Read Batak Karo KELUAREN 35 Bible Online

KELUAREN 35 - Batak Karo bible

KELUAREN 35

¹Ipepulung Musa kerina bangsa Israel jenari ikatakenna man bana nina, “Enda me si enggo ipedahken TUHAN gelah idalinkenndu.” Nina TUHAN,

²‘Enem wari banci kam ndahiken dahinndu, tapi wari si pepituken arus ipebadiaken. Wari e, wari Sabat si ipersembahken bangKu, TUHANndu. Ise si erdahin i bas wari e, aminna kai gia idahna, la banci la ibunuh. [128†]

³Api la banci ipegarandu i bas rumahndu i bas wari Sabat e.’

⁴Ikataken Musa man kerina bangsa Israel nina, “Enda me si enggo ipedahken TUHAN:

⁵Bahan lah sada persembahen man TUHAN. Tep-tep kalak si atena nehken persembahen, ibabana lah persembahenna emas, pirak ntah pe tembaga;

⁶lenen halus, wool biru, ungu, ras megara; uis si ibahan i bas mbulu kambing nari;

⁷kulit bajar biri-biri si icelup megara; kulit halus, kayu jati;

⁸minak guna lampu; rempah-rempah guna erbahan minak penangkuhen ras man barang tutungen si merim;

⁹batu permata delima ras batu permata si debanna si man tamanken i bas baju epod man paken Imam si Mbelin ras i bas tutup tentenna.”

¹⁰“Kerina tukang si beluh i bas kam arus reh erbahan asa kai si iperentahken TUHAN:

¹¹Kemah e, tarumna ras tutup tarumna si arah darat, kancingna ras papanna, belotina si berteng, tiang-tiangna, ras palasna;

¹²Peti Perpadanen, lanja-lanjana, tutupna, ras kire-kirena si jadi ampang-ampangna,

¹³meja, lanja-lanjana, ras kerina alat-alatna; roti si man persembahenken man Dibata,

¹⁴nahe lampu gelah terang, ras kerina alat-alatna; lampu-lampu ras minakna;

¹⁵batar-batar ingan nutungi barang si merim-merim ras lanja-lanjana; minak penangkuhen; barang tutungen si merim; kire-kire guna dalan bengket ku bas Kemah e;

¹⁶batar-batar ingan nutung persembahen, ras jarikjak tembaga si ileketken ku je, lanja-lanjana, ras kerina alat-alatna; baskom, ingan lau pemurihi tan ras nahe bage pe ras tapakna;

¹⁷kire-kire kesain, tiang-tiangna ras alasna; kire-kire dalan bengket ku bas kesain e,

¹⁸pantuk-pantukna ras tinali guna Kemah e ras kesainna;

¹⁹ras paken-paken si lanai lang-lang jilena guna ipake imam-imam sanga ia ndahiken dahin imam i bas ingan si badia e me kap paken si badia man Imam Harun ras anak-anakna.”

²⁰Kerina bangsa Israel lawes.

²¹Ise saja si ersuruh ukurna, ibabana sada persembahen man TUHAN guna erbahan Kemah Perjumpan. Ibabana pe asa kai si iperluken guna ersembah ras si iperluken guna erbahan paken imam.

²²Ise si nggit, subuk dilaki ntah diberu, ibabana kancing perhiasen, anting-anting, cincin, bura ras erbage perhiasen emas, janah kerina si e iendeskenna man TUHAN.

²³Kalak si lit lenen halusna, wool biru, ungu, megara; uis si ibahan i bas mbulu kambing nari; kulit bajar biri-biri si icelup megara; ntah kulit halus, ibabana si e.

²⁴Kerina si ngasup mereken sumbangen pirak ntah pe tembaga, ibabana jadi persembahenna man TUHAN, janah asa kai lit kayu jatina si banci ipake i bas bagin si apai gia i bas dahin e, ibabana e.

²⁵Kerina diberu si beluh ertenun maba benang lenen halus, benang ras benang wool biru, ungu, ras megara, si enggo ibahanna.

²⁶Ibahanna ka pe benang i bas mbulu kambing nari.

²⁷Peminpin-peminpin bangsa e maba batu permata delima ras batu-batu permata si deban si itamaken i bas baju epod, paken imam ras tutup tentenna,

²⁸bage pe rempah-rempah ras minak guna lampu-lampu, guna minak penangkuhen, ras man barang tutungen si merim.

²⁹Kerina bangsa Israel si nggit maba persembahenna man TUHAN alu ukur meriah guna dahin si enggo iperentahkenNa man Musa.

³⁰Nina Musa man bangsa Israel, “TUHAN enggo milih Besalel, anak Uri, kempu Hur i bas suku Juda nari.

³¹Ia enggo idemi Dibata alu kesahNa, janah enggo iberekenNa man bana kepentaren, kengasupen, ras pengertin erbahan kerina barang-barang si mejilena,

³²guna ngerencanaken potongen barang si mejile, jenari erbahanca i bas emas, pirak ras tembaga nari;

³³erbahan permata-permata ras namakenca i bas bingkena; erbahan ukir-ukiren kayu, ras erbage-bage dahin si deban, erbahan barang-barang si mejilena.

³⁴Man Besalel ras man Oholiap anak Ahisamah, i bas merga Dan nari, enggo ibereken TUHAN kengasupen ngajarken kebeluhenna ertukang man kalak si deban.

³⁵Man bana duana enggo ibereken TUHAN pemeteh i bas erbage-bage dahin jadi tukang ukir, ras tukang tenun si ngasup erbahan lenen halus; wool biru, ungu, ras megara; ras uis si deban. Ia ngasup erbahan kai-kai pe janah pentar ka pe ngerencanaken potongen barang si mejile.