Read Batak Karo JOP 13 Bible Online

JOP 13 - Batak Karo bible

JOP 13

¹ [1-2] Kai si ikatakenndu, enggo me mbarenda kubegi. Kerina nge kuerti, pemetehku bali nge ras pemetehndu. Aku labo bodohen asa kam.

³Tapi ras Dibata kap aku ersoal, labo ras kam; ras Ia nge kuranaken rananku.

⁴Kam itamburindu kebodohenndu alu guak; kam desken sekalak doktor si la ngasup pepalem ise pe.

⁵Sinikken, maka iakap kalak kam pentar!

⁶Begikenlah asum aku nuriken ukurku.

⁷Engkai maka kam erbual? Akapndu kin adi kam erbual untung Dibata?

⁸Ikapitindu kin atendu Dibata? Ibelandu kin atendu Ia i pengadilen?

⁹Adi ipepayo Dibata kam alu megermet, lit kin datca si mehuli i bas kam? Akapndu kin banci itebu-tebundu Dibata, bagi penebu-nebundu manusia?

¹⁰Aminna gia alu erbuni-buni ikapitindu Dibata, ugapa pe iukumNa nge kam alu mesangat,

¹¹dingen kemulianNa mahanca kam mbiar mekelek.

¹²Kuan-kuanenndu desken abu si la erguna, nasihatndu murah meripuk bagi taneh dah.

¹³Sip kam lebe maka aku ngerana, janah uga kari jadina man bangku bagelah.

¹⁴Aku enggo sikap ngasamken kesahku.

¹⁵Enggo bene kerina pengarapenku; dage adi ibunuh Dibata gia aku, labo dalih. Ateku nuriken soalku terang-terangen man baNa.

¹⁶Banci jadi erkiteken si e maka aku selamat, sabap labo lit kalak jahat si pang ngadap Dibata.

¹⁷Genduari begikenlah rananku alu manjar-anjar, begikenlah keterangenku.

¹⁸Aku enggo sikap nuriken soalku, sabap kueteh maka benar nge aku.

¹⁹Dibata, iadukenNdu kin ateNdu aku? Adi bage sinik nari nge aku jenari mate.

²⁰Tapi berekenlah pemindonku si dua erbage enda, maka lanai aku cebuni i adep-adepenNdu,

²¹olanai ukumNdu aku, olanai ipebiar-biarNdu aku alu dolatNdu si rejin.

²²Ngeranalah Kam, maka kujabap. Tah pelepas aku ngerana, janah Kam njabapsa.

²³Asa kai kin buena salah ras dosangku? Pebetehkenlah bangku kerina lepakku.

²⁴Engkai maka isilahkenNdu aku rusur? Kai sabapna maka musuhNdu akapNdu aku?

²⁵Aku la lebih asang bulung-bulung si enggo ndabuh. Kai gunana aku igunjak-gunjakNdu? Aku desken nggala si enggo kerah, kai ertina aku iayak-ayakNdu?

²⁶IberekenNdu ukumen si pagit man bangku, ibalasNdu kesalahen-kesalahenku paksa ngudangku.

²⁷IiketNdu nahengku alu rante; tiap aku njingkang ipernehenNdu, seh maka tapak-tapak nahengku pe tetap iperdiatekenNdu. [12†]

²⁸E maka buruk dagingku desken kayu si enggo burburen; desken selambar baju si enggo ngetngeten.