Read Batak Karo JOP 35 Bible Online

JOP 35 - Batak Karo bible

JOP 35

¹ [1-2] O Jop, si tuhuna labo payo adi ikatakenndu maka kam la ersalah i adep-adepen Dibata.

³Bage ka pe labo tengteng adi nindu, ‘Kai kin pengaruhna dosangku man Dibata? Janah kai nge untungna, adi la gia aku erdosa?’

⁴Genduari kujabap ateku kam kerina rikut ras teman-temanndu ena.

⁵Tare ku langit! Tentu idahndu uga ganjangna embun i das.

⁶Adi erdosa pe kam, labo kena kai pe Dibata. Adi rusur kam erbahan salah, ceda kin Ia? [21†]

⁷Bicara bujur gia kam, lit kin e nampati Dibata? I bas kam nari, labo lit kai pe si iperlukenNa.

⁸Temanndu manusia nge ngenca kena kesusahen erkiteken dosandu, janah adi mehuli perbahanenndu, e erguna man temanndu.

⁹Adi manusia itindes nderkuh ia, serko ia, gelah lit kalak si nampatisa.

¹⁰Tapi labo man Dibata ia robah, Dibata si Njadiken ia, si mereken pengarapen i bas paksa ate ceda.

¹¹Dibata si mereken ukur ras kepentaren man banta, ngelebihi perik-perik ras kerina rubia-rubia.

¹²E maka kalak si bage erlebuh pe ia, labo ialoi Dibata, sabap ia kalak jahat dingen meganjang ukurna.

¹³Sia-sia ia erlebuh man Dibata, sabap Dibata si Mada Kuasa labo mperdiateken pernderkuhna.

¹⁴ [14-15] Apai denga ka kam o Jop, sabap ikatakenndu maka Dibata la idahndu. Iakapndu Dibata la ngukum manusia, janah la iperdiatekenNa dosa. Tapi arus itehndu maka perkarandu enggo seh i adepenNa e maka timailah putusenNa.

¹⁶Sia-sia me mbue cakapndu sabap enggo tangkas labo iangkandu si ibelaskenndu.