Read Batak Karo JOP 23 Bible Online

JOP 23 - Batak Karo bible

JOP 23

¹ [1-2] “Seh genduari pe tetap denga kulawan Dibata dingen kujunguti, ndehereng aku sabap lanai tertahan nari.

³Oh, bicara kueteh min i ja Ia genduari, tentu minter Ia kujumpai.

⁴E maka kuturiken perkarangku enda i lebe-lebeNa, kuturiken kebujurenku man baNa.

⁵Kuga jabapNa, mesikel aku megisa, janah kai kataNa, merincuh aku ninggelkenca.

⁶IlawanNa nge ndia aku alu gegehNa si mbelin? Lang! Tentu ibegikenNa nge kata si kubelasken.

⁷Bujur kap aku; e maka iadep-adepenNa banci kubela bangku, jenari ikatakenNa me, maka asa lalap pulah aku.

⁸Enggo kudarami ku kenjulu ku kenjahe, tapi la Ia i je.

⁹Kudahi ku inganNa erdahin i Selatan ras i Utara tapi la kuidah Ia.

¹⁰Tapi iteh Dibata nge perjingkangku, adi iujiNa aku, itehNa me maka aku bersih tuhu-tuhu.

¹¹Kuikutken dalan si ipilihNa alu patuh, janah la pernah aku nilah.

¹²Kai si iperentahken Dibata tetap kulakoken, labo sura-surangku, tapi sura-suraNa nge kuikutken.

¹³Ibahan Dibata keputusen, ise pe la ngasup ngobahsa. Uga sura-suraNa, bage idalankenNa.

¹⁴Kai si enggo irencanaken Dibata kerna aku tentu isehkenNa; janah rencana si bage melala denga i bas Ia.

¹⁵Adi kuukuri kerna si e seh kal biarku nandangi Ia, nggirgir aku iadep-adepenNa.

¹⁶ [16-17] Dibata si Mada Kuasa kap mahanca aku percikcik, erkiteken Dibata nge maka aku bicuk, labo erkiteken kegelapen e, aminna gia aku enggo pentang ibahan kegelapen e.