Read Batak Karo JOP 9 Bible Online

JOP 9 - Batak Karo bible

JOP 9

¹ [1-2] “Si ena kerina enggo me kubegi. Tapi ma labo lit manusia ersoal-jabap ras Dibata? Tapi ma labo lit manusia enda bujur i lebe-lebe Dibata? [10†]

³Kuga banci manusia ersoal-jabap ras Dibata? Seribu penungkunen banci isungkun Dibata seh maka sekalak manusia pe la ngasup njabapsa.

⁴Dibata pentar dingen mbisa kal labo lit ise pe ngasup ngelawan Ia.

⁵Deleng-deleng ipiserNa alu la ipebetehkenNa leben, janah deleng-deleng ikernepkenNa alu rawaNa.

⁶Dibata erbahan linur janah taneh iugur-ugurNa, binangun doni iundu-unduNa.

⁷Banci ibahanNa matawari la pultak arah kenjulu, janah bintang-bintang la ersinalsal.

⁸La ise pe nampati Dibata engkimbangken langit la ise pe nampati Ia ndedehi gurung naga lawit.

⁹Ia nge si namaken bintang-bintang i langit Bintang Biduk, Bintang si Mbisa, Bintang Kartika, ras bintang-bintang Selatan. [11†]

¹⁰La kita ngasup ngantusisa perbahanenNa si mbelin, janah tanda-tanda kuasa si ibahanNa la erkeri-kerin.

¹¹Mentas Dibata, tapi la Ia banci kuidah.

¹²Kai ateNa, ibuatNa saja, janah ise pe la ngasup ngambatisa; ise pe la pang nungkunsa, ‘Erkai Kam e?’

¹³Rawa Dibata lalap la nimpet-nimpet. Musuh-musuhNa si nampati Rahap, naga lawit e nembah erjimpuh i teruh tapak-tapak naheNa.

¹⁴Dage uga nari ningku melasken kata njabap Dibata?

¹⁵Aminna la gia aku ersalah, terpaksa kap aku mindo perkuah ate man baNa, Hakimku e.

¹⁶Janah aminna ibereNa pe kesempaten man bangku ngerana, labo aku tek nggit Ia megiken rananku.

¹⁷IsuruhNa angin meter ngeripukken ras ngelukai aku alu la lit kai pe sabapna.

¹⁸Lanai aku sempat erkumesah; tapi sedak kuakap ibahanNa alu kinipagiten nggeluh.

¹⁹Adi erlumba gegeh, lit kin gegehen asa Dibata? Adi erpekara ras Ia, ise kin banci ndilo Ia ku pengadilen?

²⁰Aku bujur dingen patuh, tapi tempa lepak kerina rananku, janah kai si kubelasken tempa-tempa ngukum aku.

²¹ [21-22] Bujur kap aku, tapi genduari lanai diateku e. Enggo leja aku nggeluh sabap si kugapana pe labo dalih, subuk bujur ntah ersalah ikernepken Dibata me kita kerina.

²³Adi kalak bujur rempet mate, tawa Dibata.

²⁴Doni enda iberekenNa man kalak jahat. ItutupiNa mata hakim-hakim doni enda. Adi la kin Dibata mahan si e, ise dage?

²⁵Wari-waringku mentas bagi kalak si erlumba, tapi la lit sada pe si mehulina.

²⁶Geluhku mentas, bagi perahu si pedasna kal, bali pedasna ras kuliki nangkis manuk.

²⁷ [27-28] Adi cirem aku, janah kucubaken ngelupaken si mesuingku, kerina kiniseranku keke ka mulihi erbahanca aku mbiar; sabap kueteh ugapa pe ersalah nge aku i adep-adepen Dibata.

²⁹Dage adi ugapa pe aku ersalah nge, man kadengku sia-sia latih?

³⁰Aminna kupangiri ras kusabuni pe bangku, dosa-dosangku labo banci nangtang.

³¹Igedapken Dibata me aku ku bas kubang si mbages, seh maka pakenku pe mela ngenehen aku.

³²Adi Dibata sekalak manusia, banci kujabap Ia; perkara kami banci iputusken i bas pengadilen.

³³Bicara lit si banci jadi kelang-kelang Dibata ras aku, si banci pedameken kami duana alu kuasana,

³⁴seh maka Dibata lanai ngukum aku, janah lanai aku mbiar man bana,

³⁵tentu banci aku ngerana man Dibata alu la biar-biaren. Tapi la bage! Aku sisada kepe.