Read Batak Karo JOP 24 Bible Online

JOP 24 - Batak Karo bible

JOP 24

¹Engkai maka itetapken Dibata sada wari pengadilen, maka kalak si nembah man baNa ndat keadilen?

²Lit kalak si miserken baleng, gelah tanehna jadi mbelang. Biri-biri kalak itangkona, jenari itamakenna ku rarasen biri-birina.

³Kelede anak melumang ibabakenna, lembu diberu balu-balu itagangina seh tergalarisa utangna.

⁴Iambatina kalak musil ndatken sikerajangenna, e maka la banci lang cebuni kalak si mesera geluhna.

⁵Dage kalak musil enggo bagi kelede kerangen, si ndarami nakan i bas taneh mesawang kelegon, sabap lanai lit inganna si deban, ndatken nakan man anak-anakna si kelihen.

⁶Juma kalak si deban la banci lang iperanina, janah buah anggur kalak jahat ipumahina.

⁷Gedang-gedang berngi medem ia la ruis, mbergeh pe akapna cabinna la lit.

⁸Kerina dagingna litap erkiteken udan i deleng, janah perban la lit inganna cio, ipedegesna dagingna ku lingling.

⁹Iperkawanken kalak jahat anak melumang si kitik denga, janah anak kalak musil ibuatna man penggalar utangna.

¹⁰Tapi kalak musil la banci lang lawes alu la lit uisna, tupung rani gandum i juma-kalak, melihe akapna.

¹¹Itutuna buah saitun muat minakna, ierikna buah anggur muat launa, tapi ia jine kote perban muasna.

¹²I bas kuta-kuta ndehereng kalak si menam mate, kalak si luka-luka pe nderkuh mindo penampat, tapi pertotonNa la sitik pe diate Dibata.

¹³Lit kalak si erlawanen geluhna ras terang; terang e la itandaina, janah la ikutkenna dalan terang.

¹⁴Kalak pemunuh keke sanga wari gelap denga, jenari luar ia munuh kalak musil ras si mesera; adi berngi enggo seh ka, bagi sekalak pinangko, nuruk-nuruk ia.

¹⁵Nima-nima wari gelap, lanai sabar perlua-lua, gelah ola itandai kalak, itamburina ayona.

¹⁶Pinangko mongkar rumah sanga berngi; la atena ngena terang, e maka suari lawes ia cebuni.

¹⁷Ngidah matawari pultak erpagi-pagi, mbiar ka ia, tapi berngi si gelap si mejin, ngena kal atena.”

¹⁸“Kalak jahat bene iombakken lau mbelin, taneh si jadi baginna isumpahi Dibata; peken anggurna enggo melungun, buah anggurna lanai lit si ngeriksa.

¹⁹Bagi salju masap kena lego ras las matawari, bage me kalak perdosa isasapken i bas doni kegeluhen nari.

²⁰Bernga mangani dagingna, nandena pe ngelupaken ia, gelarna lanai lit si ngingetsa, desken kayu mbulak, ia ikernepken Dibata.

²¹Si e jadi sabap nandangi diberu balu-balu kejam ia, janah diberu si la banci mupus, rate mesui ibahanna.

²²Alu kuasaNa, ibunuh Dibata kalak si mbisa, keke Dibata ngelawan, e maka bene pengarapen kalak si la mbiar baNa.

²³Banci jadi ipelepas Dibata ia nggeluh senang, tapi perbahanenna la erngadi-ngadi iperdiateken.

²⁴Kentisik ngenca senang geluhna, jenari seh rasa lalap bene ia; ia melus desken dukut-dukut, desken ruhi page si enggo ikeret.

²⁵Ise pe ngatakenca maka tuhu katangku enda, janah la lit sitik pe lepakna.”