Read Batak Karo MASMUR 102 Bible Online

MASMUR 102 - Batak Karo bible

MASMUR 102

¹Pertoton sekalak tupung ia i bas kiniseran.

²O TUHAN, begiken min pertotonku, dengkehken min pingko-pingkongku.

³Ola itundalkenNdu aku, tupung aku i bas kesusahen. Dengkehken min pingko-pingkongku, minter min aloi aku.

⁴Geluhku masap bali ras cimber, dagingku melas bali ras api.

⁵Pusuhku getem bagi nggala, nakan pe lanai terpan aku.

⁶Megang sorangku ndehereng, dagingku kertang tading kuling maluti tulan.

⁷Bali aku ras perik si meliar i bas gurun pasir, bagi kalingkupa i bas rumah si enggo runtuh.

⁸Matangku la banci tunduh, bagi perik si kelungunen i babo tarum rumah.

⁹Gedang-gedang nu wari megombang imbangku bangku, ibelaskenna gelarku i bas sumpah.

¹⁰Kupan abu gancih roti, inemenku singgur ras iluh.

¹¹Gara rawaNdu perban nembehNdu, o TUHAN, e maka itatangNdu aku jenari idampeskenNdu.

¹²Geluhku desken awih tupung karaben, melus me aku desken dukut.

¹³Tapi Kam kap raja rasa lalap seh rasa lalap, o TUHAN, kerina kesusuren la ngelupaken Kam.

¹⁴Keke me Kam guna ngkelengi Sion, enggo seh paksana encidahken perkuah ate man bana, enda me paksana.

¹⁵Sabap keleng kal ate suruh-suruhenNdu nandangi kuta e, aminna pe kuta e enggo runtuh, keleng kal atena kuta e aminna pe enggo runtuh.

¹⁶Bangsa-bangsa mbiar nandangi TUHAN, kerina raja-raja malang man kuasaNa.

¹⁷Sabap ipanteki TUHAN me mulihi Sion, icidahkenNa me kemulianNa.

¹⁸IdengkehkenNa me pingko-pingko bangsaNa si enggo itadingken dingen ibegikenNa me pertotonna.

¹⁹Suratken min kerina perbahanen TUHAN enda, guna kesusuren si nandangi reh, maka bangsa si langa tubuh pe, banci muji Ia.

²⁰Itatap Dibata i bas inganNa si badia si meganjang nari, i Surga nari ipernehenNa ku doni,

²¹lako ndengkehken kelsehen kalak si tertaban, dingen lako mulahi kalak si iukum mate.

²²E maka imomoken me gelarNa i Sion, ipuji me Ia i Jerusalem,

²³tupung bangsa-bangsa ras kerajan-kerajan pulung lako ersembah man TUHAN.

²⁴Tupung aku nguda denga, lanai aku ergegeh ibahan TUHAN, ipegendekNa umurku.

²⁵E maka ningku, “O Dibata, ola buat kesahku adi langa aku metua.” O TUHAN, Kam nggeluh rasa lalap seh rasa lalap,

²⁶nuria nai Kam si nepa pertibi enda, alu tanNdu jine, itepaNdu langit. [120†]

²⁷Kerina nge pagi kernep, Kam ngenca lang, bagi uis kerina nge tapes, iambekkenNdu ia bagi uis si enggo merigat, e maka bene me kerina.

²⁸Tapi Kam tetap seh rasa lalap, geluhNdu tetap la erkeri-kerin.

²⁹Teneng me pergeluh anak-anak kami, erkiteken pengkawaliNdu, teneng me kempu-kempuna.