Read Batak Karo KELUAREN 36 Bible Online

KELUAREN 36 - Batak Karo bible

KELUAREN 36

¹Besalel, Oholiap, ras kerina tukang-tukang si enggo ibereken TUHAN kebeluhen ras kepentaren, si meteh kuga erbahanca asa kai si iperluken i bas majekken Kemah e, arus ndahiken kerinana sue ras si enggo iperentahken TUHAN.”

²Kenca bage idilo Musa Besalel, Oholiap, ras kerina kalak si beluh si enggo ibereken TUHAN kengasupen ras si nggit nampati, jenari isuruh Musa ia kerina menaken dahin e.

³I bas Musa nari ialoken tukang-tukang e kerina persembahen si enggo ibaba bangsa Israel guna majekken Kemah si Badia e. Tapi bangsa Israel terus maba persembahenna man Musa tep-tep erpagi-pagi.

⁴[4-5] E maka tukang-tukang si beluh si ndahiken dahin e lawes ngelaporkenca man Musa nina, “Barang si itaruhken kalak si nterem enggo lebih asa si iperluken i bas dahin si man bahanen bagi si enggo iperentahken TUHAN.”

⁶Perban e isuruh Musa gelah imomoken ku kerina ingan erkemah gelah olanai ise pe mereken sumbangenna guna Kemah si Badia e; e maka lanai ka ibaba bangsa Israel tole.

⁷Kai si enggo itaruhken ku je lebih asa cukup guna ndungi dahin e kerina.

⁸Tukang si beluhna kal i bas kalak si erdahin e, ibereken tugas erbahan Kemah Perjumpan. Kemah e ibahanna i bas sepuluh lambar lenen halus nari, si itenun ras wool biru, ungu, ras megara, jenari isulam alu gambar mahluk si erkabeng.

⁹Tep-tep lambar seri ukurenna, gedangna sepuluh dua meter, belangna dua meter.

¹⁰Lima i bas si e nari ijarumina jadi sada bagin, janah bage ka pe ibahanna si lima nari.

¹¹I bas tep-tep bagin si dua ndai ibahanna lubang kancingna i bas uis biru nari i bas tepi uis si arah darat.

¹²I bas lambar si pemena itamakenna lima puluh lubang kancing i bas pasangen si pemena, jenari lima puluh lubang si cocok ras si e i bas lambar si perpudina kal i bas pasangen si peduaken.

¹³Ibahanna lima puluh kancing emas guna pedemu si dua bagin e jadi sada.

¹⁴Kenca bage ibahanna tarum Kemah e i bas sepuluh sada lambar uis nari si ibahan i bas mbulu kambing nari.

¹⁵Kerina e ibahanna seri ukurenna, gedangna supulu telu meter, belangna dua meter.

¹⁶Lima i bas si e nari ijarumina jadi sada, janah si enem nari jadi sada ka.

¹⁷Itamakenna lima puluh lubang kancing i tepi lambar si perpudina kal i bas pasangen si pemena janah lima puluh lubang kancing ka i tepi bagin si peduaken.

¹⁸Ibahanna lima puluh kancing tembaga guna mpersada si dua bagin e, gelah jadi sada tarum.

¹⁹Ibahanna dua tarum nari, sada i bas kulit bajar biri-biri nari si icelup megara janah sada nari i bas kulit halus nari, jadi tarumna si arah darat.

²⁰Ibahanna dingdingna pajek i bas kayu jati nari guna Kemah e.

²¹Tep-tep papan ganjangna empat meter janah belangna enem puluh enem sentimeter,

²²janah penna dua, gelah dingding e banci kerina ipersada. Kerina papan e lit penna.

²³Arah bagin Selatan ibahanna dua puluh lambar papan,

²⁴ras empat puluh alas pirak jadi alasna arah teruh, dua alas i teruh tep-tep papan guna ngeleketken pen si dua e.

²⁵Arah bagin Utara Kemah e ibahanna dua puluh lambar papan,

²⁶ras empat puluh alas pirak, dua arah teruh tep-tep papan.

²⁷Arah pudi Kemah e, ntah pe arah Barat, ibahanna enem papan,

²⁸ras dua papan i bas sukina.

²⁹Papan suki enda isambungken arah teruh janah ipersada terus ku das. Papan si dua si jadi sukina si dua e ibahan alu cara si enda.

³⁰E maka lit waluh papanna ras sepuluh enem alas pirak, dua i teruh tep-tep papan.

³¹Ibahanna sepululima beloti si berteng i bas kayu jati nari, lima guna sada dampar rangka Kemah e,

³²lima arah dingding samping, lima arah bagin Barat, ntah pe arah pudi.

³³Beloti si tengah si berteng e, itamaken i tengah-tengah papan e, ipeberteng i bas ujung Kemah e nari ku ujung si deban.

³⁴Ilapisina papan e alu emas janah itamakenna i je gelang emas jadi ingan leket beloti-beloti si berteng e, si ilapisi ka pe alu emas.

³⁵Ibahanna sada kire-kire i bas lenen halus nari, si itenun ras wool biru, ungu ras megara jenari isulam alu gambar-gambar mahluk si erkabeng.

³⁶Ibahanna empat tiang i bas kayu jati nari ingan kire-kire e sangket, ilapisina alu emas, jenari itamakenna pe sangketenna si ibahan i bas emas nari. Kenca bage ibahanna empat alas pirak ingan tiang-tiang e pajek.

³⁷Man dalan bengket ku bas Kemah e ibahanna sada kire-kire i bas lenen halus nari si itenun ras wool biru, ungu ras megara, jenari ihiasi alu sulamen.

³⁸Guna kire-kire enda ibahanna lima tiang ras sangketenna; ujung tiang ras tulan kire-kire e ilapisina alu emas, janah ibahanna lima alas tembaga guna tiang-tiang e.