Read Batak Karo JOP 34 Bible Online

JOP 34 - Batak Karo bible

JOP 34

¹ [1-2] O, kam kerina si pentar ras erpemeteh, dengkehken kai si kukataken.

³Adi icecap nge maka idat nanam pangan; bage pe adi idengkehken nge maka ierti kata kepentaren.

⁴Marilah siorati kai si benar, si tetapkenlah ras-ras apai si bujur.

⁵Enggo ikataken Jop maka la lit salahna, tapi la adil perbahan Dibata man bana.

⁶Tole nina Jop, ‘Perguak ikatakenndu aku, perban aku la erdosa ningku; genduari enggo mekelek ibahan Dibata ugahku, aminna pe la lit salahku.’

⁷Pernah kin idahndu jelma bagi Jop enda? La erngadi-ngadi iuru-uruna Dibata.

⁸Kalak jahat ibahanna man temanna meriah, janah ras kalak perdosa ia gawah-gawah.

⁹Ikataken Jop maka sitik pe labo lit untungna, adi ipala-palai pe ngikutken sura-sura Dibata.

¹⁰O kam si lit pengertindu, begikenlah! Nggit kin Dibata si Mada Kuasa mahan si salah?

¹¹Tentu lang; tapi ibalasNa man manusia sue ras perbahanenna, janah ilakokenNa man bana sue ras perlangkahna. [20†]

¹²Dibata si Mada Kuasa la nggit ngelakoken si jahat; janah man ise pe la pernah la adil perbahanNa.

¹³Bas ise nari kin ialoken Dibata kuasaNa? Ise kin ngendesken doni enda baNa?

¹⁴Adi ibuat Dibata mulihi kesah kegeluhen,

¹⁵tentu kerina manusia mate, janah salih mulihi jadi abu.

¹⁶Genduari adi lit kin pengertinndu, begikenlah katangku.

¹⁷Pang kam nalahken Dibata si Bujur ras Medolat e? Akapndu kin ciga ateNa keadilen?

¹⁸Iukum Dibata raja-raja si la terpake, bage pe penguasa-penguasa si ngelakoken kejahaten.

¹⁹La ikapitiNa penguasa-penguasa, janah la akapNa ergan kalak bayak asa kalak si kekurangen, sabap Ia nge si njadiken kerina manusia.

²⁰I tengah berngi, manusia banci rempet mate, iukum Dibata ia, e maka masap ia dingen bene, janah murah saja nge akapNa munuhsa subuk kalak mbisa pe.

²¹IperdiatekenNa kerina langkah manusia, idah Dibata kerina perdalanenna.

²²La lit ingan si gelap, aminna kugapa pe gelapna, si banci man ingan cebuni kalak perdosa.

²³La perlu itentuken Dibata paksana, ndigan manusia reh iadiliNa.

²⁴La perlu iselidikiNa leben, guna mindahken si erkuasa janah nggantikenca alu kalak si deban.

²⁵Sabap kai si ibahan penguasa e iteh Dibata kerina, idabuhkenNa kuasana sanga berngi, jenari iripukkenNa.

²⁶Iukumna penguasa erkiteken kejahatenna, janah kerina kalak banci ngidahsa.

²⁷Sabap lanai iikutkenna Dibata, janah la diatena kerina perentahNa.

²⁸Kalak e me erbahanca si musil erlebuh man Dibata, janah Dibata megi pernderkuhna.

²⁹Adi sinik saja gia Dibata, ise banci nalahisa? Adi ibuniken Dibata ayoNa, tentu manusia lanai ngasup ngkawali dirina.

³⁰Di bage, kai pe lanai banci ilakoken bangsa-bangsa, gelah kalak si kejam si la erdibata ola jadi rajana.

³¹O Jop, enggo kin iakuindu dosandu man Dibata! Enggo kin kam erpadan maka lanai iulihindu erbahan dosa?

³²Enggo kin ipindondu gelah icidahken Dibata salahndu? Enggo kam ngaku maka salahndu e lanai iulihi?

³³Adi la akapndu payo perbahanen Dibata banci kin iarapkenndu i bas Ia nari atendu ngena? Genduari, kamlah erbahan keputusan, labo aku; kataken dage uga ukurndu.

³⁴Kalak si lit pengertinna tentu payo akapna; kalak pentar si megiken aku tentu ngatakenca,

³⁵kai si ibelasken Jop labo iangkana, janah kai si ikatakenna la lit ertina.

³⁶Ukurilah mbages-mbages kai si ikatakenna, tentu idahndu maka bagi kalak jahat pengeranana.

³⁷Tambah-tambah ia erdosa, Dibata pe ilawanna ka; megombang ia man Dibata, i lebe-lebenta kerina.