Read Batak Karo JOP 6 Bible Online

JOP 6 - Batak Karo bible

JOP 6

¹ [1-2] “Adi kesusahenku ras ceda ateku itimbang,

³beraten kap e asa kersik i bas lawit. Dage ola kam sengget, adi meter gia pengeranangku.

⁴Anak panah Dibata si Mada Kuasa enggo lecep i bas dagingku, janah racunna enggo niar ku pusuhku. Kebiaren si mbelin i bas Dibata nari, isuruhNa ngkepung aku.

⁵Puas iakap kelede adi lit dukut man gagatenna, janah lembu pe la erboh adi sangana nggagat page.

⁶Tapi ise ngasup manca pangan si la ernanam, erkiteken la isirai? Kailah nanamna bagin si mbentar i bas tinaruh?

⁷La ateku bage man pangan si bage, janah kai si kupan mutah aku ibahanna.

⁸Engkai maka la ibereken Dibata pemindonku? Engkai maka la ialoiNa pertotonku?

⁹Olanai min Dibata alang-alangen munuh aku!

¹⁰Adi kueteh nggit Ia munuh aku, landek-landek aku minter perban meriah kuakap, aminna gia suina lanai teralang. Kueteh maka Dibata badia kap; la pernah kulawan perentahNa.

¹¹Kai nari gegehku maka banci aku terus nggeluh? Kai gunana nggeluh adi la lit pengarapenku?

¹²I bas batu nari kin aku ibahan? Tembaga kin dagingku?

¹³Lanai lit gegehku guna ngkelini diringku, kujapa pe lanai lit inganku mindo penampat.

¹⁴I bas kesusahen si bagenda, aku perlu teman setia, enggo kulupaken Dibata ntah lang.

¹⁵Tapi kam, o teman-temanku, kam desken lau belin si erbahanca kam tertipu, desken alur lau belin si kerah adi la lit udan reh.

¹⁶Lau belin dem alu salju ras es,

¹⁷tapi lesap kena las wari, alur lau belin nganga dingen kerah.

¹⁸Perlajang papak ndarami lau, terjelpa-jelpa, jenari mate i gurun pasir.

¹⁹Perlajang i Syeba ras Tema nari terdaram-daram,

²⁰tapi pengarapenna peltep i tepi lau belin si kerah.

²¹Kam bali ras lau belin e nandangi aku, idahndu kiniseranku jenari isurutindu bandu perban mbiar kam.

²²Pernah kin kupindo pemerendu? Ntah kusuruh kam nogok kalak i bas gelarku?

²³Ntah gelah ipulahindu aku i bas musuh nari? Ntah gelah itebusindu aku i bas kuasa kalak si jahat nari?

²⁴Ajari dage aku; turiken dage salah lepakku. Banci aku sinik jenari kubegiken kam.

²⁵Kata tuhu tentu erbahanca aku sadar; tapi si sea-sea kap cakap si ibelaskenndu.

²⁶Perban tumpat ukurku, bagi angin saja akapndu cakapku; adi bage ngkai maka aku ijabapindu?

²⁷Kam, anak melumang pe itikam-tandukkenndu, temanndu si ndeherna pe idayakenndu!

²⁸Tataplah ayongku; labo aku nggit guak.

²⁹Kusurlah ukurndu. Ngadiken erbahan si la bujur. Ola ukumndu aku, sabap aku labo salah.

³⁰Akapndu kin aku guak? Akapndu kin la kueteh apai benar, apai salah?