Read Batak Karo KELUAREN 38 Bible Online

KELUAREN 38 - Batak Karo bible

KELUAREN 38

¹Guna persembahen tutungen, ibahanna sada batar-batar i bas kayu jati nari. Bentukna empat suki, gedangna 2,2 meter ras belangna 2,2 meter janah ganjangna 1,3 meter.

²Ibahan Besalel tandukna i babo sukina si empat, seh maka ersada ras batar-batar e. Kerina e ilapisina alu tembaga.

³Ibahanna pe kerina alat-alat guna batar-batar e, e me: belanga, sendok galang, mangkuk, garpu, ras talam ingan api. Kerina alat-alat enda ibahan i bas tembaga nari.

⁴Ibahanna sada jarikjak besi tembaga jenari itamakenna i teruh bingke batar-batar e, ganjangna setengah asa ganjang batar-batar.

⁵Ibahanna empat gelang ingan lanja-lanjana, janah itamakenna e i bas empatna suki batar-batar e.

⁶Ibahanna lanja-lanjana i bas kayu jati nari, ilapisina alu tembaga,

⁷jenari itamakenna lanja-lanjana e arah lubang e, sada sembelah. Batar-batar e ibahan i bas papan nari, janah kosong i tengah.

⁸Ibahan Besalel baskom tembaga ras tapakna i bas curmin diberu-diberu si erdahin i bas dalan bengket ku bas Kemah Perjumpan e. [130†]

⁹Guna Kemah Perjumpan e, ibahan Besalel sada bide i bas kire-kire lenen halus nari. Arah bagin Selatan gedang kire-kire e 44 meter,

¹⁰isangketken ku dua puluh tiang tembaga; ras alasna pe tembaga. Sangketenna ras si jadi tulanna ibahan i bas pirak nari.

¹¹Bide e seri ras si arah bagin Utara.

¹²Arah bagin Barat, kire-kire e gedangna dua puluh dua meter, isangketken ku sepuluh tiang ras sepuluh alasna rikutken sangketenna ras tulan kire-kire si ibahan i bas pirak nari kerina.

¹³Arah Timur, dalan bengket, belang bide e dua puluh dua meter ka nge.

¹⁴[14-15] Arah kawes ras kemuhen dalan bengket e lit kire-kire 6,6 meter gedangna, tiangna telu, janah alasna pe telu.

¹⁶Kerina kire-kire guna bide e ibahan i bas lenen halus nari.

¹⁷Alas tiang-tiang e kerina ibahan i bas tembaga nari, janah sangketenna, tulan kire-kire, ras lapis ujung tiang-tiang e ibahan i bas pirak nari. Kerina tiang-tiang i sekelewet bide e ihubungken alu galah pirak.

¹⁸Kire-kire guna dalan bengket ku bas bide e, ibahan i bas lenen halus nari, itenun ras wool biru, ungu ras megara, janah ihiasi alu sulamen. Gedang kire-kire e siwah meter ras ganjangna 2 meter, seri ras kire-kire si ipake guna bide e.

¹⁹Kire-kire e isangketken i bas empat tiang i babo empat alas tembaga. Sangketenna, lapis ujungna, ras tulan kire-kire e ibahan i bas pirak nari.

²⁰Kerina pantuk-pantuk Kemah e ras pantuk-pantuk bide i sekelewet ibahan i bas tembaga nari.

²¹Enda me gelar barang-barang besi si ipake i bas Kemah Perjumpan e. Ibas Kemah e me isimpan dua papan batu Sepuluh Pedah Dibata. Gelar barang-barang e isuruh Musa gelah isuratken, janah si nuratkenca e me kalak Lewi si erdahin i teruh pinpinen Itamar anak Imam Harun.

²²Besalel, anak Uri, kempu Hur, i bas suku Juda nari, erbahan asa kai si enggo iperentahken TUHAN.

²³Si nampati ia, Oholiap anak Ahisamah i bas suku Dan nari, e me sekalak tukang ukir, tukang si beluh erbahan potongen barang-barang, bage pe sekalak si beluh ertenun lenen halus ras wool biru, ungu, ras megara.

²⁴Kerina emas si enggo ipersembahken man TUHAN guna Kemah si Badia e beratna 1.000 kilo, itimbang rikutken timbangen si sah.

²⁵Pirak si ipepulung tupung sensus perpulungen e beratna lit 3.430 kilo, itimbang rikutken timbangen si sah. [131†]

²⁶Jumlah enda bali ras jumlah si igalari kerina kalak si isuratken tupung sensus e, sekalak-sekalak nggalar asa si enggo itetapken, itimbang rikutken timbangen si sah. Lit 603.550 dilaki si umurna 20 tahun ku das si idaftarken i bas sensus e. [132†]

²⁷I bas pirak e nari, 3.400 kilo ipake guna erbahan alas tiang Kemah si Badia ras kire-kire, si buena lit seratus tiang, e me telu puluh empat kilo tep-tep alas.

²⁸Pirak si tading telu puluh kilo e ibahan Besalel jadi tulan kire-kire, jadi sangketen i bas tiang-tiangna, janah man lapis ujungna.

²⁹Tembaga si ipersembahken man TUHAN buena 2.425 kilo.

³⁰Alu e ibahanna alas dalan bengket ku bas Kemah Perjumpan e, jadi batar-batar ras jarikjak besi tembagana, jadi kerina alat-alat batar-batar e,

³¹jadi alas bide Kemah e ras man dalan bengket ku bas bide e, ras jadi pantuk-pantuk Kemah e ras pantuk-pantuk bidena.