Read Batak Karo KELUAREN 5 Bible Online

KELUAREN 5 - Batak Karo bible

KELUAREN 5

¹Kenca bage, lawes Musa ras Harun ndahi raja Mesir, janah nina, “Ikataken TUHAN, Dibata bangsa Israel man bandu, ‘Bere bangsangKu lawes, gelah banci ibahanna sada pesta i gurun pasir guna kemulianKu.’ ”

²Tapi nina raja, “Ise kin TUHAN e maka arus kubegiken kataNa, maka isuruhNa aku gelah kupelepas kalak Israel lawes? La kutandai TUHAN e; e maka la kubere kalak Israel lawes.”

³Nina Musa ras Harun njabapsa, “Dibata bangsa Heber enggo encidahken baNa man kami. Berelah kami erdalan ku gurun pasir si melungen telu wari dekahna mahan persembahen man TUHAN Dibata kami. Adi la ibahan kami bage, la banci lang ibunuhNa kami alu penakit ntah pe arah peperangen.”

⁴Nina raja man Musa ras Harun, “Kai atendu maka ibabai kam bangsa e nadingken dahinna? Suruh kerina budak-budak e erdahin mulihken!

⁵Ma iteh kam bangsandu enggo teremen asa bangsa Mesir i bas negeri enda? Genduari isuruhndu atendu ia ngadi erdahin?”

⁶E maka i bas wari e minter iperentahken raja man si merentah budak ras mandur-mandur nina,

⁷“Olanai bereken man bangsa e nggala guna erbahan batu-bata. Suruh ia jine ngusahakenca.

⁸Tapi batu-bata si ibahanna la banci la seri beliganna ras si gelgel, sada pe la banci urak. Perban malasna nge maka lalap ipindona ia lawes nehken persembahen man Dibatana!

⁹Erserana ban dahinna janah usahaken maka ia tetap sibuk kerina, gelah olanai lit waktuna megiken cakap si la tuhu.”

¹⁰E maka ndarat me si merentah budak ras mandur-mandur nina man kalak Israel kerina, “Enggo iperentahken raja maka lanai isikapkenna man bandu nggala.

¹¹Ikatakenna maka kam jine arus lawes ndaramisa ntah i ja gia banci ibuat kam, tapi la banci lang batu-bata si ibahanndu tetap seri buena.”

¹²E maka serser isiari bangsa e negeri Mesir ndarami nggala.

¹³Si merentah budak e tetap maksa ia kerina gelah batu-bata si ibahanna tetap seri buena ras sanga ibereken denga nggala man bana.

¹⁴Kalak Mesir si merentah budak e mbalbali mandur-mandur kalak Israel si itugasken ngawasi dahin e, janahna nungkun nina, “Engkai maka la ibahan bangsandu batu-bata seri buena ras si gelgel?”

¹⁵E maka lawes me mandur-mandur kalak Israel njumpai raja nehken keberatenna nina, “O Raja, ngkai maka bage perbahanenndu man kami?

¹⁶Nggala lanai ibereken man kami, tapi tetap denga kami isuruh erbahan batu-bata! Janah genduari kami ibalbali ka, padahal rayatndu e nge si salah.”

¹⁷Erjabap raja nina, “Malas kam! La atendu erdahin! Janah perban e nge maka ipindondu man bangku gelah kubere kam lawes erbahan persembahen man TUHAN.

¹⁸To dahi dahinndu! Lanai ibereken nggala man bandu tapi batu-bata si ibahanndu arus tetap seri buena.”

¹⁹Iangka mandur-mandur kalak Israel maka ia i bas kiniseran sanga ikataken maka tep-tep wari ia arus erbahan batu-bata seri buena ras si gelgel.

²⁰Asum mandur-mandur e lawes nadingken raja, jumpa ia Musa ras Harun si sangana nimai ia.

²¹Ikatakenna man Musa ras Harun nina, “TUHAN enggo ngidahsa kai si ibahanndu janah la banci lang iukumNa kam, sabap kam nge erbahanca maka nembeh ate raja ras pegawaina nandangi kami. Erkiteken kam, enggo lit dalanna munuh kami.”

²²Kenca bage ngadap ka Musa man TUHAN nina, “TUHAN, ngkai maka bage suina ate bangsaNdu ibahanNdu? Engkai maka isuruhNdu aku ku jenda?

²³Mulai kin kenca aku ngerana man raja i bas gelarNdu, enggo mesui kal ate bangsaNdu ibahanna. Janah kai pe langa lit ibahan Kam nampati bangsa e!”