Read Batak Karo JOP 12 Bible Online

JOP 12 - Batak Karo bible

JOP 12

¹ [1-2] “Kam me tuhu sora jelma si nterem. Adi mate kam, kepentaren pe mate ras kam.

³Tapi kebeluhenku rukur bali kap ras kam. Labo aku bodohen asa kam; kerina kap kalak metehsa kai si enggo iturikenndu.

⁴Teman-temanku jine pe enggo nguncimi aku genduari; itawaina aku, aminna aku benar dingen sitik pe la ersalah; tapi pernah nge mbarenda pertotonku ialoi Dibata.

⁵Kam la lit kesusahenndu, tapi ipesega-segandu aku, itukulndu kalak si nandangi guling.

⁶Tapi pinangko ras kalak si la erdibata nggeluh alu senang, aminna gia si jadi dibatana e me gegehna saja.

⁷Perik-perik ras rubia-rubia si deban pe melala banci iajarkenna bandu;

⁸pindolah kepentaren man rubia-rubia si nggeluh i babo doni enda ras si ni i bas lawit.

⁹Kerina rubia-rubia e metehsa tan TUHAN kap si nepa ia.

¹⁰Dibata kap si negu-negu kegeluhen tinepaNa; kesah manusia lit i bas tan Dibata.

¹¹Tapi bali ras dilahndu entabeh akapna ncecap pangan, bage pe cupingndu entabeh akapna megi-megi ranan.

¹² [12-13] I bas kalak si enggo metua lit kepentaren, tapi i bas Dibata lit kepentaren ras gegeh. Pengertin pe lit i bas kalak si enggo metua; tapi i bas Dibata lit pengertin ras gegeh guna ndalankenca.

¹⁴Adi Dibata si ngeruntuhkenca, ise ngasup majekkenca mulihi? Janah ise ngasup mulahisa kalak si ipenjaraken Dibata?

¹⁵Musim perlego reh adi Dibata natang udan; tapi adi tambak lau iburtaskenNa, reh banjir.

¹⁶Dibata megegeh kap, janah Ia tetap menang; subuk si itebu-tebu bage pe si penebu-nebu lit i bas kuasaNa.

¹⁷Kepentaren penguasa itangtangina, janah peminpin bagi kalak mehado ibahanNa.

¹⁸Kuasa raja-raja iruntuhkenNa, janah ibahanNa raja-raja jadi tabanen;

¹⁹ipeterukNa imam-imam ras kalak si erkuasa.

²⁰IpesinikNa kalak si terteki, janah kepentaren tua-tua itangtangiNa.

²¹Mela akap kalak si erkuasa ibahanNa, janah ipeltepkenNa gegeh si erkuasa.

²²IbahanNa terang ersinalsal kempak doni kematen si gelap.

²³IbahanNa bangsa-bangsa megegeh dingen ermulia, tapi kedungenna italukenNa dingen ikernepkenNa bangsa-bangsa e.

²⁴Peminpinna ibahanNa jadi motu janah ipelepasNa mampa-mampa dingen papak;

²⁵dadap-dadap ia i bas gelap janah mbewat-mbewat bagi kalak mabuk.