uis si itenun rapat, gelah ola banci merigat.

³³[33-34] I bas tepina si arah teruh tamaken buah galiman si ibahan i bas wool biru, ungu, ras megara. I bas kelang-kelangna e, itamaken pe giring-giring emas.

³⁵Jubah enda la banci la ipake Harun adi ia ndahiken dahin imam. Adi reh ia ku lebe-lebengKu i bas Ingan si Badia ntah tupung ia nadingken ingan e, sora giring-giring e la banci la terbegi, e maka ia la mate.

³⁶Bahan sada perhiasen i bas emas murni nari, jenari ukirlah i je kata-kata enda, ‘Ipersembahken man TUHAN saja.’

³⁷Iketkenlah e arah lebe bulang-bulang e alu benang biru.

³⁸La banci la ipake Harun enda i bas perdempakenna, gelah Aku, TUHANndu, ngaloken kerina persembahen si ibereken bangsa Israel man bangKu, aminna gia lit ibahan kalak kesalahen-kesalahen i bas ia mpersembahkenca e.

³⁹Tenunlah baju Harun i bas lenen halus nari ras bahanlah sada bulang-bulangna i bas lenen halus nari ras bage pe sada selempang si ipejile alu sulamen.

⁴⁰Bahanlah baju, selempang, ras bulang-bulang man anak-anak Harun, gelah teridah ia mulia ras mejile.

⁴¹Pakekenlah paken-paken enda man seninandu Harun ras anak-anakna. Kenca bage tangkuhken ia janah endesken ia man bangKu alu namaken minak saitun ku ia kerina, gelah banci ia jadi imam ndahiken dahinKu.

⁴²Bahan man bana seluar gendek i bas lenen nari mulai i bas awakna seh ku pahana, guna nutupi bagin badanna si la arus teridah.

⁴³Si enda arus ipake Harun ras anak-anakna adi lawes ia ku Kemah Perjumpan ntah pe adi ideherina batar-batar ndahiken dahin imam i bas Ingan si Badia, gelah ola ia ibunuh erkite-kiteken teridah bagin badanna si la patut teridah. Enda me peraturen si tetap man Harun ras kesusurenna.”