Read Batak Karo JOP 4 Bible Online

JOP 4 - Batak Karo bible

JOP 4

¹ [1-2] “O Jop, kitik kin ukurndu adi ersumekah aku? Sabap sinik lanai terban aku.

³Enggo iajarindu nterem jelma dingen ipegegehindu kalak si kote.

⁴Adi lit kalak jongkang, kote dingen latih, rananndu pegegehisa gelah tedis ia.

⁵Genduari kam ka i bas kesusahen, tapi enggo bene ukurndu ngadapisa.

⁶Isembahndu Dibata, janah geluhndu sitik pe la lit man pandangen; dage arus min lit kinitekenndu ras pengarapenndu!

⁷Genduari cuba peinget-inget lebe; lit kin sekalaklah gia kalak bujur jumpa cilaka?

⁸Si asa kuidah, kalak si nenggalai juma kejahaten, si ngerdangken benih lagu la uli, e ka nge iperanina.

⁹Perban rawaNa, ikernepken Dibata ia, desken abu isempulkenNa ia.

¹⁰Kalak jahat erdengum desken singa si merawa, tapi ipesinik Dibata ia janah ipenggelkenna ipenna.

¹¹Desken singa si la lit man jerngemenna ras panganna, mate ia, janah kerina anak-anakna ikerapken.

¹²Sekali pernah seh berita desken sora kusik-kusik man bangku; perban manjarna menam la kubegi pe.

¹³Desken sada nipi jahat, igangguna pertunduhku. [5†]

¹⁴Nggirgir dingen gentar aku; kerina dagingku kumetter perban biarku.

¹⁵Angin si lumang rembus ku ayongku, jergal mbulu kudukku, mbiar kal aku.

¹⁶Lit kuidah sada tedis i lebe-lebengku; kupernehen, tapi la kueteh kai e. Sora kai pe la lit, jenari kubegi si ngerana nina,

¹⁷‘Banci kin lit kalak bujur i bas pengidah Dibata, ntah pe bersih i lebe-lebe si Nepasa?

¹⁸Suruh-suruhenNa si i Surga pe la terteki Dibata; i bas malekat-malekatNa pe idatca kesalahen.

¹⁹Akapndu kin Ia tek man si asalna i bas taneh nari, barang abu si banci ipilnatken bagi kutu?

²⁰Banci jadi manusia nggeluh erpagi-pagi, tapi ope denga gelap ia enggo mate, la diate kalak pe.

²¹Asa kai si lit i bas ia ibuat; mate ia, kepentarenna lalap la serta.’