Read Batak Karo JOP 41 Bible Online

JOP 41 - Batak Karo bible

JOP 41

¹Ngasup kam nangkap buaya Lewiatan salu kawil, tah ngiket dilahna salu tinali? [25†]

²Ngasup kam nustusken tinali arah igungna tah nebak isangna salu kawit-kawit besi?

³Nggit kin ia mindo alu meseksek gelah ipulahi, tah mindo perkuah atendu alu cakap mehuli?

⁴Nggit kin ia erpadan man bandu, maka asa lalap ia jadi suruh-suruhenndu?

⁵Banci kin ia itambat bagi perik piaranndu, jadi guro-guro suruh-suruhenndu si diberu?

⁶Banci kin ia ijajaken kalak penjala, janah ibagi-bagiken man kalak perbinaga?

⁷Ngasup kam mantemken lembing ku bas kulitna, tah nebakken tombak ku bas takalna?

⁸Jemak ia sekali saja lah gia, tentu ndigan pe lanai kam nggit ngulihisa; perbebenndu ras ia, asa lalap kam la ngasup ngelupakenca.

⁹Asa kalak si ngidah Lewiatan, minter bene ukurna, jenari ampar.

¹⁰Adi igasgasi, seh kal ia rawana, janah ise pe la pang tedis i lebe-lebena.

¹¹Lit kin kalak selamat si nerang ia? La lit sada pe si bage i belang-belang doni enda. [26†]

¹²Genduari, Kuturiken bandu kerna nahe Lewiatan e, kerna uga gegehna ia, ras bage pe kerna tempasna si mejile.

¹³La ise pe ngasup ngerigatken baju jubahna, tah multakken baju perang si ipakena.

¹⁴Ise ngasup nguak isangna si ngeskes megegeh? Dem salu ipen si seh mejinna.

¹⁵Gurungna, ampang-ampang si ersusun-susun melala, kerina leket alu rapat, janah bagi batu piherna.

¹⁶Perbahan rapatna sada ras si debanna, seh maka angin pe la siat arah kelang-kelangna.

¹⁷Bage teguhna perdemunna kerina, seh maka kai pe la ngasup nirangkenca.

¹⁸Adi kebacihen ia, teridah terang si erbinar-binar, matana ernala-nala, bagi matawari si sangana harhar!

¹⁹I bas babahna nari, luar gurlah api, bagi si isemburken, erbinar bunga api.

²⁰Cimber api nembur arah lubang igungna, desken asap lau luam i bas kudin i babo api si gara.

²¹Kesahna mahanca rara gara; i bas babahna nari ndarat jingar api si ernala.

²²Kudukna megegeh, birawan kalak di jumpa ras ia.

²³Jukut dagingna seh pesingna, desken besi tuangen, sitik pe la lit muyuk-uyukna.

²⁴Pusuhna mersik la meteh mbiar, paguh la terugur bagi batu nanggar.

²⁵Kalak si mbisa pe gentar adi keke ia, bene ukurna perban biarna.

²⁶La lit pedang si banci ngelukai ia, la lit tombak, panah tah lembing si banci nakitisa.

²⁷Besi, desken nggala akapna datena, tembaga, desken kayu buruk akapna melna.

²⁸Salu anak panah la terpelawes ia, batu kalimbawang, bagi segal saja akapna.

²⁹Palu-palu, bagi tangke page akapna, adi ipantemken lembing bana, tawa ia.

³⁰Sisik beltekna, bagi pecah-pecah kaca telapna; adi mentas ia arah kubang, bekasna bagi bekas gereta pengeriken.

³¹Lau lawit ibahanna erputar-putar bagi lau luam i bas kudin, igawerna bagi minak i bas kudin penggarun.

³²Bekasna mentas arah lawit erkinar-kinar. Janah ersiung jadi ugup mbentar.

³³La lit si bagi ia i doni enda, ia me mahluk si la lit kebiarenna.

³⁴Rubia-rubia si mehagana kal pe kitik nge akapna; ia nge raja i bas kerina rubia-rubia si merawa.”