Read Batak Karo KELUAREN 30 Bible Online

KELUAREN 30 - Batak Karo bible

KELUAREN 30

¹“Bahanlah sada batar-batar i bas kayu jati nari ingan nutungi si merim-merim.

²Bentukna segi empat, gedangna ras belangna 45 sentimeter, janah ganjangna 90 sentimeter. Tandukna i bas sukina si empat, arus ersada ras batar-batar e.

³Lapisi lah alu emas murni bagin si arah das, empatna dingdingna bage pe tandukna, jenari pasang bingke emas kelewet.

⁴Bahan dua gelang emas ingan ngangkatsa, jenari leketken gelang e arah teruh bingke e dua dingding gelah banci i je itamaken lanja-lanjana guna ngangkatsa.

⁵Lanja-lanjana enda bahan i bas kayu jati nari, jenari lapisi alu emas.

⁶Tamakenlah batar-batar enda i darat kire-kire si gantung i lebe-lebe Peti Perpadanen e. I bas ingan e me Aku njumpai kam.

⁷Tep-tep erpagi-pagi asum Harun reh nikapken lampu e, arus itutungna barang tutungen si merim i babo batar-batar e.

⁸Karaben pe arus bage ibahanna asum isaganina lampu e. Persembahen tutungen si merim enda arus iterusken alu la erpeltep-peltep i bas kerina paksa-paksa si reh enda.

⁹Ola persembahken i babo batar-batar enda: rempah-rempah si ilarang, asuh-asuhen ntah, persembahen buah gandum; janah ola iamburken anggur persembahen ku je.

¹⁰Sekali setahun la banci la ilakoken Harun pembersihen batar-batar alu namaken dareh i bas tanduk batar-batar e. Dareh si itamaken ku je, e me dareh asuh-asuhen si ipersembahken guna pengalemi dosa. Si enda la banci la ibahan tep-tep tahun i bas kerina paksa-paksa si reh enda. Batar-batar enda arus badia tuhu-tuhu, man bangKu saja ngenca ipergunaken. Aku kap TUHAN.”

¹¹Nina TUHAN man Musa,

¹²“Adi ibahanndu sensus man bangsa Israel, tep-tep dilaki arus nggalar man bangKu tukur kesahna, gelah ola ia dat bahaya tupung ibahan sensus.

¹³Tep-tep kalak si bengket i bas sensus la banci la nggalar duit asa si enggo itentuken. Duit e arus igalarken man bangKu. [104†]

¹⁴Tep-tep kalak si isensus, e me tep-tep dilaki si umurna lebih dua puluh tahun, arus nggalar duit asa si enggo itentuken e.

¹⁵Asum nggalar tebusen kesah kalak bayak la banci lebih, bage pe kalak si mesera la banci kurang.

¹⁶Pepulung lah duit enda i bas bangsa Israel nari jenari pergunaken guna keperlun-keperlun Kemah Perjumpan. Cuke enda e me tukur kesahna, maka Kuinget engkawali ia.”

¹⁷Nina TUHAN man Musa,

¹⁸“Bahan sada baskom tembaga ras tapakna pe tembaga. Tamaken baskom e kelang-kelang Kemah ras batar-batar e, jenari isi alu lau. [105†]

¹⁹Harun ras anakna la banci la murihi tanna ras nahena alu lau e,

²⁰ope denga ia bengket ku bas Kemah ntah pe ndeheri batar-batar, guna mpersembahken persembahen pangan; alu bage la ia ibunuh.

²¹La banci la iburihina tanna ras nahena, gelah ola ia mate. Enda me sada peraturen si la banci la iikutkenna ras kesusurenna seh rasa lalap.”

²²Nina TUHAN man Musa, [106†]

²³“Buat rempah-rempah si mejilena, e me enem kilo mur kental, telu kilo kayu manis, telu kilo tebu si merim,

²⁴ras enem kilo kayu teja (kerina itimbang rikutken timbangen si enggo itentuken). Tambahken empat liter minak saitun,

²⁵jenari bahan lah minak penangkuhen si badia icampur bagi minak wangi.

²⁶Curcurken minak enda ndai ku Kemah Perjumpan, ku Peti Perpadanen,

²⁷ku meja ras kerina alat-alatna, ingan lampu ras alat-alatna, batar-batar ingan nutungi si merim-merim,

²⁸ku batar-batar ingan persembahen tutungen ras kerina alat-alatna, bage pe ku baskom ingan erburih ras tapakna gelah badia.

²⁹Endesken lah barang-barang enda ndai kerina alu cara si enda man bangKu, gelah badia tuhu-tuhu kerina, janah ise pe, ntah kai pe si ndadapsa la banci la kena mara erkite-kiteken gegeh kebadianna.

³⁰Kenca bage minakilah Harun ras anak-anakna lako nangkuhken ia jadi imam gelah idahikenna dahinKu.

³¹Kataken man bangsa Israel, nindu, ‘Minak penangkuhen si badia enda arus ipake guna dahin-dahinKu i bas kerina paksa-paksa si reh.

³²Minak e la banci icurcurken ku kerina kalak, janah la banci ipakendu campuren si bage erbahan minakndu. Enda badia, e maka la banci la ipebadiakenndu e.

³³Ise pe si erbahan minak si bage ntah pe makeken minak e man kalak si labo imam, ia lanai nari ikira bangsangKu.’ ”

³⁴Nina TUHAN man Musa, “Buatlah tep-tep erbage si seri beratna i bas rempah-rempah si merim si tersinget i jenda: duruh damar, kulit kerang, duruh pinus, ras kumenen murni.

³⁵Pakelah enda kerina erbahan campuren si merim-merim, icampur bagi erbahan minak wangi. Jenari tambahken ku je sira gelah banci tetap bersih ras badia.

³⁶Kenca bage tutu lah sada bagin jadi tepung halus, baba ku Kemah Perjumpan jenari pirpirken i lebe-lebe Peti Perpadanen. Jaga maka rempah tutungen si merim enda tetap badia.

³⁷Ola pake pulungen si seri guna erbahan minak wangi man pakenndu jine. Jagalah maka barang enda sada barang si badia si ikhususken man bangKu saja ngenca.

³⁸Ise pe si erbahan si merim-merim man pakenna si seri ras si enda, ia lanai nari ikira i bas bangsangKu.”