Read Batak Karo MASMUR 104 Bible Online

MASMUR 104 - Batak Karo bible

MASMUR 104

¹Pujilah TUHAN, o tendingku! Andiko seh kal Kam muliana, o TUHAN Dibatangku! Kam ruisken kiniulin dingen kemulian.

²Kam icabini terang si ersinalsal. IkimbangkenNdu langit desken kemah,

³i babo lau i das langit, ipajekkenNdu rumahNdu. Embun ijadikenNdu man geretaNdu, kabeng angin iersakNdu.

⁴Angin ijadikenNdu man persuruhenNdu, kilap jadi si erdahinNdu. [122†]

⁵I babo palas si nteguh ipajekkenNdu doni enda, e maka asa ndigan pe labo geling.

⁶Kenca bage icabiniNdu alu lawit lau nengneng namburi ancuk-ancuk deleng.

⁷Tupung isergangNdu, kiam lau e, megi perentahNdu lawes ia minter.

⁸I bas deleng-deleng nari maler kuse me lau e, ku bas ingan si isikapkenNdu i berneh.

⁹ItetapkenNdu baleng si la banci ibentasina, maka ola nai nari itamburina doni enda.

¹⁰IsemburkenNdu sumbul lau i bas baluren-baluren nari, i bas kelang uruk-uruk nari maleren lau anak,

¹¹lako mere minem kerina rubia-rubia i mbalmbal, gelah olanai muas kalde-kalde kerangen.

¹²Ndeher i bas lau anak e nari ibahan perik-perik asarna, rende-rende ia i datas dahan-dahan.

¹³I datas langit nari iusekenNdu udan ku deleng-deleng, dingen dem doni enda alu pasu-pasuNdu.

¹⁴IpeturahNdu dukut-dukut guna rubia-rubia, kerina erbage sinuan-sinuan man manusia. Gelah banci ia nuan-nuan,

¹⁵dingen ibahanNdu anggur si periahken atena. Minak saitun si erbahanca meriah akapna, pangan guna mereken gegeh man bana.

¹⁶Batang cemara i Libanon ndatken lau udan si cukup, kayu cemara e, Kam jine nuanca, o TUHAN.

¹⁷I je rasar perik-perik, i das batang cemara rasar me perik si gedang kerahung.

¹⁸Deleng-deleng si meganjang jadi ingan nggagat kambing kerangen, i bas liang-liang batu-batu cebuni me landak.

¹⁹IjadikenNdu bulan guna nentuken paksa-paksa, matawari pe tehna katawari paksana sundut.

²⁰Tupung berngi ibahanNdu gelap, maka gawah-gawah kerina rubia-rubia si meliar.

²¹Singa-singa nguda erdengum ndarami pangan, pangan si isikapkenNdu man bana.

²²Kenca pultak matawari mulih ia, jenari gempang i bas inganna cebuni.

²³E maka ndarat me manusia ndahi dahinna, dingen terus erdahin seh ben wari.

²⁴O TUHAN, enggo melala kal si ilakokenNdu, doni enda dem alu tinepaNdu. Kerinana e ijadikenNdu alu dem kepentaren.

²⁵Nehenlah perkimbang lawit si mbelang, isin mahluk si kitik dingen galang.

²⁶I je me erlajo Lewiatan tinepaNdu kapal-kapal pe erlayar i je. [123†]

²⁷Kerina ia ngarapken Kam gelah ndatken nakan i bas paksana.

²⁸Panganna isikapkenNdu, maka man ia, seh besur.

²⁹Adi itulihkenNdu, gentar me ia kerina, adi ibuatNdu kesahna, mate me ia, mulihken jadi abu.

³⁰Tapi adi iberekenNdu kesahna, jadi me ia, iberekenNdu geluh si mbaru man doni enda.

³¹Ermulialah TUHAN, tetap rasa lalap, malemlah ateNa erkiteken tinepaNa.

³²IpernehenNa ku doni dingen nggirgir ibahanNa, ikuitNa deleng-deleng e maka ndarat cimberna.

³³Rende ateku man TUHAN kidekah umur geluhku, asa gedang geluhku, rende ateku muji Dibatangku.

³⁴Mbera ngena ateNa ende-endenku, sabap keriahenku reh i bas Ia nari.

³⁵Kernepkenlah min i bas doni enda nari kalak perdosa, imasapkenlah kerina kalak jahat. Pujilah TUHAN, o tendingku! Pujilah TUHAN.