Read Batak Karo JOP 32 Bible Online

JOP 32 - Batak Karo bible

JOP 32

¹Erkiteken bujur kal iakap Jop man bana, e maka ngadi temanna si telu kalak ndai njabapisa.

²Tapi lit i je sekalak dilaki, Elihu gelarna. Ia anak Barakel, kesusuren Bus, i bas terpuk Ram nari. Lanai tertahan Elihu rawana sabap Jop mbenarken dirina janah Dibata isalahkenna.

³Nandangi teman Jop si telu kalak ndai pe nembeh ate Elihu, sabap la tertogansa kata-kata Jop, seh maka Dibata tempa si salah.

⁴Erkiteken Elihu si ngudana i je, e maka itimaina lebe kalak ndai kerina dung ngerana.

⁵Kenca idahna maka si telu kalak ndai lanai beluh njabap Jop, e maka merawa ia,

⁶jenari ibenakenna me ngerana. “Aku nguda denga, tuan kam asa aku, e maka mbiar aku ndai melasken ukurku.

⁷Ningku i bas ukurku, kam kap arusna si ngerana, si metua arus mereken kepentaren.

⁸Tapi si mereken kepentaren man manusia, Kesah Dibata si Mada Kuasa kap si tuhuna.

⁹Labo perban tuana maka kalak jadi pentar, labo erkiteken umurna enggo gedang maka itehna apai si benar.

¹⁰Dage genduari, begikenlah aku, maka kuturiken ukurku man bandu,

¹¹Alu saber kubegiken kerina percakapenndu, janah kutimai kam ndarami kata-kata si payo.

¹²Kupergermetken kal, kuidah maka enggo kam talu, kai si ikataken Jop la tersanggahndu.

¹³Kuga banci iakuindu maka kepentaren enggo idatndu, sedang Jop la tertalukenndu? Tapi Dibata kap si nalukenca labo manusia.

¹⁴Ndube nari man bandu kap ia ngerana, la man bangku, genduari ateku njabap ia, tapi la bali ras penjabapndu.

¹⁵O Jop, kam lanai terjabap kalak enda, enggo keri belas-belasna.

¹⁶Tedis saja ia, lanai lit si man katankenna. Dage, arus kin aku terus nimai adi enggo sinik ia kerina?

¹⁷Lang! Genduari erjabap ateku, janah kuturiken bandu ukurku.

¹⁸Kata-kata si ateku kubelasken seh lalana, pusuhku sedak nimai katawari baci ngerana.

¹⁹Adi la aku ngerana, sedak kari pusuhku, bali ras kantong kuling-kuling dem anggur si mbaru.

²⁰Aku arus ngerana, e maka teneng pusuhku, ersumekah ateku mereken jabapen.

²¹Ise pe labo kukapiti, ise pe la kupuji-puji.

²²Sabap labo aku beluh muji-muji pe, janah minter kap aku iukum Dibata, adi kulakoken si e.