Read Batak Karo JOP 5 Bible Online

JOP 5 - Batak Karo bible

JOP 5

¹Lebuhkenlah o Jop. Lit kin si ngaloi kam? Lit kin malekat man inganndu mindo penampat?

²Kalak si longor ngenca, elem-elemna ngayak matena.

³Pernah kuidah kalak motu, si tempa la lit kebiarenna, tapi rempet kusumpahi rumahna.

⁴Anak-anakna ndigan pe lanai selamat; la lit ise pe si nampati ia i pengadilen.

⁵Kalak si kelihen mangani ulih juma kalak motu, subuk si turah i tengah duri pe, janah kalak si muas, iri ngenehen kebayakenna.

⁶Kejahaten labo i bas abu turahna, janah kesusahen pe labo ertunas i bas taneh.

⁷Lang! Manusia nge si ngelegi sinanggel man bana, bali ras bunga api si kabang i bas api nari.

⁸O Jop, bicara aku min kam, tentu man Dibata aku mindo penampat, dingen kuturiken kesusahenku man baNa.

⁹Labo kita ngasup ngangkasa, perkara-perkara mbelin si ilakokenNa, dingen tanda kuasa si ibahanNa, la lit tampukNa.

¹⁰IpesusurNa udan ku taneh, juma-juma ibereNa lau.

¹¹Tuhu, Dibata kap ngangkatken si meteruk, dingen mereken keriahen man kalak si erceda ate.

¹² [12-13] Rencana kalak si geduk ukur isontarkenNa, dingen kesidingen ibahanNa kalak pentar alu kepantasenna jine, seh maka kai si ilakokenna, la lit mereken asil; [6†]

¹⁴ciger wari e pe, dadap-dadap ia bagi i bas gelap.

¹⁵Tapi iselamatken Dibata kalak musil i bas kematen nari; ipulahiNa kalak si kekurangen i bas penindasen nari.

¹⁶IberekenNa pengarapen man kalak musil, dingen ipesinikna kalak jahat.

¹⁷Malem kal ate kalak si iligas Dibata, e maka ola tulak adi isuriangiNa kam. [7†]

¹⁸Sabap ibaluti Dibata nge luka si ibahanNa; iligasNa, jenari Ia jine si nambarisa. [8†]

¹⁹I bas wari ku wari ipulahiNa kam i bas kesusahen nari,

²⁰adi reh musim kelihen, la kam ibahanNa mate lumben; janah i bas perang, ikawalina kam.

²¹Dibata mulahi kam i bas cakap kalak si la uli nari, iselamatkenNa kam adi reh kiamat.

²²Itawaindu ketombangen ras kelihen, janah la kam mbiar rubia-rubia si meliar.

²³Juma si itenggalaindu la lit batuna; rubia-rubia si meliar melemuk man bandu.

²⁴E maka kam nggeluh alu dame i bas kemahndu; adi ipernehenndu rarasen biri-birindu, la lit sada pe bene.

²⁵Anakndu bali teremna ras bulung rih i mbalmbal.

²⁶Cawir metua kam nggeluh, bali ras page si megersing i bas paksa peranin.

²⁷O Jop, si enda kerina ieteh kami sabap enggo ndekah kal ipelajari kami janah tuhu kal bage, e maka genduari iakuindulah e.”