Read Batak Karo KELUAREN 33 Bible Online

KELUAREN 33 - Batak Karo bible

KELUAREN 33

¹Nina TUHAN man Musa, “Tadingkenlah ingan enda. Berkatlah kam ras bangsa si ibabandu ndarat i Mesir nari, jenari laweslah ku taneh si enggo Kupadanken man Abraham, Isak ras Jakup ras man kesusurenna. [115†]

²Kusuruh sekalak malekat nuduhken dalan man bandu, janah Kupelawes pagi bangsa Kanaan, bangsa Amori, bangsa Heti, bangsa Peris, bangsa Hewi, ras bangsa Jebusi.

³Kam berkat ku taneh si mehuli dingen mehumur. Tapi Aku jine la ikut ras kam, maka ola kam Kukernepken i tengah dalan sabap kam bangsa si mekeng kuduk.”

⁴ [4-5] Isuruh TUHAN Musa ngatakenca man bangsa e, “Kam bangsa si mekeng tuhu-tuhu. Adi Aku erdalan ras kam kentisik sajalah gia la banci la kernep kam Kubahan. Genduari tangtangilah kerina perhiasenndu, jenari Aku netapkenca kuga ibahan man bandu.” Kenca ibegi bangsa e kata TUHAN enda, ceda atena, e maka lanai ia make perhiasen.

⁶E maka kenca nadingken Deleng Sinai, bangsa Israel lanai nari make perhiasen.

⁷Adi ipajekken bangsa Israel kenca kemahna, minter ka ibuat Musa Kemah si Badia e, jenari ipajekkenna ndauh sitik i bas ingan erkemah e nari. Kemah e igelari Kemah Perjumpan ras TUHAN, janah ise pe si atena nungkun man TUHAN, lawes ia ku je.

⁸Katawari pe adi Musa lawes ku je, bangsa Israel tedis i bas pintun kemahna janah ipernehenna Musa seh ia bengket ku bas Kemah e.

⁹Kenca Musa bengket ku bas, tiang embun e minter nusur ku teruh, jenari ngadi i bas pintun Kemah, janah TUHAN ngerana man Musa i bas embun nari.

¹⁰Enggo kenca idah bangsa Israel tiang embun e i bas pintun Kemah, minter erjimpuh ia kerina.

¹¹TUHAN ngerana petala-tala ras Musa, desken sekalak jelma ngerana ras temanna. Kenca bage mulihken Musa ku ingan erkemah. Tapi anak perana si jadi suruh-suruhenna e me Josua anak Nun, tetap tading i bas Kemah e.

¹²Nina Musa man TUHAN, “Payo tuhu maka enggo ikatakenNdu man bangku maka ibabaiNdu bangsa enda ku taneh si ipadankenNdu, tapi la ikatakenNdu man bangku ise pagi si isuruhNdu ras aku. Enggo ikatakenNdu maka itandaiNdu tuhu-tuhu aku janah ngena ateNdu man bangku.

¹³Genduari, adi bage kin, turikenlah man bangku sura-suraNdu, gelah banci Kam kuelai, janah tetap kubahan meriah ukurNdu. Inget ka pe maka enggo ipilihNdu bangsa enda jadi sikerajangenNdu.”

¹⁴Nina TUHAN, “Aku ras kam, janah Aku mereken kemenangen man bandu.”

¹⁵Erjabap ka Musa nina, “Adi la Kam ras kami lawes, la padah isuruhNdu kami nadingken ingan enda.

¹⁶Uga ningkalak metehsa maka ngena ateNdu man bangsaNdu ras man bangku adi labo Kam ikut ras kami lawes? Adi Kam tetap ras kami, i je nge maka teridah kami lain ras bangsa si deban i bas doni enda.”

¹⁷Nina TUHAN man Musa, “Bagi si ipindondu, bage me Kubahan sabap Kutandai kam tuhu-tuhu janah ngena ateKu kam.”

¹⁸Kenca bage ibahan Musa pemindonna nina, “Mindo aku man baNdu gelah icidahkenNdu man bangku sinalsal terang kemulianNdu.”

¹⁹Nina TUHAN njabapsa, “Kerina kiniulinKu banci Kupementas arah lebendu, janah i lebe-lebendu Kukataken gelarKu si badia. Aku kap TUHAN, janah Kucidahken lias ate ras perkuah ateKu man kerina kalak si enggo Kupilih. [116†]

²⁰La Kubere idahndu ayongKu; sabap ise pe la ngasup ngidah ayongKu, tetap nggeluh.

²¹Enda kap sada ingan deherKu i ja banci kam tedis i das sada batu.

²²Adi mentas kari sinalsal terang kemulianKu, Kutamaken kam ku bas sada lubang i bas batu e, jenari Kututupi kam alu tanKu seh Aku enggo lepas.

²³Kenca bage Kuagui tanKu gelah banci idahndu gurungKu, tapi labo ayongKu.”