Read Batak Karo JOP 26 Bible Online

JOP 26 - Batak Karo bible

JOP 26

¹ [1-2] “Oh, mbelin ka nge penampatndu bangku e, aku si la ergegeh sangana kote.

³Merandal kal kerina pedah-pedahndu, enggo iberekenndu pemeteh si mbages man bangku kalak motu.

⁴Ise ngajari kam melasken kerina kata-kata e bangku? Ise mereken ukur man bandu maka bage pengerananndu?”

⁵“Nggirgir begu si mate bage pe lawit i teruh, rikut ras si ringan i je.

⁶Doni kalak mate talang i lebe-lebe Dibata la lit si terbuni i bas pengidahNa.

⁷Ikimbangken Dibata langit Utara, dingen i bas si la lit doni isangkutkenNa.

⁸ItimpusNa lau alu embunNa, janah amin mberat pe lau e, embun la merigat ibahanNa.

⁹ItutupiNa ayo bulan purnama alu embun si ikimbangkenNa.

¹⁰Alu ampang-ampang si ibahanNa i babo lawit si mbelang isirangkenNa gelap ras terang.

¹¹Asum binangun langit isergangiNa, nggirgir mugur-ugur kerina ban biarna.

¹²Lawit si mbelang italukenNa alu kuasaNa alu kepentarenNa, naga Rahap iperperkenNa.

¹³Isapuina langit alu KesahNa e maka seh kal terangna naga si sangana lompat ipantemNa salu tanNa.

¹⁴Kerina si enda tanda kuasaNa saja kap ngenca, desken kusik-kusik si seh ku cupingta. Tapi ise kin ngasup ngangkasa uga belinna kuasa Dibata si bagi sora lenggur gangna?”