Read Batak Karo JOP 1 Bible Online

JOP 1 - Batak Karo bible

JOP 1

¹I negeri Us lit sekalak dilaki, Jop gelarna. Ia nembah janah erkemalangen man Dibata. Ia kalak si mehuli, janah la lit perbahanenna si jahat.

²Anakna pitu dilaki, telu diberu;

³biri-birina lit pitu ribu, untana telu ribu, lembuna seribu ras keledena lima ratus. Suruh-suruhenna pe seh kal teremna. E maka banci ikataken ia me si bayakna i Timur.

⁴Anak-anak Jop si dilaki semal erbahan pesta man-man alu ergiliren, janah anak-anakna si deban pe ikut reh ku pesta e. Turangna si telu pe tetap itenahkenna ikut pulung.

⁵Kenca tiap pesta enggo dung, lampas erpagi-pagi keke Jop, jenari ipersembahkenna persembahen tutungen guna pebadiaken anakna e sekalak-sekalak. Si e ilakokenna sabap rukur ia, banci jadi anakna e enggo erbahan dosa si la teridah, janah erkiteken si e ceda ukur Dibata alu la iarapna.

⁶Kenca enggo seh warina maka malekat-malekat ngadap TUHAN, Iblis pe ikut ras malekat-malekat e. [1†]

⁷Nungkun TUHAN man Iblis nina, “I ja nari kam ndai?” Ngaloi Iblis, “Erdalan-dalan ku jah ku jenda niar-niar doni.”

⁸“Iperdiatekenndu nge suruh-suruhenKu Jop?” nina TUHAN nungkun. “La lit sekalak pe i babo doni si bagi ia patuhna ras ulina. Isembahna Aku janah la lit si jahat ilakokenna.”

⁹Nina Iblis njabapsa, “Nggit kin iakapNdu Jop nembah kam adi la ia rulih? [2†]

¹⁰Gelgel nari ikawaliNdu ia ras isi jabuna bage pe sikerajangenna kerina. Ipasu-pasuNdu kai si ilakokenna, janah iberekenNdu man bana mbue lembu seh dem negeri e.

¹¹Tapi genduari, bicara ibuatNdu kerina si lit i bas ia, ugapa pe isumpahina Kam i adep-adepenNdu.”

¹²“Merandal,” nina TUHAN man Iblis, “kai si lit i bas ia, genduari i bas kuasandu. Tapi Jop la banci ikuitndu.” E maka lawes Iblis.

¹³I bas sada wari, asum anak-anak Jop erpesta man-man i bas rumah seninana sintua,

¹⁴reh sekalak kiam-kiam maba berita man Jop. Nina man Jop, “Asum kami sangana nenggalaken lembu, kelede pe nggagat i bas mbalmbal i deherna,

¹⁵rempet reh kalak Seba, iserangna jenari irampasna kerinana. Ibunuhna kerina suruh-suruhenndu, aku ngenca pulah lako meritakenca man bandu.”

¹⁶Ope denga ia dung ngerana, enggo ka seh suruh-suruhen si deban nina, “Biri-biri ras permakanna enggo keri mate idumpang perkas. Aku ngenca pulah lako meritakenca man bandu.”

¹⁷Ope denga ia dung ngerana, reh ka suruh-suruhen si deban nina, “Kami iserang telu terpuk gerombolen kalak Kaldea. Unta-unta irampasna, janah kerina suruh-suruhenndu ibunuhna, aku ngenca pulah lako meritakenca bandu.”

¹⁸Ope denga ia dung ngerana, reh ka suruh-suruhen si deban nina, “Asum anak-anakndu man-man i rumah anakndu sintua,

¹⁹rempet rembus angin meter i gurun pasir nari. Runtuh rumah e iembusna, janah mate kerina anakndu ibahanna. Aku ngenca pulah lako meritakenca man bandu.”

²⁰Kenca bage tedis Jop janah icaingkenna uisna perban cedana atena. Iguntingna buk takalna, kenca bage nembah erjimpuh ia, ayona seh ku taneh.

²¹Nina, “Kadeku pe la lit asum aku tubuh nai, mate pe aku la pedah lit kadeku pe. TUHAN nai si merekenca, genduari enggo ka ibuatNa. Terpujilah gelarNa.”

²²I bas kerina kejadin enda ndai Jop la erdosa, sabap la ia nggit nalahken Dibata.