Read Batak Karo JOP 2 Bible Online

JOP 2 - Batak Karo bible

JOP 2

¹Kenca enggo seh warina malekat-malekat ngadap TUHAN, Iblis pe ikut ras malekat-malekat e.

²Nungkun TUHAN man Iblis nina, “I ja nari kam ndai?” Ngaloi Iblis, “Erdalan-dalan ku jah ku jenda niar-niari doni.”

³“Iperdiatekenndu ka nge suruh-suruhenku Jop?” nina TUHAN nungkun. “La lit sekalak pe i babo doni si bagi ia patuhna ras ulina. Isembahna Aku janah la lit kai pe si jahat ilakokenna. Iendik-endikndu Aku mbarenda gelah Kubere kam meneken ia aminna gia la ersebap, tapi Jop tetap nge patuh bagi si gelgel.”

⁴Nina Iblis njabapsa, “Keri gia kai pe labo akap kalak dalih guna ngkelengi kesahna.

⁵Tapi genduari, bicara isakitiNdu badanna, ugapa pe isumpahina nge Kam i adep-adepenNdu!”

⁶E maka nina TUHAN man Iblis, “Merandal! Genduari ia i bas kuasandu, tapi la banci ibunuhndu.”

⁷Kenca bage lawes Iblis i bas adep-adepen TUHAN nari. Ipeturahna ugah mekelek i bas kula Jop mulai i bas tapak-tapak nahena nari terus ku piseranna.

⁸E maka kundul Jop deherken ingan pembuangen sampah, janah ibuatna pecah-pecah kudin taneh nggergoi ugahna.

⁹Nina ndehara Jop man bana, “Lalap denga kin atendu erkemalangen man Dibata? Sumpahilah Ia, jenari mateken bandu!”

¹⁰Erjabap Jop nina, “Si sea-sea kuakap cakapndu e pe! Adi ibereken Dibata si mehuli, meriah siakap. Uga banci kita jungut-jungut adi iberekenNa kiniseran banta?” I bas si e kerina, aminna gia Jop i bas kiniseran, la lit ibelaskenna cakap si la mehuli kerna Dibata.

¹¹Lit telu kalak teman Jop, e me Elipas i kuta Teman nari. Bildat i negeri Suah nari, ras Sopar i negeri Maama nari. Kenca ibegi kalak enda uga sangatna kiniseran Jop, ipersadana arihna ndahisa ras ngapulisa.

¹²Kenca itandaina, minter kalak ndai tangis ras ngandung. Icaingkenna uisna perban cedana atena, jenari icaburkenna abu ku das ras ku takalna.

¹³Kenca bage kundul ia i babo taneh ras Jop pitu wari pitu berngi alu la ngerana sengkebabah pe sabap enggo idahna uga sangatna kiniseran Jop.