Read Batak Karo JOP 30 Bible Online

JOP 30 - Batak Karo bible

JOP 30

¹Tapi genduari aku igombang-gombangi kalak si nguda. Nai, la kuakap lit erga kai pe bapana. E maka ras biang permakan biri-biringku pe la kubere ia.

²Man bangku la lit ia gunana, sabap enggo lesap kap gegehna.

³Geluhna mesera, kekurangen dingen kelihen, seh maka ikilkilina urat kayu kerah-kerah i gurun si melungen.

⁴Dukut-dukut si turah i gurun pasir iruahna, jenari ipanna uratna aminna gia la lit nanamna.

⁵Ipelawes kalak ia i bas jelma si nterem nari, desken sekalak pinangko, ia isuraki.

⁶Terpaksa gua-gua man inganna tading, i bas lubang si ikali i bas taneh, tah i bas lingling.

⁷I bas taneh si mesawang erbaung ia bagi rubia-rubia, i teruh rambah-rambah, munpun ia ras teman-temanna.

⁸O kalak si la lit ergana, la lit gelarna, kalak si ipaksa lawes nadingken negerina.

⁹Tapi genduari aku enggo jadi kuan-kuanna, jadi pertawa-tawan ibahanna.

¹⁰Perban ciga atena aku, ndiri-ndiri ia, alu la alang-alangen ayongku icidurina.

¹¹Erkiteken enggo kote dingen ipeteruk Dibata aku, e maka rate-ate kalak ndai ngelawan aku.

¹²Iteremina nerang aku i lebe nari, e maka terpaksa aku kiam. Genduari sangana ersikap-sikap ia, gelah aku dung ikernepkenna.

¹³Dalanku pulah ipeltepkenna, iusahakenna meneken aku, janah ise pe la lit si ngolangisa.

¹⁴Desken banjir si mbelin, irontaskenna bide pertahanenku. Gelah aku getem, iraskenna ndedehi aku.

¹⁵Aku talu i bas kearun; kehaganku enggo masap desken ikabangken angin, janah kesenangenku pe lesap desken perlesap embun.

¹⁶Genduari mate me aku, sabap tep-tep wari itindih kiniseran aku.

¹⁷Adi berngi kerina tulan-tulanku mesui, suina ngetep-ngetep la erngadi-ngadi.

¹⁸Itangkap Dibata kerahung bajungku, seh maka aku enggo icekak uisku.

¹⁹IbenterkenNa aku ku bas kubang, enggo bali ergangku ras sampah.

²⁰O Dibata, erlebuh aku baNdu, tapi la ialoiNdu, pertotonku pe la diateNdu.

²¹Kejam kal Kam bangku; idehkenNdu aku asa gegehNdu.

²²IpelepasNdu aku ikabangken angin, iotar-otarNdu aku alu angin kaba-kaba.

²³Kueteh maka ibabakenNdu aku ku kematen, ku ingan kerina kalak si nadingken kegeluhen.

²⁴Engkai maka la idadakenNdu tanNdu nampati aku si ndabuh, si terpaksa mindo-mindo ate mekuah?

²⁵Ma tangis kin gelgel aku ras kalak si kesusahen, janah erkuah ate man kalak si kekurangen?

²⁶Ngarap kal aku mbarenda dat terang ras keriahen, kepeken si reh e me kegelapen ras kesusahen.

²⁷Pusuhku getem erkiteken aru ate ras si mesui, kiniseranku ertambah-tambah tep-tep wari.

²⁸Erdalan-dalan aku alu ceda ate, teman si ngapuli, lanai lit sekalak pe. Tedis aku i tengah jelma si pulung, man bana kupindo penampat janahku ngandung.

²⁹Ise pe lanai lit jadi temanku ngerana, seakatan serigala ras perik unta ngenca.

³⁰Kulitku enggo salih jadi mbiring janah melengas, tulan-tulanku enggo kerah erkiteken kulangku melas.

³¹Gelgel nari biasa kubegi sora kulcapi ras suling si meriah, genduari enggo salih jadi tangis-tangis ras morah-morah.