Read Batak Karo MASMUR 105 Bible Online

MASMUR 105 - Batak Karo bible

MASMUR 105

¹Katakenlah bujur man TUHAN, momokenlah kemulianNa. Turikenlah perbahanenNa, ku kerina bangsa-bangsa.

²Rendelah muji TUHAN, turikenlah perbahanenNa si mejin.

³Meriahlah ateta sabap Ia kap si mada kita, asa kalak si nembah Ia meriahlah ukurna.

⁴Dahilah TUHAN mindo penampat, sembahlah Ia rasa lalap.

⁵ [5-6] Kam, kesusuren Abraham, suruh-suruhen Dibata, dingen kesusuren Jakup si ipilihNa ingetlah kerina tanda kuasa si ibahanNa, dingen putusen-putusen si enggo iberekenNa.

⁷ TUHAN kap Dibatanta, perentah-perentahNa arus ipatuhi i belang-belang doni enda.

⁸Perpadanen si ibahanNa lalap iingetNa, padanNa seh ku sundut peseribuken.

⁹IngetNa kap perpadanenNa ras Abraham, padanNa man Isak la ilupakenNa. [124†]

¹⁰Man Jakup perpadanen e ipeteguhiNa, jadi ketetapen man Israel rasa lalap. [125†]

¹¹Nina, “Man bandu Kubereken taneh Kanaan, jadi taneh pusakandu.”

¹²Nai bagi kalak pertandang nge bangsa Dibata e i je, beliganna pe la kasa kai.

¹³Tandang-tandang ia i bas sada bangsa nari ku bangsa si deban, miser i bas sada negeri nari ku negeri si deban.

¹⁴Tapi la ipediat TUHAN ise pe ndeheri bangsa e, janah guna ngkawalisa ipersingeti Dibata raja-raja nina, [126†]

¹⁵“Ola suhsahi bangsa pilihenKu ola bahan jahat man nabi-nabingKu.”

¹⁶Ibahan TUHAN maka jadi me kelihen i bas negeri kalak enda, jenari ibuatNa i bas kalak enda nari kerina persedian pangan. [127†]

¹⁷Tapi enggo isuruhNa sekalak dilaki ngelebei ia, Jusup, si enggo idayaken jadi budak. [128†]

¹⁸Erdalan ia alu nahena igari, kerahungna iiket alu rante besi. [129†]

¹⁹Dungna teridah maka payo bagi kata Jusup ndube, kata TUHAN encidahkenca maka ia benar.

²⁰Jenari raja Mesir, penguasa bangsa-bangsa, mbebasken ia i bas tutupen nari. [130†]

²¹Iendeskenna man bana tugas ngurus istana, jenari iangkatna ia jadi si merentah kerina negeri e. [131†]

²²Alu kuasana jine iaturna menteri-menteri, pertua-pertua kerajan iajarina.

²³E maka lawes Jakup ku Mesir, dingen tading ia i je. [132†]

²⁴Ibahan TUHAN maka ertuah bangsaNa, e maka enggo gegehen ia asangken imbangna. [133†]

²⁵Ibahan TUHAN maka nembeh ate kalak Mesir man bangsa e, jenari itipu kalak Mesir suruh-suruhen TUHAN.

²⁶Kenca bage isuruh TUHAN si Musa, suruh-suruhenna, ras Harun, kalak pilihenNa. [134†]

²⁷I Mesir ilakokenna tanda kuasa, perbahanen-perbahanen si mbelin i bas TUHAN nari.

²⁸Ibahan TUHAN maka gelap tuhu-tuhu negeri e, tapi bangsa Mesir la ngikutken perentahNa. [135†]

²⁹Lau belin i Mesir isalihken TUHAN jadi dareh, e maka mate kerina binurungna. [136†]

³⁰Katak erkemut i belang-belang negerina, seh bengket ku kamar raja. [137†]

³¹Kenca e iperentahken Dibata rehen rengit-rengit ras laneng, rulung-ulung i bas kerina negeri e. [138†]

³²Gancih udan ipesusur TUHAN baho, dingen perkas ras kilap si erdepar-depar. [139†]

³³Mbulaken ibanNa batang anggur ras batang ara, kerina batang kayu i negerina itombangkenNa.

³⁴IberekenNa perentah, e maka rehen labang, beliganna la teralang. [140†]

³⁵Keri kerina ipanganina sinuan-sinuan i negeri e, kerina si man peranin kernep ibanna.

³⁶E maka kerina anak kalak Mesir sintua ibunuhNa, mate kerina anak-anak perana sintua i bas tep-tep keluarga. [141†]

³⁷Jenari maka ibabai TUHAN bangsa Israel ndarat, ibabana emas ras pirak. Iteruh pengkawali TUHAN, kerina megegeh ras mejuah-juah. [142†]

³⁸Kerina kalak Mesir mbiar ngenehenca, e maka meriah ukurna tupung lawes kalak enda.

³⁹Ikimbangken Dibata sada embun i babona, tupung berngi iberekenNa man kalak enda sada api si erbahanca terang. [143†]

⁴⁰Erkiteken pemindon bangsa e isuruhNa reh leto, ipanganina ngayak besur pangan si reh i Surga nari. [144†]

⁴¹Itakana deleng batu, e maka erburak lau i jenari, maler desken lau belin i gurun pasir. [145†]

⁴²Sabap iinget TUHAN perpadanenNa man suruh-suruhenNa Abraham.

⁴³Bage me itaruhkenNa ndarat bangsa pilihenNa alu ukur meriah rende bangsa e janah ersurak-surak.

⁴⁴IberekenNa man kalak enda taneh bangsa-bangsa si deban, ulih latih kalak jadi sikerajangen bangsaNa, [146†]

⁴⁵gelah tetap ipatuhi kalak enda undang-undangNa, dingen ngikutken perentah-perentahNa. Pujilah TUHAN!