Read Batak Karo JOP 31 Bible Online

JOP 31 - Batak Karo bible

JOP 31

¹Ersumpah aku i bas pusuhku jine, ndigan pe la kutatap singuda-nguda alu mengga ate.

²Kai kin ndia si ilakoken Dibata nandangi kita? Kuga ndia pembalasNa perbahanen manusia?

³Man kalak si erbahan kejahaten, idabuhken Dibata cilaka ras kecedan.

⁴Kai si kulakoken ieteh Dibata, tiap aku njingkang la lepas i bas pengidahNa.

⁵Ersumpah aku maka si jahat la enggo kulakoken, janah la pernah pe kutipu kalak si deban.

⁶I bas timbangen si bujur banci itimbang Dibata aku, i je tentu idahNa maka sitik pe la lit kesalahenku.

⁷Adi pernah kin aku nilah i bas dalan si benar nari, ntah pe si jahat ateku ngena, adi tanku melket ibahan dosa,

⁸di bage, banci kalak si deban mangani si kuerdangken, banci ikernepken kai si enggo kusuan.

⁹Adi pernah kin pusuhku leket nandangi ndehara kalak, janah alu erbuni-buni kutimai ia i lebe-lebe pintun,

¹⁰di bage banci ndeharangku nanggerken nakan kalak, janah medem ia i bas ingan medem dilaki si deban.

¹¹Sabap kejahaten si bage tuhu-tuhu man kemelanken, janah arus iukum alu kematen.

¹²Dosa si bage desken api naraka, si ngkernepken kinilitenku kerina.

¹³Adi jungut-jungut suruh-suruhenku, erkiteken la adil perbahanenku, kudengkehken keberatenna, janah bujur kubahan bana.

¹⁴Di la bage, kuga pagi ningku jumpa ras Dibata? Tupung reh Ia pagi ngadili aku, kai pagi jabapku baNa?

¹⁵Ma kin Dibata si nepa aku enda, Ia pe si nepa suruh-suruhenku kerina?

¹⁶Adi kalak musil mindo penampat, la pernah ia kutulak. Janah diberu balu-balu pe la kupelepas erndele ate.

¹⁷Nakanku la kupangani sisada, tapi man anak melumang pe kubereken deba.

¹⁸Kupebelin-belin ia kitikna nari, janah kitikna nari kuajari.

¹⁹Adi lit kuidah kalak si mesera geluhna, si la ngasup nukur paken perban musilna,

²⁰minter melas akapna kubahan alu uis mbulu biri-biringku jine, e maka ikatakenna bujur i bas pusuhna nari.

²¹Adi pernah kin kutipu anak melumang, erkiteken kueteh adi erpekara ugapa pe aku menang,

²²di bage banci penggelken saja tanku, maka sirang ras barangku.

²³Sabap mbiar kap aku man Dibata, e maka labo aku ngasup ngelakoken si bage tempasna.

²⁴La pernah aku ernalem man ertangku,

²⁵tah meganjang ukur kerna kebayakenku.

²⁶Matawari si harhar la pernah kusembah, bage pe bulan si terang rikutken jilena.

²⁷La pernah aku papak ibahan si e kerina, tah kuema tanku pemuliakenca.

²⁸Dosa si bage arus iukum alu kematen, sabap Dibata si meganjangna enggo ipersilahangken.

²⁹La pernah kuakap meriah adi imbangku kena mara, tah puas kuakap adi ia dat cilaka.

³⁰La pernah kutotoken gelah imbangku mate, la aku nggit mahan dosa si bage.

³¹Kerina si erdahinku metehsa, maka ise pe kualo-alo man panganku asa besurna.

³²Kudilo ku rumahku kalak si lit i bas perdalanen, janah la kupelepas ia medem i bas dalan.

³³Kalak si deban, ibunikenna dosana, tapi adi aku, la aku nggit nutupisa.

³⁴Kai gia ikataken kalak, la mbiar aku. Penguru-nguru jelma si nterem, la ateku aru. E maka adi sinik tah kem i rumah, la nggit aku.

³⁵La kin ise pe nggit megiken katangku? Ersumpah aku maka kerina kata-katangku tuhu. Ialoi Dibata si Mada Kuasa min aku. Bicara lit min surat pengadun ibahan imbangku, maka kerina pengadunna e banci kuidah,

³⁶tentu megah kuakap nama suratna e i bas barangku, janah kutamaken i bas takalku jadi mahkotangku.

³⁷Jenari kai si enggo kubahan kuturiken, man Dibata, janah i lebe-lebeNa ngerana aku desken sekalak raja.

³⁸Adi kurampas kin mbarenda taneh si kuperjumai, janah kubuat i bas empuna si tuhu-tuhu nari,

³⁹adi enggo kukeriken pangan si turah i je, jenari kupediat perjuma si nuanisa lumben seh mate;

⁴⁰di bage, ola gia page tah jaung si turah i je, tapi rih ras dukut-dukut saja gia pe.” Sibar e ngenca kata-kata Jop.