Read Batak Karo KELUAREN 39 Bible Online

KELUAREN 39 - Batak Karo bible

KELUAREN 39

¹Alu wool biru, ungu, ras megara ibahanna paken si lanai kal lang-lang jilena guna ipake imam tupung ia ndahiken dahinna i bas Ingan si Badia. Ibanna paken imam man Harun, bagi si enggo ipedahken TUHAN man Musa.

²Ibahanna epod i bas lenen halus; i bas wool biru, ungu, ras megara, bage pe benang emas nari.

³Itepana emas jadi lambar-lambar si menipes, jenari ipotong-potongna jadi benang, gelah itenun ras lenen halus e, bage pe ras wool biru, ungu, ras megara.

⁴Ibahanna dua tinali bas bara guna baju epod e, jenari ileketkenna arah sampingna, gelah banci iiket alu e.

⁵Gendit si itenun halus, bahan-bahanna seri, ijaitkenna ersada ras baju epod e, bagi si enggo ipedahken TUHAN man Musa.

⁶Isikapkenna batu permata delima, jenari iiketna alu bingke emas; i bas batu permata e iukirna alu mejile gelar-gelar anak Jakup si sepuluh dua.

⁷Itamakenna batu permata si enggo iukir e i bas tinali bas bara baju epod ndai jadi sada tanda bangsa Israel si sepuluh dua, payo kal bagi si enggo ipedahken TUHAN man Musa.

⁸Ibahanna sada tutup tenten, bahanna seri ras baju epod ndai, sulamenna pe seri.

⁹Bentukna segi empat janah erlipat dua, gedangna 22 sentimeter, belangna pe 22 sentimeter.

¹⁰Itamakenna i je empat baris batu permata si meherga. I bas baris si pemena: batu delima, topas ras baiduri sepah;

¹¹i bas baris si peduaken: sada batu samrud, sada batu nilam, ras sada berlian;

¹²i bas baris si peteluken: sada lasuardi, sada akik, ras sada amatis;

¹³janah i bas baris si peempatken: sada mutiara biru, sada delima, ras sada yasper. Kerina batu permata enda itamaken i bas bingke si ibahan i bas emas nari.

¹⁴I bas tep-tep batu permata enda lit i je iukir gelar sekalak i bas anak-anak Jakup, gelah jadi tanda suku Israel si sepuluh dua.

¹⁵Guna tutup tenten e, ibahanna rante i bas emas murni nari, ipiuh bagi tinali.

¹⁶Ibahanna dua pengiket i bas emas nari ras dua gelang emas, jenari gelang emas e ileketkenna ku tutup tenten e i bas sukina si arah datas.

¹⁷Rante emas si dua ndai ileketkenna ku gelang si dua ndai,

¹⁸jenari ujungna si dua nari ileketkenna ku pengiket si dua ndai janah alu cara si bagenda ileketkenna ka pe e arah lebe ku tinali baju epod ndai.

¹⁹Ibahanna dua gelang emas, jenari isangketkenna ku tutup tenten e, i bas sukina si arah teruh, i bas tepi si arah bas rembak ras baju epod e.

²⁰Ibahanna dua nari gelang emas, jenari isangketkenna ku ujung si arah teruh tinali bas bara baju epod e arah lebe, deherken kelimna datasen gendit si halus tenunenna e.

²¹Bagi si enggo ipedahken TUHAN man Musa, iiketna gelang tutup tenten e ras gelang epod ndai alu tinali biru, seh maka tutup tenten tetap arah datas tinali e janah la mosar.

²²Baju jubah si nutupi epod e ibahan i bas wool biru nari.

²³Lubang ingan nucukken takal ilapisi alu uis si itenun rapat gelah ola merigat.

²⁴[24-26] I bas tepi jubah e arah teruh itamakenna buah galiman si ibahan i bas lenen halus ras wool biru, ungu ras megara, iselang-selingi alu giring-giring emas, pas kal bagi si enggo iperentahken TUHAN man Musa.

²⁷Ibahanna baju Harun ras anak-anakna,

²⁸bage pe bulangna, tengkulukna, dingen seluar gendek i bas lenen nari,

²⁹janah selempang i bas lenen halus nari ras i bas wool biru, ungu ras megara, si ihiasi alu sulamen, bagi si enggo ipedahken TUHAN man Musa.

³⁰Ibahanna pe perhiasen i bas emas murni nari, jadi tanda jabaten khusus, janah iukirna i je kata-kata enda: “Iendesken man TUHAN saja”.

³¹Iiketkenna perhiasen e ku bulang e arah lebe alu tinali biru, sue ras si enggo ipedahken TUHAN man Musa.

³²Kerina dahin kerna Kemah Perjumpan e enggo dung. Kerinana ibahan bangsa Israel sue ras si enggo ipedahken TUHAN man Musa.

³³Iendeskenna man Musa Kemah e ras kerina alat-alatna, sangketenna, papanna, beloti-beloti si bertengna, ras alasna;

³⁴tarumna si ibahan i bas kulit bajar biri-biri icelup megara; tarumna si ibahan i bas kulit halus nari; kire-kirena si jadi ampang-ampang;

³⁵Peti Perpadanen si isin papan batu e, lanja-lanjana, ras tutupna;

³⁶meja ras kerina alat-alatna, ras roti si man persembahenken man Dibata;

³⁷nahe lampu si ibahan i bas emas murni nari, lampuna, kerina alat-alatna, ras minak guna lampu-lampu e;

³⁸batar-batar emas, minak penangkuhen; barang tutungen si merim, kire-kire guna dalan bengket ku bas Kemah e;

³⁹batar-batar tembaga ras jarikjak tembagana, lanja-lanjana, ras kerina alat-alatna; baskom ingan lau pemurihi ras tapakna,

⁴⁰kire-kire guna bidena ras tiang-tiangna bage pe alas tiang e; kire-kire guna dalan bengket ku bas bide e ras tinalina, pantuk-pantuk guna Kemah e; kerina alat-alat si man paken i bas Kemah e,

⁴¹ras paken si lanai kal lang-lang jilena si man paken imam i bas ingan si badia e, paken si badia man Imam Harun ras anak-anakna.

⁴²Kalak Israel enggo ndahiken kerina dahin e sue ras si enggo ipedahken TUHAN man Musa.

⁴³Ipepayo Musa kerinana janah idahna maka enggo ibahan kalak ndai kerinana sue ras si enggo ipedahken TUHAN. E maka ipasu-pasu Musa ia kerina.