Read Batak Karo KELUAREN 9 Bible Online

KELUAREN 9 - Batak Karo bible

KELUAREN 9

¹Nina TUHAN man Musa, “To dahi raja, kataken man bana maka TUHAN, Dibata bangsa Heber enggo ngataken, ‘Berelah bangsangKu lawes, gelah banci isembahna Aku.

²Adi la ka bo iberendu ia lawes,

³Kuukum kam alu mereken penakit bernung man kerina asuh-asuhenndu, kudandu, keledendu, untandu, lembundu, biri-birindu ras kambingndu.

⁴Tapi lit Kubahan lainna man asuh-asuhen bangsa Israel ras man asuh-asuhen bangsa Mesir, janah la lit sada pe asuh-asuhen bangsa Israel mate.

⁵Aku, TUHAN, enggo netapken, maka pagi me Kulakoken si enda kerina.’ ”

⁶Pepagina ibahan TUHAN bagi si enggo ikatakenNa. E maka kerina asuh-asuhen bangsa Mesir mate, tapi asuh-asuhen bangsa Israel sada pe lang.

⁷Isungkun raja kai si enggo jadi janah ituriken kalak man bana maka la lit sada pe mate asuh-asuhen bangsa Israel. Tapi ukur raja lalap mekeng, e maka la iberena bangsa e lawes.

⁸Kenca bage ikataken TUHAN man Musa ras Harun nina, “Buatlah piga-piga ngkerauk abu dapur. Abu e arus icaburken Musa ku das i lebe-lebe raja.

⁹Abu simelumat e minter merap ku belang-belang negeri Mesir, janah i japa pe ipeturahna bareh, subuk i bas jelma, bage pe i bas asuh-asuhen, jenari pultak jadi ugah.”

¹⁰E maka ibuat Musa ras Harun abu e, kenca bage tedis ia i lebe-lebe raja. Icaburken Musa abu ndai ku das, janah minter turah ibahanna bareh i bas jelma ras asuh-asuhen, jenari pultak jadi ugah. [22†]

¹¹Tukang-tukang sihir la ngasup tedis i lebe-lebe Musa, sabap ia pe barehen bage pe kerina bangsa Mesir si deban.

¹²Tapi mekeng ibahan TUHAN ukur raja, janah payo bagi si ikataken TUHAN, raja la nggit megiken Musa ras Harun.

¹³Kenca bage, ngerana TUHAN man Musa, “Pagi lampas erpagi-pagi, jumpai raja jenari kataken man bana maka TUHAN, Dibata bangsa Heber enggo ngataken, ‘Berelah bangsangKu lawes, gelah banci isembahna Aku.

¹⁴Sekali enda labo saja pegawai-pegawaindu ras rayatndu ngenca Kuukum, tapi kam pe, gelah itehndu maka la lit si deban bagi Aku i belang-belang doni enda.

¹⁵Bicara mbarenda nari Kuawatken tanKu mekpek kam ras rayatndu alu penakit, tentu ndekah me kam min ndai mate.

¹⁶Tapi guna encidahken kuasangKu man bandu, Kupelepas kam nggeluh, gelah gelarKu ipuji i belang-belang doni enda. [23†]

¹⁷Bage pe tetap ka nge ipeganjangndu bandu i lebe-lebe bangsangKu, e maka la iberendu ia lawes.

¹⁸I bas paksa si genduari e ka pagi, Kudabuhken udan baho si mesangat si la enggo pernah jadi bage i bas sejarah Mesir.

¹⁹Dagina perentahkenlah maka asuh-asuhenndu ras kerina jelma ras asuh-asuhen i mbalmbal, si la lit inganna cio la banci lang idabuhi udan baho seh mate.’ ”

²⁰Piga-piga kalak pegawai raja mbiar erkiteken kai si ikataken TUHAN, e maka ibabana budak-budakna ras asuh-asuhenna ku rumah.

²¹Tapi si debanna la diatena pe kata persinget TUHAN, ipelepasna saja budak-budakna ras asuh-asuhenna i darat.

²²Jenari erkata TUHAN man Musa nina, “Pepinterlah tanndu ku langit, maka ndabuh udan baho ku kerina negeri Mesir ngkenai jelma, asuh-asuhen, ras kerina sinuan-sinuan i juma.”

²³E maka iangkat Musa cikenna kempak langit. Kenca e minter ipesusur TUHAN lenggur ras udan baho, ras perkas ndumpang taneh. Ipesusur TUHAN

²⁴udan baho si meder ras perkas erndilap ku jah ku je. I bas gedang-gedang sejarah Mesir la enggo pernah lit bage. [24†]

²⁵I belang-belang taneh Mesir, iripukken udan baho e kerina si la lit inganna cio, subuk jelma bage pe asuh-asuhen. Kerina sinuan-sinuan i juma mbulaken, janah batang-batang kayu penggelen.

²⁶I daerah Gosen ngenca, e me ingan kalak Israel tading, udan baho e sitik pe la lit.

²⁷E maka iperentahken raja ngelegi Musa ras Harun. Nina raja man bana, “Sekali enda tuhu-tuhu aku enggo erdosa. TUHAN nge kepe si benar, aku ras rayatku nge si salah.

²⁸Ertotolah man TUHAN! Enggo cukup man kami sora lenggur ras udan baho e! Erpadan aku maka kubere kam lawes; lanai padah terdekahen kam ringan i jenda.”

²⁹Nina Musa man raja, “Kenca aku ndarat i bas kuta enda nari, kuangkat minter tanku ertoto man TUHAN. E maka minter kari lenggur e ngadi, janah udan baho lanai lit, gelah banci itehndu maka doni enda TUHAN empuna.

³⁰Tapi kueteh nge maka kam ras pegawai-pegawaindu langa ka bo mbiar man TUHAN Dibata.”

³¹Sinuan-sinuan si sangana erbunga ras sargum si enggo metua kerina icedaken.

³²Tapi page ras dawa sada pe la ceda sabap langa luar ruhina tupung si e.

³³Itadingken Musa me raja, jenari lawes ia ku darat kuta. Iangkatna tanna ertoto man TUHAN, e maka minter ngadi lenggur, baho ras udan e.

³⁴Kenca idah raja kai si enggo jadi, erdosa denga ka nge ia. Ia ras pegawai-pegawaina tetap nge mekeng ukurna.

³⁵Janah payo bagi si enggo ituriken TUHAN arah Musa, maka la ka bo ibere raja bangsa Israel lawes.