Read Batak Karo KELUAREN 7 Bible Online

KELUAREN 7 - Batak Karo bible

KELUAREN 7

¹Nina TUHAN, “Kubahan kam bagi Dibata man raja e, janah seninandu Harun, jadi nabindu, si ngerana man raja.

²Turiken man Harun kerina si enggo Kuperentahken man bandu, gelah ia ngatakenca man raja, maka iberena bangsa Israel nadingken negeri Mesir.

³Tapi Kubahan ateKu maka ukur raja mekeng, janah la ia nggit megiken kam, amina gia melala Kubahan tanda-tanda kuasa i negeri Mesir si erbahanca ia mbiar. [19†]

⁴Jenari Kusehken me ukumen si mberat man negeri Mesir, tapi Kutaruhken kerina suku-suku bangsangKu ndarat i negeri e nari.

⁵I je me pagi maka ieteh bangsa Mesir maka Aku nge TUHAN, kenca Kuawatken tanKu ngelawan ia janah Kutaruhken bangsa Israel ndarat i negeri e nari.”

⁶Musa ras Harun ngelakoken kai si iperentahken TUHAN.

⁷Tupung ia duana ngerana man raja e, umur Musa enggo 80 tahun, janah umur Harun 83 tahun.

⁸Nina TUHAN man Musa ras Harun,

⁹“Adi ate raja nguji kam gelah ibahanndu tanda kuasa, suruh Harun muat cikenna maka ibenterkenna ku taneh i lebe-lebe raja, gelah ciken e salih jadi nipe.”

¹⁰Kenca e lawes Musa ras Harun ndahi raja, e maka ibahanna bagi si enggo iperentahken TUHAN. Ibenterken Harun cikenna i lebe-lebe raja ras pegawai-pegawaina e maka salih ciken e jadi nipe.

¹¹E maka idilo raja ka kalak si erpemeteh ras tukang-tukang sihirna, janah arah kebeluhenna ersihir ibahanna ka bagi si ibahan Harun.

¹²Ibenterken kalak enda cikenna, e maka salih kerina ciken e jadi nipe. Tapi itelen ciken Harun kerina ciken kalak ndai.

¹³Aminna bage gia ukur raja tetap ka nge mekeng, sue ras si ikataken TUHAN, maka raja la nggit megiken Musa ras Harun.

¹⁴Kenca bage nina TUHAN man Musa, “Perban seh kal kengna Raja, la iberena bangsa e lawes.

¹⁵E maka jumpailah ia erpagi-pagi e tupung ia lawes ku Lau Nil. Babalah ciken si salih jadi nipe ndube, janah timailah ia i tepi lau e.

¹⁶Kenca bage kataken man raja, nindu, ‘ TUHAN Dibata bangsa Heber nuruh aku ngataken man bandu gelah iberendu bangsaNa lawes, maka banci isembahna Ia i gurun pasir. Tapi seh asa genduari la ibegikenndu.

¹⁷Genduari, o Raja, enggo ikataken TUHAN maka itandaindu nge ise Ia arah kai si ibahanNa kari. Nehenlah, kupalu ateku lau belin e alu ciken enda, maka lau e salih jadi dareh. [20†]

¹⁸Nurung si i bas lau mate, janah Lau Nil la banci lang jadi mbau, seh maka lau e lanai terinem bangsa Mesir.’ ”

¹⁹Nina TUHAN man Musa, “Suruh Harun muat cikenna gelah itatangna ciken e i babo lau, saluren-saluren lau ras kolam-kolam i belang-belang negeri Mesir. Lau e salih jadi dareh, seh maka i belang-belang taneh Mesir dareh nari nge kerina, terus pe ku bas ingan lau si ibahan i bas kayu, ras batu nari.”

²⁰Jenari ilakoken Musa ras Harun bagi si iperentahken TUHAN. I lebe-lebe raja ras pegawai-pegawaina, itatang Harun cikenna, jenari ipaluna lau belin e, e maka kerina launa salih jadi dareh.

²¹Nurung i bas lau e mate, janah lanai kal lang-lang bauna. E maka lau e lanai terinem kalak Mesir, janah sebelang-belang taneh Mesir dareh kerina.

²²Tapi tukang-tukang sihir raja pe erbahan si bage ka alu sihirna, e maka ukur raja tetap mekeng. Bagi si enggo ikataken TUHAN, la ia nggit megiken Musa ras Harun.

²³Dage erkusur raja, mulih ia ku istana alu la sitik pe mperdiateken si enda.

²⁴Kerina kalak Mesir ngkali sumur i tepi Lau Nil guna ndarami lau inemen, perban lau i bas lau belin e lanai terinemsa.

²⁵Si enda dekahna lit pitu wari kenca ipalu TUHAN Lau Nil.