Read Batak Karo JOP 21 Bible Online

JOP 21 - Batak Karo bible

JOP 21

¹ [1-2] “Dengkehkenlah cakapku, e lah gia pengapul si iberekenndu bangku.

³Bere aku ngerana lebe genduari, jenari, adi bage atendu banci ka aku igombang-gombangindu mulihi.

⁴Labo ras manusia aku erjengil, e maka bujur nge adi la gia aku sabar.

⁵Pernehenlah aku, tentu jengang kam ngidahsa; itutupndu babahndu, lanai terbanndu ngerana.

⁶Adi kuukuri kai si jadi man bangku, nggirgir aku, birawan kal aku, bene ukurku.

⁷Engkai maka ibere Dibata kalak jahat nggeluh, cawir metua, dingen ertana ertambah-tambah?

⁸Idahna anak-anakna sikap geluhna, janah kempu-kempuna idahna seh mbelin.

⁹Dibata la mereken cilaka bana, janah la lit si man kebiaren i bas jabuna.

¹⁰Merih asuh-asuhenna, indung lembuna nubis alu la mesera.

¹¹Anak kalak jahat senang akapna gawah-gawah, desken rarasen anak biri-biri, erguro-guro alu meriah.

¹²Rikutken sora kulcapi ras gendang sarune, landek-landek ia kerina janahna rende.

¹³Kidekah geluhna senang akapna, janah entabeh akapna tupung matena.

¹⁴Tapi ia nge si ngatakenca man Dibata, “To lawes, tadingkenlah kami; la kami perlu metehsa kai sura-suraNdu i bas kegeluhen kami.”

¹⁵Iakapna la lit ertina nembah man Dibata, la lit gunana ertoto man baNa.

¹⁶Erkiteken gegehna jine akapna maka ia bayak; tapi perukuren si bage, kuakap salah dingen lepak.

¹⁷Lit kin lampu kalak jahat inimpeti Dibata? Ntah ikernepkenNa salu cilaka? Lit kin ate Dibata merawa bana, seh maka ia iukumNa?

¹⁸Lit kin ia desken nggala iembusken angin, ntah pe bagi abu si ikabangken angin kalisungsung?

¹⁹Nindu njabapsa, “Anakna pagi iukum erkiteken dosa bapana.” La tuhu! Ise erdosa, e lah iukum Dibata. Icidahken Dibatalah man bana, maka ia iukum erkiteken dosana.

²⁰Si erdosa e lah nanggung ukumenna. Ialah ngenanami pernembeh Dibata si Mada kuasa.

²¹Sabap kenca mate manusia, ma lanai diatena kai jadi man kesusurenna?

²²Ngasup kin manusia ngajari Dibata, sedangken Dibata nge si ngadili isi Surga?

²³ [23-24] Lit deba mate sanga ia mejuah-juah dingen megegeh denga, alu teneng dingen dame itadingkenna doni enda.

²⁵Deba, asum ia mate, seh kal akapna pagitna, janah kesenangen la enggo inanamina.

²⁶Tapi i kuburen, radu terdang nge kerina, jenari iulung-ulung bernga.

²⁷Si tuhuna kutandai nge perukurenndu, kueteh nge rencanandu nalahken aku.

²⁸Nindu nungkun, “I ja dage rumah pengulu gelgel e, kalak si ngelakoken kejahaten e?”

²⁹La kin enggo isungkunndu kalak si dauh perdalanna? La kin itehndu kai si iturikenna?

³⁰Iturikenna tupung Dibata merawa nehken ukumen, kalak jahat tetap iselamatken.

³¹La lit si e pang ngaduken kejahatenna, tah pe erbalas nandangi perbahanenna.

³²Asum itaruhken ia ku kuburen, kuburenna ijaga dingen iperdiateken.

³³Kalak si naruhken ia la tanggung teremna, janah gabur megabur namburi bangkena.

³⁴Dage pengapulndu e, pengapul si la erguna, janah jabapndu ndai guak kerina.”