Read Batak Karo JOP 10 Bible Online

JOP 10 - Batak Karo bible

JOP 10

¹Ah, lanai ateku gedang nggeluh. Kutelkasken ateku rananku, kubelasken ateku ukurku si ngilas i bas pusuhku.

²O Dibata, ola ukumNdu aku! Turiken bangku maka kueteh salahku.

³Bujur kin Kam bage? Megombang Kam man tinepaNdu jine, jenari cirem Kam ngidah rencana kalak jahat.

⁴Bali kin pengidahNdu ras pengidah manusia?

⁵Bali kin gedangna geluhNdu ras geluh kami manusia?

⁶Di lang, ngkai dage maka idaramiNdu kerina dosa-dosangku, dingen inungnungiNdu tiap kesalahenku?

⁷ItehNdu kap maka labo lit salahku janah itehNdu ka pe labo lit ise pe si ngkelini aku.

⁸TanNdu kap si njadiken ras si nepa aku, tapi genduari tanNdu e ka si ngkernepken aku.

⁹Inget min maka i bas taneh dah nari kap aku itepaNdu; iperperkenNdu ka kin ateNdu aku jadi abu mulihi?

¹⁰IbereNdu gegeh man bapangku lako njadiken aku; ipeturahNdu aku i bas bertin nandengku.

¹¹IranggutNdu badanku salu tulan ras urat, janah itutupiNdu tulanku salu jukut ras kulit.

¹²IbereNdu aku nggeluh; ikelengiNdu aku, dingen pengepkepenNdu ngkawali kesahku.

¹³Tapi genduari enggo kueteh maka kidekah enda, sinik-sinik irencanakenNdu kepe cilaka man bangku.

¹⁴Itima-timaiNdu ndigan aku erbahan dosa, janah kenca kubahan dosa, la Kam nggit ngalemisa.

¹⁵Kenca aku erdosa, minter aku cilaka ibahanNdu; tapi aminna si mehuli pe kubahan, labo aku dat pujin. Mesui kal ateku, mela kuakap.

¹⁶Adi sitik lah gia seh sura-surangku, minter aku iperburuiNdu, bagi Kam erburu singa; lebih asa si e, tanda kuasaNdu pe ilakokenNdu guna encilakaken aku.

¹⁷Lalap lit saksiNdu lako ngelawan aku; ateNdu nembeh man bangku tetap reh belinna; tetap ibahanNdu rencana si mbaru guna nerang aku.

¹⁸O Dibata, ngkai maka ipelepasNdu aku tubuh? Ulin min mbarenda aku mate ope denga ise pe ngidahsa.

¹⁹Pinter lawes i bas bertin nari ku bas kuburen, bali kap ulina ras la pernah lit.

²⁰Ma nandangi keri kin kegeluhenku? Tadingkenlah aku sisada! Pelepaslah aku ersenang-senang i bas geluhku si sitik nari e.

²¹Lanai ndekahsa lawes me aku janah ndigan pe lanai mulihken lawes me aku ku negeri si gelap dingen geltem,

²²negeri kegelapen, negeri awih-awih, ras rontang, i je siangna bali ras gelapna berngi.”