Read Batak Karo JOP 27 Bible Online

JOP 27 - Batak Karo bible

JOP 27

¹ [1-2] “I bas gelar Dibata si Mada Kuasa si nggeluh, si la mereken keadilen bangku, si erbahanca pagit geluhku, ersumpah aku:

³kidekah aku nggeluh denga, kidekah ibere Dibata denga aku erkesah,

⁴biberku la nggit melasken kata la tuhu, dilahku la nggit melasken tipu.

⁵Ndigan pe la aku nggit ngatakenca maka kam benar janah ngayak mate tetap aku ertahan maka aku bujur.

⁶Tetap aku ertahan maka aku kalak bujur tuhu-tuhu pusuh peratenku si melikas la nalahken aku.

⁷Asa kai musuh-musuhku ras si ngelawan aku, kena ukumlah bagi kalak jahat ras penipu.

⁸Kai nari kin pengarapen kalak si la erdibata, tupung ibuat Dibata kesahna?

⁹Ibegiken Dibata kin pernderkuhna, tupung kiniseran reh ndumpang ia?

¹⁰Arusna kin tedeh atena nandangi keriahen Dibata, dingen la erngadi-ngadi ertoto man baNa?

¹¹Mari, maka kuajari kam kerna belinna kuasa Dibata, dingen kuturiken kai si enggo irencanaken Dibata si Mada Kuasa.

¹²Tapi si tuhuna kam pe enggo ngidah si e kerina; dage ngkai maka perukurendu bage rembona?” Sopar,

¹³“Bagenda me ukumen si ibahan Dibata si Mada Kuasa, nandangi kalak jahat dingen merawa.

¹⁴Aminna nterem pe anakna, mate pagi kerina i bas peperangen. Janah asa kesusurenna, nggeluh i bas kekurangen.

¹⁵Si tading denga, mate kena penakit laya-laya, janah ndeharana pe la nangisi kematenna.

¹⁶Aminna ergun-gun pe pirakna, janah uisna pe lanai terkira,

¹⁷tapi uisna si mbue e, kalak bujur makesa, janah pirakna, kalak si pinter ukur muatsa.

¹⁸Rumah si ipajekken kalak jahat desken banto lawah-lawah, bagi sapo-sapo kalak si ngiani juma, la nteguh.

¹⁹Tupung ia lawes medem si perpudina, bayak kal ia, tapi asum ia medak, enggo lesap kebayakenna.

²⁰Kebiaren rempet reh ku ia desken banjir si mbelin, tupung berngi lesap ia iembusken angin.

²¹Angin rembus i Timur nari engkabangken ia, i bas rumahna nari, isapuna ia.

²²Kiam ia, ingan cebuni idaramina, tapi angin e ngeradasken ia alu la erkuah ate.

²³Tupung ia kiam, angin erdeso-deso nderpa ia, mbiar dingen gentar ia ibahan angin si megegeh ngkernepken e.”