Read Batak Karo MASMUR 103 Bible Online

MASMUR 103 - Batak Karo bible

MASMUR 103

¹I bas Daud nari. Pujilah TUHAN, o tendingku, tendi, kula, ukurku pujilah gelarNa si badia!

²Pujilah TUHAN, o tendingku, ola lupa kerina kiniulinNa.

³IalemiNa kerina dosa-dosandu, dingen ipepalemNa kerina penakitndu.

⁴I bas kuburen nari ipulahiNa kam, ipasu-pasuNa kam alu keleng ate ras perkuah ateNa.

⁵Alu kiniulin idemiNa geluhndu, desken rajawali tetap kam megegeh dingen nguda.

⁶Bujur perbahanen TUHAN man kalak si tertindas, janah iberekenNa bana kebujuren.

⁷IpetangkasNa sura-suraNa man Musa, dingen kalak Israel ibereNa ngidah kinimbisanNa.

⁸ TUHAN e perkuah dingen perkeleng kap, la pedas Ia merawa, dingen dem alu keleng ate si tetap. [121†]

⁹Kentisik ngenca TUHAN nembeh, Ia labo rasa lalap merawa.

¹⁰Labo kita iukumNa sue ras dosanta, labo ia erbalas man banta sue ras kesalahenta.

¹¹Tapi bali ras ganjangna langit i babo doni nari, bage kal me belinna keleng ateNa man kalak si erkemalangen baNa.

¹²Bagi dauhna Timur i Barat nari, bage me ipedauhNa dosa-dosanta i bas kita nari.

¹³Bagi keleng ate bapa man anak-anakna, bage kal me pengkelengi Dibata kalak si erkemalangen man baNa.

¹⁴Sabap ieteh TUHAN i bas kai nari kita itepaNa, ingetNa me maka abu kap kita.

¹⁵Bali ras dukut, geluh manusia pe labo kap ndekah, erbunga desken bunga i mbalmbal;

¹⁶kenca iembus angin, masap me ia, lanai nari lit si ngidahsa.

¹⁷Tapi kalak si erkemalangen man TUHAN, tetap ikelengiNa; kiniulinNa tetap seh rasa lalap,

¹⁸man kalak si encikep perpadanenNa, janah alu tutus patuh man perentahNa.

¹⁹ TUHAN ngerajai Surga, Ia raja i babo kerinana.

²⁰Pujilah TUHAN o malekat-malekat si mbisa, ndengkehken dingen patuhi perentahNa.

²¹Pujilah TUHAN, o kerina kuasa-kuasa i langit, kerina suruh-suruhenNa si nehken perentahNa.

²²Pujilah TUHAN o kerina tinepaNa, i bas kerina kinirajanNa. Pujilah TUHAN o tendingku.