Read Batak Karo KELUAREN 40 Bible Online

KELUAREN 40 - Batak Karo bible

KELUAREN 40

¹Ikataken TUHAN man Musa nina,

²“I bas wari si pemena bulan si pemena, pasanglah Kemah Perjumpan e.

³Tamaken ku bas Kemah e Peti Perpadanen si isin Sepuluh Pedah Dibata, jenari tamaken kire-kire i lebe-lebe Peti e.

⁴Baba meja e ku bas, jenari tamaken alat-alatna i babona. Bage pe baba nahe lampu e ku bas, jenari tamaken lampuna pe.

⁵Tamaken batar-batar emas ingan nutungi barang si merim e i lebe-lebe Peti Perpadanen e, jenari gantungken kire-kire e i bas dalan bengket ku bas Kemah e.

⁶Tamaken i lebe-lebe Kemah e batar-batar ingan nutung persembahen.

⁷Tamaken baskom ingan lau pemurihi i kelang-kelang Kemah e ras batar-batar ndai, jenari isi alu lau.

⁸Tamaken bidena ndai kelewet, janah gantungken kire-kire e i bas dalan bengket.

⁹Kenca bage endeskenlah Kemah e ras kerina alat-alatna man bangKu alu ncurcurken minak penangkuhen si badia e ku je, e maka enggo jadi badia Kemah e.

¹⁰Seterusna, endesken ka batar-batar e ras kerina alat-alatna alu ncurcurken minak ku je, e maka batar-batar e enggo jadi badia tuhu-tuhu.

¹¹Bage ka pe endesken lah baskom ingan lau pemurihi e ras tapakna alu cara si seri.

¹²Baba lah Harun ras anak-anakna ku dalan bengket ku bas Kemah e, kenca bage suruh gelah i basuhna bana rikutken aturen agama.

¹³Pakeken man Harun paken imam e, minaki ia, janah alu cara si enda ia itangkuhken, gelah banci erdahin jadi imam ndahiken dahin-dahinKu.

¹⁴Babalah anak-anakna jenari pakeken man bana baju e.

¹⁵Kenca bage minaki lah ia kerina, bali ras iminakindu bapana, gelah banci ia erdahin jadi imam ndahiken dahinKu. Alu bagenda ia enggo esah jadi imam terus ku bas wari-wari si reh.”

¹⁶Ibahan Musa me kerina bagi si enggo ipedahken TUHAN.

¹⁷E maka i bas wari si pemena bulan si pemena, i bas tahun si peduaken kenca itadingkenna Mesir, ipasang me Kemah Perjumpan e.

¹⁸Icibalken Musa alasna, ipasangna dingdingna, isangketkenna beloti-belotina si berteng, janah ipajekkenna tiang-tiangna.

¹⁹Ikimbangkenna tarum Kemah e jenari itamakenna lapisen tarum si arah darat, bagi si enggo ipedahken TUHAN.

²⁰Kenca bage ibuatna papan batu si dua ndai, jenari itamakenna ku bas Peti Perpadanen e. Itamakenna lanja-lanjana arah lubang gelang peti e, jenari itamakenna tutup peti e arah datas.

²¹Kenca bage itamakenna Peti e ku bas Kemah janah isangketkenna kire-kirena man dingdingna. Alu bage ikawalina Peti Perpadanen e, sue ras si enggo ipedahken TUHAN.

²²Itamakenna meja ndai ku bas Kemah e, i darat kire-kire e arah Utara,

²³jenari itamakenna roti i babona, si ipersembahken man TUHAN, sue ras si ipedahken TUHAN.

²⁴Itamakenna nahe lampu e ku bas Kemah e, arah Selatan, petingtang ras meja ndai.

²⁵I lebe-lebe TUHAN, ipegarana lampu e i je, sue ras si enggo ipedahken TUHAN.

²⁶Itamakenna batar-batar emas e ku bas Kemah, i lebe-lebe kire-kire e,

²⁷jenari itutungna si merim-merim, sue ras si ipedahken TUHAN.

²⁸Isangketkenna kire-kire e i bas dalan bengket ku bas Kemah e,

²⁹janah i lebe-lebe kire-kire e itamakenna batar-batar man ingan nutung persembahen tutungen. I babo batar-batar e ipersembahkenna persembahen tutungen ras persembahen pangan, sue ras si enggo ipedahken TUHAN.

³⁰Itamakenna baskom ingan lau pemurihi i kelang-kelang Kemah ras batar-batar e, jenari iisina alu lau.

³¹Musa, Harun ras anak-anakna si dilaki murihi tan ras nahena i je

³²tep-tep kali ia lawes ku bas Kemah ntah ku batar-batar e, sue ras si enggo ipedahken TUHAN.

³³Ipasang Musa bide i sekelewet Kemah ras batar-batar e, jenari isangketkenna kire-kire i bas dalan bengket ku bas kesain Kemah e. Alu bage enggo dung idahikenna kerina dahin e.

³⁴Kenca bage lit embun nutupi Kemah e janah sinalsal kemulian TUHAN ndemi Kemah e. [133†]

³⁵Erkiteken si e Musa la banci bengket ku bas Kemah e.

³⁶Adi embun e terangkat i bas Kemah e nari, ipindahken bangsa Israel inganna erkemah ku ingan si deban.

³⁷Kidekah embun e ringan denga i babo Kemah e, la ipindahken kalak e inganna erkemah.

³⁸Kidekah perdalanen bangsa e, adi suari banci iidahna embun kemulian TUHAN i babo Kemah e, janah adi berngi idahna api si gurlah.