Read Batak Karo JOP 42 Bible Online

JOP 42 - Batak Karo bible

JOP 42

¹Kenca bage ngaloi Jop man TUHAN nina,

²“Genduari kueteh TUHAN, maka kai pe ngasup kam ngelakokenca kai isuraNdu seh kerina.

³O, TUHAN marenda isungkunNdu aku, ngkai maka aku la tek nandangi kepentarenNdu adi pemetehku pe labo lit. Tuhu kal, enggo kucakapken si la kuerti, perkara-perkara si mejin si la kuantusi. [27†]

⁴IsuruhNdu aku megi-megi asum Kam ngerana, janah kenca si e gelah penungkunenNdu kucubaken njabapsa. [28†]

⁵Kepeken pemetehku kerna Kam, terjeng si ituriken kalak ngenca; tapi genduari, alu matangku jine, Kam enggo kuidah.

⁶Perban si e mela kal kuakap kerna kai si enggo kubelasken, erkadiola aku, e maka kundul aku i bas abu dapur ras abu taneh.”

⁷Kenca enggo dung TUHAN ngerana man Jop nina man Elipas, “Nembeh ateKu kam ras temanndu si dua e, erkiteken la payo kai si ikatakenndu kerna Aku; suruh-suruhenKu Jop la bagi kam e.

⁸E maka genduari buatlah pitu jenggi lembu ras pitu bajar biri-biri jenari dahilah Jop. Persembahken kerina asuh-asuhen e jadi persembahen tutungen guna dirindu. Jop kari notoken kam. Kubegiken pertotonna maka la kam Kujuruken aminna patut gia kam iukum sue ras kesalahenndu. Kai si ikatakenndu kerna Aku la tuhu; tapi Jop tuhu si ikatakenna.”

⁹Minter ilakoken Elipas, Bildat, ras Sopar kai si ikataken TUHAN, janah ibegiken TUHAN pertoton Jop.

¹⁰Jenari, kenca Jop ertoto guna temanna si telu e, senang ka mulihi geluhna ibahan TUHAN, janah iberekenNa man Jop kebayaken dua kali lipat buena asa si mbarenda. [29†]

¹¹Kerina senina-senina Jop ras turangna, bage pe teman-temanna si mbarenda, reh ndahi ia, janah ras ia man-man i bas rumah Jop. Iapulina Jop, janah ikatakenna maka ia pe kerina ikut rate ceda i bas kiniseran si enggo irehken TUHAN man bana. Sekalak-sekalak ia mereken duit ras sada cincin emas man Jop.

¹²Pasu-pasu si ibereken TUHAN man Jop kenca lepas kiniseranna e, lebih pe asangken si nai; biri-birina lit 14.000, untana 6.000, lembuna 2.000, ras 1.000 kelede.

¹³Anakna pe lit ka pitu dilaki ras telu diberu.

¹⁴Anak diberu si pemena ibahanna gelarna Jemima, si peduaken Kesia, janah si nguda Keren Hapuh.

¹⁵I belang-belang negeri e la lit diberu si bagi anak Jop e jilena. Man bana pe teluna ibereken bapana erta tading-tadingen bagi man turangna si dilaki.

¹⁶Jop nggeluh seratus empat puluh tahun nari kenca kiniseranna e, idahna denga kempu-kempuna bage pe anak-anak kempuna.

¹⁷Jenari mate Jop i bas umur si nggedang, cawir ia metua.