Read Batak Karo JOP 28 Bible Online

JOP 28 - Batak Karo bible

JOP 28

¹Pirak banci idat i bas pertambangen, janah emas pe lit inganna i ja ia ianai.

²Besi ikali i bas taneh nari, tembaga ilebur i bas batu nari.

³Ingan si gelapna pe idalani manusia, lubang si mbagesna i bas taneh pe isiksikna; i bas ingan si gelap e nari, manusia ngkali batu-batu si terbuni.

⁴Ndauh sirang ras ingan manusia, i bas ingan si la pernah idedeh nahe jelma, i bas liang si mbages dingen mesuni, manusia erdahin janahna cerawis-cerawis i bas tinali.

⁵Pangan manusia turah i bas taneh nari; tapi arah teruh taneh e, kerinana getem bagi si ipan api.

⁶I bas batu taneh lit sapir si meherga, janah i bas abuna lit emas suasa.

⁷Dalan ku pertambangen e, kuliki pe la ngidahsa, janah liat-liat pe la pernah kabang arah babona.

⁸Singa tah rubia-rubia meliar si deban pe, la pernah erdalan arah dalan si melungen e.

⁹Batu si piher ikali manusia, deleng-deleng ikurukna arah palasna.

¹⁰Asum ia erbahan liang arah deleng batu, ijumpaina erbage-bage permata si meherga tuhu-tuhu.

¹¹Isiksikna terus ku ulu lau belin arah gugung, janah kai si terbuni italangi kempak terang.

¹²Tapi i ja banci idat kepentaren? I ja ingan erlajar gelah dat pengertin.

¹³Kepentaren la lit ijumpai i bas manusia, ergana si tuhu-tuhu, la ise pe metehsa.

¹⁴Kelbung ras lawit si mbages ngatakenca maka kepentaren la lit i bas ia.

¹⁵Kepentaren la tertaktaki ergana, la tertukur subuk salu emas tah pirak gia.

¹⁶Emas murni ras permata intan, la ngasup ngimbangi ergana kepentaren.

¹⁷Ergan ia asangken emas tulen, lebih asangken kaca halus tah pe emas perhiasen.

¹⁸Ndauh kal ergan ia asangken bunga karang, kristal, tah pe mutiara.

¹⁹Batu topas si mejilena pe ras emas tulen, la terpeseri ras ergana kepentaren.

²⁰I ja dage sumbul kepentaren? I ja ingan ndatken pengertin?

²¹Si nasa nggeluh la pernah ngidahsa, perik-perik kabang pe langa.

²²Ingan begu ras doni kematen pe ngatakenca, maka sora kusik-kusik ngenca ibegina.

²³Dalan ku kepentaren, Dibata ngenca metehsa; itehNa i ja ingan ndatkenca.

²⁴Sabap seh ku tampuk doni idahNa kerina, asa si lit i teruh langit la terligen man baNa.

²⁵Tupung ibereken Dibata gegeh man angin, janah asa kai belangna lawit pe itentuken,

²⁶asum itetapkenNa i ja ingan ndabuhna udan, janah arah apai kilap erdalan,

²⁷tupung si e me idah Dibata kepentaren, janah kenca iujiNa, ipujikenNa kepentaren.

²⁸Nina Dibata man manusia, “Erkemalangenlah man Dibata, maka kam pentar, silahkenlah si jahat, maka dat kam pengertin.” [17†]