Read Batak Karo KELUAREN 32 Bible Online

KELUAREN 32 - Batak Karo bible

KELUAREN 32

¹Sanga iidah bangsa Israel maka Musa lalap la nusur i das Deleng Sinai nari, tapi ndekah ia tading i je, iulung-ulungna Harun janah nina, “La sieteh ntah kai enggo jadi man Musa, kalak si minpin kita ndarat i Mesir nari; e maka bahanlah sada dibata si man sembahen, guna minpin kita.” [109†]

²Nina Harun man bana kerina, “Tangtangilah anting-anting emas si ipake ndeharandu, anak-anakndu si dilaki ras si diberu, jenari bereken man bangku.”

³E maka kerina bangsa Israel nangtangi anting-antingna jenari iberekenna man Harun.

⁴Ibuat Harun kerina anting-anting ndai, ileburna, jenari ituang emas ndai ku sada cetaken, jenari itepana sada lembu emas. Nina bangsa ndai, “O Israel, enda me dibatanta si mabai kita ndarat i Mesir nari!” [110†]

⁵Kenca idah Harun si e ipajekkenna sada batar-batar i lebe-lebe lembu emas ndai, jenari imomokenna nina, “Pagi ibahan sada pesta guna kemulian TUHAN.”

⁶Pepagina lampas, ibaba kalak ndai asuh-asuhen man tutungen jadi persembahen, ras si debanna si man pangan jadi persembahen persadan. Kundul ia kerina man ras minem-minem; dungna enggo sambar jadi sada pesta mabuk-mabuk, janah perlagu langkah dilaki ras diberu lanai erpepah. [111†]

⁷Nina TUHAN man Musa, “Pedas kam mulih ku teruh, sabap bangsandu si enggo ibabandu ndarat i Mesir nari enggo erdosa janah nulak Aku.

⁸Itadingkenna dalan si enggo Kupedahken gelah ikutkenna; ibahanna sada lembu emas tuangen janah enggo isembahna ras ibahanna persembahenna ku je. Ikatakenna e si mabai ia ndarat i Mesir nari.

⁹Enggo Kueteh kuga kengna bangsa enda.

¹⁰Genduari, ola cubaken ngambati Aku. Nembeh kal ateKu man bana kerina, janah Kukernepken ateKu. Kenca bage, Kubahan ateKu kam ras kesusurenndu jadi sada bangsa si mbelin.”

¹¹Tapi meseksek ipindoken Musa man TUHAN, Dibatana nina, “TUHAN, ngkai maka bage rawanNdu man bangsaNdu, si enggo iselamatkenNdu i Mesir nari alu gegeh ras kuasa si mbelin? [112†]

¹²Adi ikernepkenNdu bangsa e, tentu ikataken bangsa Mesir me maka Kam enggo maba ia ndarat i Mesir nari alu tujun munuhsa i deleng-deleng enda janah ngeradaskenca tuhu-tuhu i bas doni enda nari. Ola min Kam merawa, ola min ukurNdu bage janah ola min sehken cilaka enda man bangsaNdu.

¹³Inget min suruh-suruhenNdu Abraham, Isak, ras Jakup. Ingetlah padan si enggo ibahanNdu ras ia maka iberekenNdu kesusurenna, teremna bagi buena bintang i langit, janah mereken man kesusurenna kerina taneh si enggo ipadankenNdu jadi sikerajangenna seh rasa lalap.” [113†]

¹⁴E maka erkusur ukur TUHAN janah la isehkenNa cilaka si enggo isurakenNa man bangsaNa.

¹⁵Nusur mulihken Musa i das deleng ndai nari, ibabana papan batu si dua e i ja tersurat pedah TUHAN i bas dua mbelahna.

¹⁶Dibata jine si erbahan papan batu e janah Ia ka pe si nuratken pedah e i je.

¹⁷Ibegi Josua sora bangsa Israel ersurak-surak jenari ikatakenna man Musa nina, “Kubegi sora kalak erperang i bas ingan erkemah.”

¹⁸Nina Musa, “Sora e labo sora kalak ersurak erkite-kiteken kemenangen ntah pe sora kalak nderkuh erkiteken talu erperang; sora e, e me kap sora kalak rende.”

¹⁹Kenca Musa enggo ndeher ku ingan erkemah e janah enggo teridah man bana lembu e dingen kalak ndai landek-landek, merawa kal ia. I bas nahe deleng e ibenterkenna papan batu si dua si ibabana ndai e maka pecah.

²⁰Ibuatna lembu si ibahan kalak ndai, ileburna, igilingna jadi tepung halus, jenari icampurna ras lau. Kenca bage isuruhna bangsa Israel minemsa.

²¹Ikatakenna man Harun nina, “Kai nge ibahan bangsa enda man bandu, maka ibabaindu ia erbahan dosa si bage belinna?”

²²Nina Harun njabapsa, “Ola kam merawa man bangku; itehndu jine nge gegehna bangsa enda erbahan si jahat.

²³Ikatakenna man bangku, ‘La sieteh ntah kai enggo jadi man Musa, si maba kita ndarat i Mesir nari, e maka bahanlah sada dibata si minpin kita.’

²⁴Kusuruh ia mereken perhiasen-perhiasen emasna man bangku, e maka kalak si lit i bas ia, minter itangtangina jenari iberekenna man bangku. Kubenterken perhiasen-perhiasen e ku bas api, jenari jadi me lembu e!”

²⁵Idah Musa maka enggo ipelepas Harun bangsa Israel rate-ate seh maka megombang imbang-imbangna man bana.

²⁶E maka tedis Musa i bas gerbang ingan bangsa Israel erkemah, janah nina alu sora megang, “Ise si arah TUHAN reh ku jenda!” E maka kerina suku Lewi pulung sekelewet Musa.

²⁷Jenari nina Musa man bana kerina, “TUHAN, Dibata Israel mereken perentah man bandu sekalak-sekalak gelah ibuatndu pedangndu, jenari laweslah arah tengah-tengah ingan erkemah enda i bas gerbang enda nari ku gerbang si deban guna munuh senina-seninandu, teman-temanndu, ras tetangga-tetanggandu.”

²⁸Minter ipatuhi suku Lewi perentah e, jenari ibunuhna kira-kira 3000 kalak i bas wari e.

²⁹Nina Musa man suku Lewi, “Sendah enggo itangkuhkenndu dirindu jadi imam-imam ndahiken dahin TUHAN alu munuh anak-anakndu, senina-seninandu, e maka TUHAN enggo mereken pasu-pasuNa man bandu.”

³⁰Pepagina nina Musa man bangsa Israel, “Enggo kam erbahan dosa si mbelin. Tapi genduari lawes ka aku mulihken ku das deleng ndahi TUHAN; mbera-mbera banci dat aku pengalemi dosa man bandu.”

³¹Kenca bage mulih Musa ndahi TUHAN, janah nina, “Bangsa enda enggo erbahan dosa si mbelin. Enggo ibahanna sada gana-gana emas jenari ersembah ia ku je.

³²Ngarap aku gelah ialemiNdu dosana; tapi adi la Kam nggit, sasapkenlah gelarku i bas kitap inganNdu nuratken gelar-gelar bangsaNdu.” [114†]

³³Erjabap TUHAN nina, “Kalak si enggo erdosa man bangKu nge si Kusasapken gelarna i bas kitapKu nari.

³⁴Genduari laweslah, babailah bangsa e ku ingan si enggo Kukataken man bandu. Ingetlah maka malekatKu pagi si nuduhken dalan man bandu, tapi paksana la banci la seh maka Kuukum bangsa enda erkite-kiteken dosana.”

³⁵E maka ipesusur TUHAN sada penakit ku bangsa e, sabap enggo ipaksana Harun erbahan lembu emas e.