Read Batak Karo JOP 7 Bible Online

JOP 7 - Batak Karo bible

JOP 7

¹Kegeluhen manusia desken tentera upahen, desken kegeluhen sekalak buruh kasar,

²desken sekalak kawan si mesikel nandangi ingan celinggem; desken kalak upahen nimai upahna.

³Bulan terus ku bulan, kegeluhenku kosong; berngi ku berngi kecedaan ate ngenca sikerajangenku.

⁴Adi medem aku, melawenca kuakap wari terang; gelisah aku gedang-gedang berngi, seh mbincar matawari.

⁵Berngan kerina dagingku; darangen kerina, nanah maleren bas ugahku nari.

⁶Wari-waringku mentas alu la erpengarapen, permentasna pedasen asangken tuldak tukang tenun.

⁷Inget min, o Dibata; kegeluhenku sekali erkumesah ngenca; keriahenku enggo keri.

⁸Genduari idahNdu aku, jenari ndigan pe lanai. Adi idaramiNdu aku, enggo aku lawes.

⁹ [9-10] Bagi embun si iembusken angin, jenari masap, manusia pe mate janah ndigan pe lanai mulihken; kerina kalak si nandai ia ngelupakenca.

¹¹Lang! La terbahan sinik! Merawa ateku, ngilas kuakap. Terpaksa aku ngerana!

¹²Engkai maka ijagaiNdu aku lalap? AkapNdu kin aku naga-lawit?

¹³Medem aku, gelah banci min aku pekesahken; gelah si mesuingku urak sitik.

¹⁴Tapi Kam -- ipebiar-biarNdu aku alu nipi; iberekenNdu bangku pengenehenen ras nipi jahat,

¹⁵seh maka pangen aku mate icekak asangken bagenda nggeluh i bas kiniseran.

¹⁶Enggo me; enggo leja aku nggeluh. Tadingken aku! Kegeluhenku desken sekali erkumesah ngenca.

¹⁷Engkai maka manusia e bage pentingna iakapNdu? Man kadeNdu mperdiateken lagu langkahna? [9†]

¹⁸Tep-tep erpagi-pagi iperiksaNdu ia, janah iujiNdu ia la erngadi-ngadi.

¹⁹Ma banci min ndekah sitik ipernehenNdu ku dauh-dauh ah, gelah sempat kubelgek cidurku?

²⁰Bicara erdosa gia aku, ceda kin Kam ibahanna o Pengawas manusia? Engkai maka ipergunaken Kam aku jadi sasaren anak panahNdu? Baban si mberat kal kin iakapNdu aku?

²¹La kin banci ialemiNdu dosangku? La kin banci imasapkenNdu salahku? Tik nari ampar me aku i bas kuburenku, idaramiNdu me aku, tapi aku lanai lit.”