Read Batak Karo JOP 22 Bible Online

JOP 22 - Batak Karo bible

JOP 22

¹ [1-2] “Erguna kin manusia enda man Dibata? Lang! Kalak pentar erguna man dirina saja ngenca. [16†]

³Payo gia lagu langkahndu, erguna kin man Dibata? Mehuli gia kam, untung kin man baNa?

⁴Labo perban biarndu man Dibata maka kam irawaiNa dingen iadiliNa,

⁵tapi erkiteken enggo melala dosandu, janah la erngadi-ngadi jahat perbahanenndu.

⁶Ipaksandu seninandu nggalar utangna, seh irampasndu kerina pakenna.

⁷Man kalak si ngelabuh la kam nggit mereken lau inemen, kalak si kelihen la iberendu nakan.

⁸Ipakendu jabaten ras kuasa, guna ngkuasai taneh e kerina.

⁹La kam nggit nampati diberu balu-balu, janah anak melumang pe ibahanndu rate mesui.

¹⁰Erkiteken si e, genduari siding kerina i sekelewetndu, janah aru ate rempet ndemi pusuhndu.

¹¹Suarindu enggo gelap, kai pe la idahndu, janah kam enggo gedap, i bas lau belin si erderu.

¹²Ma Dibata ringan i langit si meganjangna? Janah lako ngidah bintang-bintang si meganjang pe ku teruh nge itatapNa.

¹³Erkiteken si e nindu, “Kai kin pemeteh Dibata? Ia terbuni i bas embun; dage kuga nina ngadili kita?”

¹⁴Iakapndu erkiteken embun nutupi Ia, kai pe la idahNa asum Ia erdalan arah perdemun langit ras doni enda.

¹⁵Tetap kin atendu ngikutken dalan si la mehuli, si idalani kalak jahat nai-nai nari?

¹⁶Aminna langa pe seh paksana, lau belin enggo ngombakken ia.

¹⁷E me kalak si nulak Dibata, si erpengakap maka kai pe la banci ibahan Dibata bana.

¹⁸Si tuhuna, maka ia bayak, Dibata nge erbahanca; perukuren kalak jahat, tuhu-tuhu la kuangka.

¹⁹Meriah akap kalak bujur tawa, ngidah kalak jahat ndatken ukumenna.

²⁰Sikerajangen kalak jahat ikernepken kerina, jenari keri ipan api kai si tading denga.

²¹Dage o Jop, erdamelah kam ras Dibata olanai musuhi Ia; adi bage perbahanenndu, tentu kam ipasu-pasuNa.

²²Alokenlah pengajarenNa bandu, buniken kataNa i bas pusuhndu.

²³Mulihkenlah ku Dibata alu meteruk ukur, kejahaten si lit i bas rumahndu olanai usur-usur.

²⁴Ambekken emasndu, benterken ku alur lau belin si erbatu-batu.

²⁵Bahanlah Dibata si Mada Kuasa jadi emas ras pirakndu si meherga.

²⁶E maka lalap kam erpengendes man Bana, janah ietehndu maka kerina keriahenndu i bas Ia sumbulna.

²⁷Adi ertoto kam man baNa, ibegikenNa kam, kai si enggo ipadankenndu man baNa, banci igalarindu.

²⁸Kai si irencanakenndu seh kerina, janah dalanndu iterangi sinalsal si seh kal harharna.

²⁹Sabap kalak si meganjang ukurna, ipeteruh Dibata, tapi si meteruk ukurna, iselamatkenNa.

³⁰IpulahiNa kam adi la lit salahndu, adi bujurlah perbahanenndu.”