Read Batak Karo JOP 16 Bible Online

JOP 16 - Batak Karo bible

JOP 16

¹ [1-2] Enggo melala kal kubegi ranan si bagena, pengapulndu pesega-sega aku ngenca.

³La kin keri-keri cakap sia-sia si ibelasndu? Engkai maka nggit kal kam njabapi aku?

⁴Bicara aku bagi kam ena, janah kam bagi aku enda, aku pe beluh kap ngerana bagi rananndu ena; ngasup aku ngerana la erpeltep-peltep nuriangi kam, janah takalku kukupir-kupirken ngenehen kam.

⁵Banci kam kupegegehi alu ajarku, dingen la erkeri-kerin pengapulku bandu.

⁶Ngerana pe aku, si mesuingku labo urak, aminna pe sinik, kiniseranku labo mantak.

⁷O Dibata, enggo ngelabuh aku ibahanNdu, keluargangku enggo keri ikernepkenNdu.

⁸Itangkap dingen imusuhiNdu aku, e maka enggo kertang kal dagingku. Iakap kalak, enda e me buktina, maka aku, tuhu-tuhu enggo erdosa.

⁹Perban nembehna ate Dibata, icaing-caingNa aku; ipenNa erderik, mataNa ipebendilNa kempak aku.

¹⁰Mbelang babah kalak nggombang-gombangi aku, iuru-uruna aku, iparapna kurumku.

¹¹Iendesken Dibata aku kempak kalak si la mbiar man Dibata; ku bas tan kalak jahat, aku idabuhkenNa.

¹²Mbarenda senang geluhku, tapi kerahungku ijenggel Dibata; iripukken janah idampeskenNa aku. Sanga latihen erpanah, ku aku ipanahkenNa.

¹³Dagingku serser kena anak panah, ilukaiNa aku seh ku pusuh; tapi la teridah ateNa mekuah, aminna darehku mambur ku taneh.

¹⁴Mulih-ulih aku ilukaiNa, iperjatiNa aku bagi tentera si mbisa.

¹⁵Kupake uis guni tanda ceda ateku, janah perban aku enggo talu, kundul aku i bas abu.

¹⁶Ayongku megara perban rusursa ngandung, matangku besar, kelewetna mbiring.

¹⁷Tapi la lit kalak kusiksa, dingen pertotonku ertorosen kempak Dibata.

¹⁸O taneh, ola tamburi darehku si iamburken kalak janah pernderkuhku mindo keadilen ola pesinik.

¹⁹Kueteh kap maka saksingku lit i Surga, pembelangku lit i bas Ingan si Meganjangna. [14†]

²⁰Teman-temanku naling-naling dingenna tawa-tawa, matangku ngamburken iluh kempak Dibata.

²¹Mesikel aku maka lit si ngkapiti aku i lebe-lebe Dibata, desken sekalak jelma ngkapiti temanna.

²²Tahun-tahun kegeluhenku lanai piga, jenari berkat me aku, janah la mulihken nari.