Read Batak Karo KELUAREN 29 Bible Online

KELUAREN 29 - Batak Karo bible

KELUAREN 29

¹“Bagenda me arus ibahanndu man Harun ras anak-anakna guna ngendesken ia man bangKu jadi imam ndahiken dahinKu. Buatlah sada jenggi lembu si nguda denga ras dua bajar biri-biri si la lit man pandangen sitik pe.

²Buat tepung gandum si mejilena kal jenari bahan roti si la tama ragi; deba icampur ras minak saitun, deba la erminak, janah deba ka ibahan bagi biskuit si icalehken i bas minak.

³Tamaken roti kerina i bas sada raga jenari persembahken man bangKu ras jenggi lembu bage pe bajar biri-biri si dua e.

⁴Babai Harun ras anak-anakna ku dalan bengket ku Kemah Perjumpan, jenari suruh ia ridi gelah ia bersih rikutken peraturen agama.

⁵Kenca bage pakekenlah man Harun paken imam, e me: baju epod, jubah i babo baju epod e, tutup tenten, ras gendit.

⁶Pakeken bulang-bulang man bana jenari iketken i bas bulang-bulang e tanda si badia si iukir, ‘Ipersembahken man TUHAN saja.’

⁷E maka buat minak saitun, tangkuhken ia alu ngamburken minak e ku takalna.

⁸Dilo anak-anakna si dilaki jenari pakeken bajuna man bana.

⁹Pakeken selempang i bas awakna janah tamaken bulang-bulang i bas takalna. Bagenda me carana kam nangkuhken Harun ras anak-anakna. Ia ras kerina kesusurenna arus ndahiken dahinKu selaku imam seh rasa lalap.

¹⁰Baba jenggi lembu e ku lebe-lebe Kemah Perjumpan jenari suruh Harun ras anak-anakna namaken tanna i babo takal lembu e.

¹¹Geleh lah jenggi lembu e i adep-adepenKu i bas dalan bengket ku bas Kemah e.

¹²Buat deba dareh lembu e jenari sapuken ku tanduk batar-batar alu jari-jarindu. Iba-iba dareh ndai amburken ku teruh batar-batar e.

¹³Kenca bage, buatlah kerina lemak si lit i bas beltek lembu e, bagin atena si mehulina, ginjalna duana rikut ras lemak si leket i je, jenari tutung kerina i babo batar-batar jadi sada persembahen man bangKu.

¹⁴Tapi tutung lah daging lembu e, kulitna, ras tuka-tukana i darat ingan erkemah e. Enda me sada persembahen guna nasapken dosa imam-imam.

¹⁵Buatlah sada bajar biri-biri si dua ndai jenari suruh Harun ras anak-anakna namaken tanna i babo takal biri-biri e.

¹⁶Geleh biri-biri e, buat darehna, jenari amburken ku sekelewet batar-batar.

¹⁷Keret-keret biri-biri e. Burihi kerina isi beltekna ras pahana si arah pudi, jenari tamaken i babo takalna ras keret-keret si debanna.

¹⁸Tutung kerina biri-biri e i babo batar-batar jadi sada persembahen pangan. Bau persembahen enda merim Kuakap. [103†]

¹⁹Buat bajar biri-biri si sada nari ndai e me guna penangkuhen, jenari suruh Harun ras anak-anakna ngamparken tanna i babo takal biri-biri e.

²⁰Geleh biri-biri e, janah buat deba darehna, e maka sapuken ku cuping Harun si kemuhen ras anak-anakna, ku kambal-kambal tanna si kemuhen bage pe kambal-kambal nahena si kemuhen. Amburken iba-iba dareh ndai kerina i sekelewet batar-batar e.

²¹Buat sitik dareh si lit i babo batar-batar, ras minak penangkuhen, jenari pirpirken ku Harun ras pakenna bage pe ku anak-anakna ras pakenna. Alu bage Harun ras anak-anakna bage pe pakenna enggo iendesken man bangKu.

²²Sayatlah lemak bajar biri-biri e, lemak ikurna, lemak sinutupi isi beltekna, bagin ate si mehulina, duana ginjalna rikutken lemak si leket i je, ras pahana si kemuhen.

²³Buat sada i bas tep-tep macam roti i bas raga roti si enggo ipersembahenken man bangKu, e me: sada roti si icampur ras minak, sada si la icampur ras sada biskuit.

²⁴Tamaken kerina pangan enda ku bas tan Harun ras anak-anakna, jenari suruh ia ngendesken si enda kerina man bangKu jadi sada persembahen khusus.

²⁵Kenca bage buat si e kerina i bas ia nari, e maka tutung i babo batar-batar, i babo persembahen tutungen ndai, jadi sada persembahen pangan man bangKu. Bau persembahen enda merim Kuakap.

²⁶Buat tenten bajar biri-biri ndai jenari endesken man bangKu jadi sada persembahen khusus. Si enda jadi sikerajangenndu.

²⁷Tupung sekalak imam itangkuhken, tenten ras paha bajar biri-biri si ipake i bas penangkuhen e, arus iendesken man bangKu jadi persembahen khusus, jenari iserapken man imam-imam.

²⁸Adi bangsangKu erbahan persembahen persadan, tenten ras paha asuh-asuhen si ipersembahken e jadi sikerajangen imam-imam; enda me keputusenKu si lanai banci iobah. Enda me pemere bangsa Israel man bangKu, TUHANndu.

²⁹Paken keimamen Harun arus iendesken man anak-anakna si dilaki kenca ia enggo mate, guna ipakena tupung ia itangkuhken.

³⁰Anak Harun si nggantiken ia jadi imam, si bengket ku bas Kemah Perjumpan ndahiken dahinKu i bas Ingan si Badia, arus make paken enda pitu wari dekahna.

³¹Buat daging bajar biri-biri si ipake i bas penangkuhen Harun ras anak-anakna ndai, jenari tanggerken i bas sada ingan si badia.

³²Kenca e suruh ipanna radu ras roti si tading denga i bas raga ndai i bas dalan bengket ku bas Kemah Perjumpan.

³³Arus pe ipanna kai si ipergunaken i bas acara persembahen pengalemi dosa tupung ia itangkuhken. Imam-imam ngenca banci man pangan enda, sabap badia kap e.

³⁴Adi lit denga daging ntah pe roti e langa ipan seh pepagina, arus maka itutung kerina; la banci ipan, sabap badia kap e.

³⁵Lakokenlah penangkuhen Harun ras anak-anakna pitu wari dekahna, janah ola sitik pe nimpang i bas kai si enggo Kuperentahken man bandu.

³⁶Tep-tep wari la banci la ipersembahkenndu sada jenggi lembu, gelah dosa banci ialemi. Si enda erbahanca batar-batar e jadi bersih. Kenca bage minakilah batar-batar e alu minak saitun gelah jadi badia.

³⁷Bahanlah bagenda tep-tep wari seh pitu wari dekahna. Alu bage batar-batar e enggo badia tuhu-tuhu, janah adi ise gia ntah kai gia si ndadapsa la banci lang kena mara erkite-kiteken gegeh kebadian e.”

³⁸“I bas paksa si reh enda la banci la tetap ipersembahkenndu tep-tep wari i das batar-batar e dua anak biri-biri umur sada tahun.

³⁹Erpagi-pagi persembahken sada anak biri-biri, janah sada nari karaben.

⁴⁰Radu ras anak biri-biri si pemena, persembahken pe sada kilo tepung gandum si mejile icampur ras sada liter minak saitun. Amburken pe sada liter anggur jadi persembahen.

⁴¹Persembahken anak biri-biri si peduaken karabenna, janah radu ras si e, persembahken pe tepung, minak saitun ras anggur si seri buena ras si erpagi-pagi. Enda me sada persembahen pangan man bangKu, TUHANndu, janah bauna mereken keriahen man bangKu.

⁴²I bas paksa-paksa si reh enda, persembahen tutungen enda la banci la tetap ipersembahkenndu i adep-adepenKu i bas dalan bengket ku bas Kemah Perjumpan e. I je me Aku jumpa ras bangsangKu janah ngerana ras kam.

⁴³I bas ingan e me Aku jumpa ras bangsa Israel, janah sinalsal terang kerehenKu erbahanca ingan e jadi badia.

⁴⁴Aku pagi erbahanca Kemah ras batar-batar e jadi badia, janah Aku nerapkenca Harun ras anak-anakna ndahiken dahinKu jadi imam.

⁴⁵Ringan Aku i tengah-tengah bangsa Israel, janah Aku jadi Dibatana.

⁴⁶Ieteh bangsa e maka Aku e me TUHAN Dibata si maba ia ndarat i Mesir nari gelah Aku banci ringan i tengah-tengahna. Aku kap TUHAN, Dibatana.”