Read Batak Karo JOP 15 Bible Online

JOP 15 - Batak Karo bible

JOP 15

¹ [1-2] “Cakapndu ena Jop, cakap si sea-sea kap.

³Labo lit kalak pentar i ja pe si ngerana bagi kam e. Labo ia nggit mbela dirina.

⁴Adi iikutken katandu ena, lanai lit kalak erkemalangen tah ertoto man Dibata.

⁵Arah cakapndu tangkas maka kam ersalah tuhu-tuhu, tapi alu kebeluhen ngerana lepakndu ibunikenndu.

⁶La perlu kam kuukum, sabap kata-katandu jine ngukum kam.

⁷Akapndu kin kam manusia si pemena? Enggo kin kam lit ope deleng-deleng itepa?

⁸Idengkehndu kin kai rencana Dibata? Kam kin ngenca si mada kepentaren manusia?

⁹Pemetehndu labo lebih asa pemeteh kami; pengertinndu pe labo ngelebihi kami.

¹⁰Kepentaren kami idat kami i bas tua-tua si enggo ubanen, janah ope bapandu tubuh, enggo ia lit leben.

¹¹Kurang meherga kin akapndu ndia maka itulakndu pengapul Dibata? Enggo ibelasken kami bekas kataNa jine, alu manjar-anjar dingen medale.

¹²Tapi ngkai maka pusuhndu gara dingen matandu merlang?

¹³Merawa kam kempak Dibata dingen alu katandu ndai ilawanndu Ia.

¹⁴Adi manusia, banci kin la lit sitik pe dosana? Banci kin ia benar i adep-adepen Dibata? [13†]

¹⁵Nandangi malekatNa pe la tek Dibata la lit sada pe bersih i bas pengadilenNa;

¹⁶apai ka nandangi manusia si meluat dingen ilat, si bali akapna ras minem lau ngelakoken si jahat?

¹⁷Begiken, Jop, enda kuturiken si enggo kuidah man bandu,

¹⁸bage pe si enggo iajarken kalak pentar man bangku. Kepentaren e idatca i bas nini-ninina nari, si la sitik pe ngahanken pemetehna terbuni.

¹⁹Sanga si e langa lit bangsa si deban i bas negerina, la lit si mabai ia papak nandangi Dibata.

²⁰Kalak jahat si merawa nipu, kidekah geluhna tetap mbiar dingen aru.

²¹Sora si mejin ibegina la erngadi-ngadi, i tengah-tengah kesenangenna ia irampuki.

²²La lit arapenna pulah i bas kegelapen nari, sabap pedang si nampul ia enggo nimai,

²³perik-perik pe sangana tertima-tima, gelah bangkena ipanganina. Genduari enggo itehna, matawari si pagi gelap man bana.

²⁴Desken sekalak raja si mbisa, mara enggo sikap nggempangisa.

²⁵Bage me kalak si ngelawan Dibata, si pang nimbang si Mada Kuasa.

²⁶Alu megombang ilawanna Dibata; perban mekapal ampang-ampangna, akapna banci ngeligeni ia.

²⁷Tuhu enggo senang gia akapna enggo melala ipepulungna erta;

²⁸kuta-kuta pe ikuasaina dingen irampasina rumah-rumah si enggo itadingken empuna. Tapi kuta-kuta ras rumah-rumah si bage, nandangi kernep dingen bene.

²⁹Kebayaken masap la tahan ndekah, bekasna ndube pe lanai teridah.

³⁰I bas kegelapen nari la banci ia pulah. Desken kayu kap ia, tunasna kerah ibahan api si gara. Reh ka pe angin si rembus, bungana nartar jenari melus.

³¹Adi ernalem ia kempak kejahaten si sia-sia, e nipu bana me kap gelarna; ngalo upah me ia dungna, upah kejahaten si la erguna.

³²Mate me ia ope paksana seh, lanai mulihi meratah desken dahan kerah.

³³Ia bali ras batang anggur, langa pe tasak, buahna enggo nartar. Desken batang saitun, bungana keri ndabuhen.

³⁴Kalak si la erdibata, la lit kesusurenna. Janah keri ipan api rumah si nipajekken arah duit penipun.

³⁵Bage me kalak si ngerancang ras ndalanken kejahaten, perukurenna dem alu pertakin.”