Read Batak Karo JOP 19 Bible Online

JOP 19 - Batak Karo bible

JOP 19

¹ [1-2] “Kuga maka lalap aku ipesega-segandu? Getem pusuhku erkiteken ranandu.

³Enggo piga-piga kali aku isakitindu; la kin kam mela ngidah perbahanenndu bangku?

⁴Di ersalah gia aku, lit kin i je rugindu?

⁵Ulin akapndu kam asa aku, janah kiniseranku enda, akapndu jadi buktina, maka aku ersalah tuhu-tuhu.

⁶Tapi arus itehndu, maka la bujur perbahan Dibata bangku. Enggo itogengna siding i kelewetku, lako nangkap aku.

⁷Serko aku, “Kejam Dibata!” Tapi la lit si ngaloisa. Nderkuh aku mindo keadilen, tapi pernderkuhku la ibegiken.

⁸Enggo irambeng Dibata dalanku, igelapiNa pe, e maka aku lanai banci mentas arah e.

⁹Kebayaken irampasNa kerina, kemulianku pe icedakenNa.

¹⁰Arah apai pe aku irambasNa, desken ngeruah batang kayu ibahanNa. Pengarapenku iruahNa kerina, e maka bene me aku.

¹¹Pernembeh ate Dibata gara bangku, janah musuhNa kal akapNa aku.

¹²IsuruhNa tenteraNa merang aku, ikalina parik, ikepungna sapo-sapongku.

¹³Dibata kap mahanca maka aku itadingken senina-seninangku janah kalak si kutandai lanai akapna aku teman.

¹⁴Kade-kadengku ras temanku meriah, kerina enggo nilah;

¹⁵janah kalak si gelgel jadi temuengku, enggo ngelupaken aku genduari.

¹⁶Kudilo suruh-suruhenku, tapi la aku ialoina; aminna pe kupindo perkuah atena.

¹⁷Mutah ate ndeharangku nganggeh bau kesahku, sembuyakku la nggit ndeher perban ciga atena aku.

¹⁸Anak-anak pe nokoh-nokohi aku, adi tedis aku, itawa-tawaina aku.

¹⁹Kandu-kandungku kal pe ciga atena aku, kalak si kukelengi kal, enggo salih jadi imbangku.

²⁰Kulitku nari ngenca leket bas tulanku, narus-narus mate me aku.

²¹O teman-temanku, mekuah min atendu aku, sabap enggo mekelek pengkenai tan Dibata aku.

²²Engkai maka ikut-ikutndu Dibata erbahan ateku mesui? Langa kin akapndu bias erbahan mesui pusuhku?

²³Oh, isuratken min kata-katangku i bas kitap, gelah iinget kalak pagi lalap.

²⁴Tah iukir min i bas batu alu pahat besi, gelah asa ndigan pe ola masap nari.

²⁵Tapi kueteh kap maka i Surga lit penebusku, janah kedungenna reh me Ia nampati aku.

²⁶Aminna kulitku enggo ipan penakit kerina, kuidah me Dibata, asum aku i bas kulangku enda denga.

²⁷Alu matangku jine pagi Ia kuidah, janah lanai Ia pagi bagi kalak man bangku. Bene ukurku sabap nindu ngerana,

²⁸‘Uga ndia sibahan gelah mesui atena?’ Idaramindu dalan lako nerang aku.

²⁹Tapi genduari mbiarlah kam man pedang, pedang si maba ukumen Dibata erkiteken dosa, gelah itehndu maka lit kap Dibata si ngadili manusia.”