Read Batak Karo JOP 11 Bible Online

JOP 11 - Batak Karo bible

JOP 11

¹ [1-2] “La kin lit ise pe njabapsa cakapndu si sea-sea e? Banci kin cakap gedang mahan kalak jadi benar?

³O Jop, akapndu kin la kami ngasup njabap kam? Ntah rananndu si meganjang e erbahanca kami lanai ngasup sumekah?

⁴Ikatakenndu maka benar kerina si ikatakenndu; janah kam la erpandangen i adep-adepen Dibata.

⁵Ijabap Dibata kam min, maka itehndu!

⁶Gelah iturikenNa bandu kepentaren melala damparna; melala perkara si la ngasup manusia ngantusisa ukumen si ibahan Dibata kurangsa denga asa si patut ialokenndu.

⁷Ngasup kin kam nibarisa uga belinna kemulian Dibata? Dingen uga belinna kuasaNa?

⁸Dibata ganjangen asa langit, tapi kam, langit pe la terjakandu. Dibata meteh doni kematen, tapi kam la ietehndu.

⁹Kemulian Dibata belinen asa doni enda, belangen asa lawit.

¹⁰Adi itangkap Dibata kam, jenari iadiliNa kam, ise kin si banci ngambatisa?

¹¹Itandai Dibata apai kalak si la erguna; iidahNa kerina perbahanenna si jahat.

¹²Adi indung kelede kerangen petubuh kelede si melemuk, e maka kalak motu banci jadi pentar.

¹³Pehulilah perukurenndu, o Jop. Dadakenlah tanndu ertoto man Dibata.

¹⁴Asa kai si jahat dingen salah, pedauhlah i bas rumahndu nari.

¹⁵Jenari alokenlah doni enda alu tetap ukur dingen la biar-biaren.

¹⁶E maka kerina kesusahenndu jadi lupa, bali ras banjir si enggo lepas lanai inget.

¹⁷Kegeluhenndu jadi terang, terangen asa las matawari sanga pantek ciger, janah paksa-paksa kegeluhenndu si gelapna kal, jadi ersinalsal desken matawari mbincar erpagi-pagi.

¹⁸Senang akapndu nggeluh, dem pengarapen; Dibata ngkawali kam janah mereken ketenangen man bandu.

¹⁹Nandangi musuh-musuhndu la kam mbiar, janah nterem kalak mindo penampat man bandu.

²⁰Tapi mata kalak jahat jadi meriben, itatapna kelewet tapi la lit dalanna pulah. Pengarapenna sada nari ngenca: Kematen.”