Read Batak Karo KELUAREN 37 Bible Online

KELUAREN 37 - Batak Karo bible

KELUAREN 37

¹Besalel erbahan Peti Perpadanen e i bas kayu jati nari, gedangna 110 sentimeter, belangna 66 sentimeter, ras ganjangna 66 sentimeter.

²Jenari ilapisina arah bas rah arah darat alu emas murni, janah itamakenna bingke emas kelewet.

³Ibahanna empat gelang emas man ingan lanja-lanjana, jenari ileketkenna gelang e i bas nahena empatna, dua gelang sembelah.

⁴Ibahanna lanja-lanjana i bas kayu jati nari, ilapisina alu emas,

⁵jenari itamakenna arah lubang gelang e, sada sembelah.

⁶Ibahanna sada tutupna i bas emas murni nari, gedangna 110 sentimeter, belangna 66 sentimeter.

⁷Itepana dua mahluk si erkabeng i bas emas nari,

⁸sada i bas tep-tep ujung tutup peti e. Bage me ibahanna seh maka mahluk si erkabeng e ersada ras tutup peti ndai.

⁹Mahluk si erkabeng e duana si ala-alan, janah kabengna si ikirbangkenna nutupi peti e.

¹⁰Besalel erbahan meja i bas kayu jati nari, gedangna 88 sentimeter, belangna 44 sentimeter, ras ganjangna 66 sentimeter.

¹¹Ilapisina meja e alu emas murni, jenari ibahanna bingke emas kelewet.

¹²Ibahanna ka bingke kelewet, belangna 7,5 sentimeter, jenari itamakenna ukiren emas i bas bingkena e kerina.

¹³Ibahanna empat gelang emas man ingan lanja-lanjana jenari itamakenna i bas sukina si empat, petingtang ras nahe meja.

¹⁴Gelang ingan leket lanja-lanja guna ngangkat meja e itamaken deherken bingkena.

¹⁵Ibahanna lanja-lanjana e i bas kayu jati nari ilapisina alu emas.

¹⁶Ibahanna alat-alat guna meja e i bas emas murni nari: piring, cangkir, kendi ingan lau, ras mangkuk si ipake i bas mpersembahken anggur.

¹⁷Besalel erbahan nahe lampu i bas emas murni nari. Tapakna ras tangkena itepana i bas emas nari; bunga-bunga ukirenna, si langa terlak ras si enggo terlak, ersada ibahanna.

¹⁸Tupang nahe lampu e lit enem, telu arah kawes, telu arah kemuhen.

¹⁹Tep-tep tupang si enem e, lit ka telu bunga ukirenna, ibentuk bagi bunga ketapang si langa terlak ras si enggo terlak.

²⁰Tangke nahe lampu e lit empat bunga ukirenna, ibentuk bagi bunga ketapang si langa terlak ras si enggo terlak.

²¹I bas bena-bena tep-tep tupang si telu pasang e lit sada bunga si langa terlak.

²²Bungana si langa terlak, tupang-tupangna, ras nahe lampu e, itepa ersada kerina i bas emas nari.

²³Ibahanna pitu lampu guna nahe lampu e, janah ibahanna jepit-jepitna ras talamna i bas emas murni nari.

²⁴Ipakena telu puluh lima kilo emas murni erbahan nahe lampu e ras kerina alat-alatna.

²⁵Besalel erbahan sada batar-batar i bas kayu jati nari ingan nutungi si merim-merim. Bentukna empat suki, gedangna 45 sentimeter, belangna pe 45 sentimeter, janah ganjangna 90 sentimeter. Tandukna, i bas empatna, sukina, ersada ibahan ras batar-batar e.

²⁶Arah das ilapisina alu emas murni, bage pe dingdingna empatna ras tandukna, janah itamana ukiren emas kelewet.

²⁷Ibahanna dua gelang emas man ingan lanja-lanjana jenari ileketkenna arah teruh ukirenna e, duana arah samping, gelah banci i je leket lanja-lanjana guna ngangkatsa.

²⁸Ibahanna lanja-lanjana e i bas kayu jati nari jenari ilapisina alu emas.

²⁹Besalel pe erbahan minak penangkuhen si badia ras barang tutungen si merim murni, icampur bagi minak wangi. [129†]