Read Batak Karo MASMUR 10 Bible Online

MASMUR 10 - Batak Karo bible

MASMUR 10

¹O TUHAN, ngkai maka ndauh kal Kam? Tupung kami i bas kiniseran, ngkai maka Kam cebuni?

²Kalak jahat megombang, iayak-ayakna kalak musil; itangkapna kalak musil alu siding si enggo ibahanna.

³Megah iakap kalak jahat kerna kejahatenna, kalak rangap numpahi dingen nulak TUHAN.

⁴Kalak jahat la diatena pe TUHAN; alu megombang rukur ia maka TUHAN labo kai-kai pe.

⁵La iertina pengukumen Dibata, sangap ia i bas kai pe; itokoh-tokohina musuh-musuhna.

⁶Nina i bas ukurna, “Labo aku banci bene, labo ndigan pe aku dat kiniseran.”

⁷Rananna dem alu ancamen, kata la tuhu dingen sumpah. Meter kal ia melasken ranan meser ras jahat. [15†]

⁸Cebuni ia i bas kuta-kuta, nggempangi kalak si la ersalah. Iintipna kalak si la ergegeh,

⁹desken sada singa nggempangi i bas rumah, itimaina kalak musil-musil; irigepna i bas sidingna jenari isarenkenna.

¹⁰Kalak medanggel iripukkenna, alu gegehna ijerngemna.

¹¹Rukur kalak jahat i bas ukurna, “Labo aku iperdiateken Dibata! IpitpitkenNa nge mataNa e maka labo aku idahNa!”

¹²O TUHAN, ukumlah kalak jahat! Ingetlah kalak si mesera!

¹³Uga maka kalak jahat megombang man TUHAN? nina i bas ukurna, “Labo aku iukum TUHAN.”

¹⁴Tapi kerina kap idahNdu. Kalak mesera dingen rate ceda, iperdiatekenNdu. Katawari pe nggit kam nampatisa. Kalak medanggel ngendesken dirina man baNdu; lalap kap ia isampatiNdu.

¹⁵Perperken kuasa penjahat, la kap mehuli ukurna, ukum ia kerina rikutken kejahaten si enggo ibahanna, maka lanai ia banci erbahan jahat.

¹⁶Rasa lalap seh rasa lalap TUHAN kap raja kalak si nembah man dibata-dibata si deban, masap me i bas negeriNa nari.

¹⁷ TUHAN, pertoton kalak si peteruk bana, ibegikenndu kap, ipetetap Kam ukurna.

¹⁸Sora serko si itindih dingen anak melumang idengkehkenNdu, hakna ibelaNdu gelah manusia si ermasap-masap lanai banci erbahan jahat.