Read Batak Karo KELUAREN 31 Bible Online

KELUAREN 31 - Batak Karo bible

KELUAREN 31

¹Nina TUHAN man Musa,

²“Enggo Kupilih Besalel, anak Uri kempu Hur, i bas suku Juda nari,

³janah enggo Kudemi ia alu kesahKu. Enggo Kubereken man bana pengertin, kebeluhen ras kengasupen erbahan barang-barang si mejile:

⁴ngerencanaken ras erbahan potongen si mejile i bas emas pirak ras tembaga nari;

⁵nggarut permata ras namakenca i bas bingkena; erbahan ukir-ukiren kayu ras erbage-bage dahin erbahan barang-barang si deban si mejile.

⁶Bage pe enggo Kupilih Oholiap anak Ahisamah, i bas suku Dan nari guna nampati Besalel. Man tukang-tukang si deban pe enggo Kubereken kengasupen si mbelin, gelah banci ibahanna kerina si enggo Kuperentahken e me:

⁷Kemah Perjumpan, Peti Perpadanen ras tutupna, kerina perabot-perabot Kemah e,

⁸meja ras alat-alatna, nahe lampu i bas emas murni nari ras kerina alat-alatna, batar-batar ingan nutungi si merim-merim,

⁹batar-batar guna persembahen tutungen ras kerina alat-alatna, baskom ras tapakna ingan lau pemurihi tan ras nahe,

¹⁰paken imam si lanai kal lang-lang jilena si man paken Harun ras anak-anakna tupung ndahiken dahin imam,

¹¹minak penangkuhen, ras barang tutungen si merim guna ingan si badia. I bas erbahan barang-barang si enda kerina, la banci sitik pe nimpang i bas kai si enggo Kupedahken man bandu.”

¹² [12-13] Isuruh TUHAN gelah ikataken Musa man bangsa Israel, nina, “Inget wari Sabat, wari si enggo Kutetapken jadi wari pengadi-ngadin, sabap e me sada tanda si encidahken i bas kerina paksa-paksa si reh maka Aku, TUHANndu, enggo erbahan kam jadi bangsangKu.

¹⁴Arus ingetndu wari pengadi-ngadin e, sabap badia e. Ise si la ngingetsa, si erdahin i bas wari e, la banci la ibunuh. [107†]

¹⁵Enem wari ibereken man bandu guna ndahiken dahindu, tapi wari si pepituken, e me wari pengadi-ngadin si badia si ikhususken man bangKu. Ise si erdahin i bas wari e la banci la ibunuh.

¹⁶Bangsa Israel la banci la tetap nginget wari enda jadi sada tanda perpadanenKu ras bangsa e.

¹⁷Wari Sabat, e me sada peringet-ingeten si tetap i bas bangsa Israel ras Aku, sabap Aku, TUHAN enggo erbahan langit ras doni i bas enem wari, janah i bas wari si pepituken ngadi Aku erdahin guna pekesahken.” [108†]

¹⁸Kenca enggo dung Dibata ngerana man Musa i das Deleng Sinai, iberekenNa man bana papan batu si dua e, i je Dibata jine enggo nuratken pedah-pedah e.