Read Batak Karo KELUAREN 8 Bible Online

KELUAREN 8 - Batak Karo bible

KELUAREN 8

¹Jenari nina TUHAN man Musa, “Laweslah ndahi raja janah kataken man bana katangKu enda, ‘Berelah bangsangKu lawes, gelah banci Aku isembahna.

²Adi la kam nggit, Kuukum negerindu arah namburisa alu katak.

³Perbahan bage demna pagi katak i Lau Nil, e maka itadingkenna lau belin e janah lawes ia ku bas istanandu, ku bas kamarndu, ku bas ingan medemndu, ku bas rumah-rumah pegawaindu ras rumah-rumah rayatndu, seh pe ku dapurndu ras kudin-kudinndu.

⁴Ilompatina kam, rayatndu, bage pe kerina pegawai-pegawaindu.’ ”

⁵Nina TUHAN man Musa, “Suruh Harun natang cikenna i babo lau belin saluren-saluren lau, kolam-kolam, gelah rehen katak ibahanna namburi negeri Mesir.”

⁶E maka itatang Harun cikenna i babo kerina lau, kenca bage ndaraten melala katak i bas lau e nari, itamburina negeri Mesir.

⁷Tapi ipergunaken tukang-tukang sihir ka pemetehna, janah ia pe rehen ibahanna katak ndemi negeri Mesir.

⁸Jenari idilo raja si Musa ras Harun, e maka nina, “Ertotolah man TUHAN gelah ipelawesna katak enda kerina, kenca e kubere kari bangsandu lawes, maka banci isehkenna persembahen-persembahen man TUHAN.”

⁹Nina Musa njabapsa, “Meriah ukurku ertoto guna kam. Tentuken saja ndigan atendu aku ertoto guna kam, guna pegawai-pegawaindu ras rayatndu, gelah katak e keri kerina seakatan i Lau Nil.”

¹⁰Erjabap raja nina, “Ertotolah kerna aku pepagi.” Nina Musa, “Tentu kubahan bagi si ipindondu, gelah itehndu maka labo lit Dibata bagi TUHAN, Dibata kami.

¹¹Katak e la banci la keri i bas kam nari, i bas pegawai-pegawaindu nari ras i bas rayatndu nari. Sada pe pagi lanai lit tading, seakatan i bas Lau Nil.”

¹²Kenca bage lawes Musa ras Harun nadingken raja, e maka ertoto Musa man TUHAN kerna katak si enggo itamakenNa man raja.

¹³Ilakoken TUHAN bagi si ipindo Musa, e maka mate kerina katak e, subuk si i bas rumah-rumah, i bas kesain-kesain ras si i juma pe.

¹⁴Ipepulung kalak Mesir bangke katak e, ergun-gun, seh mbau kerina negeri e ibahanna.

¹⁵Tapi kenca idah raja maka katak e enggo mate kerina, mekeng ka ia mulihken; la ia nggit megiken kata Musa ras Harun, bagi si enggo ikataken TUHAN.

¹⁶Nina TUHAN man Musa, “Suruh Harun mekpekken cikenna ku taneh, gelah abu i belang-belang negeri Mesir salih jadi rengit.”

¹⁷E maka ipalu Harun taneh alu cikenna, janah kerina abu i Mesir salih jadi rengit. Icinepina jelma ras rubia-rubia.

¹⁸Icubaken tukang-tukang sihir ka makeken pemeteh sihirna gelah rehen rengit, tapi la ia ngasup. Rengitlah kerina i japa pe i belang-belang taneh Mesir,

¹⁹e maka nina tukang-tukang sihir e man raja, “Dibata kap si erbahanca enda!” Tapi raja tetap mekeng, payo bagi si ikataken TUHAN, maka raja la nggit megiken Musa ras Harun. [21†]

²⁰Nina TUHAN man Musa, “Lampas pagi erpagi-pagi e, jumpailah raja tupung ia lawes ku lau, janah kataken man bana katangKu enda, ‘Berelah bangsangKu lawes, gelah banci isembahna Aku.

²¹Kupersingeti man bandu, maka adi la iberendu, la banci lang Kuukum kam alu nuruh laneng ratah ncinepi kam, pegawai-pegawaindu, ras rayatndu kerina. Rumah-rumah kalak Mesir dem alu laneng ratah janah taneh pe itamburina.

²²Tapi daerah Gosen, i ja bangsangKu ringan, la Kukenai, e maka la lit i je sada pe laneng ratah. Enda Kubahan gelah itehndu maka Aku nge TUHAN, si ngaturken negeri enda.

²³Lit Kubahan lainna man bangsangKu ras man bangsandu. Tanda kuasa enda pagi me ibenaken.’ ”

²⁴Isuruh TUHAN me laneng ratah si lanai kal lang-lang buena ku bas istana raja, ras ku bas rumah-rumah pegawaina. Kerina negeri Mesir icedaken laneng ratah e.

²⁵Jenari idilo raja si Musa ras Harun nina, “To persembahkenlah persembahen-persembahen man Dibatandu i bas negeri enda.”

²⁶“La payo adi ibahan kami bage,” nina Musa erjabap. “Sabap tentu nembeh ate kalak Mesir adi ipersembahken kami asuh-asuhen persembahen man TUHAN, Dibata kami. Adi ipake kami asuh-asuhen e jadi persembahen, tentu nembeh ate kalak Mesir man kami. E maka ibenterina kami alu batu seh mate, sabap idahna denga kami erbahan persembahen e.

²⁷Arus maka kami erdalan telu wari dekahna ku gurun pasir nehken persembahen-persembahen man TUHAN, Dibata kami bagi si iperentahkenNa man kami.”

²⁸Nina raja, “Kubere kam lawes nehken persembahen man TUHAN, Dibatandu ku gurun pasir, adi la kam ndauhsa lawes. Ertotolah guna aku.”

²⁹Nina Musa njabapsa, “Kenca aku lawes, minter aku ertoto man TUHAN maka pagi itadingken laneng ratah e kam, pegawai-pegawaindu ras rayatndu. Tapi ola pagi itipundu ka kami mulihken kenca bage la ka iberendu bangsa e lawes nehken persembahen man TUHAN.”

³⁰E maka lawes Musa nadingken raja jenari ertoto ia man TUHAN.

³¹Janah ibahan TUHAN bagi si ipindo Musa. Itadingken laneng ratah e raja, pegawai-pegawaina ras rayatna; sada laneng ratah pe lanai lit tading.

³²Tapi sekali enda pe raja mekeng ka nge, e maka la ka bo iberena bangsa e lawes.